Hoseya 12
12
1Wantu wa Israeli wanzyengeta kwa mpayu na Waisraeli kwa uzyanga. Kumbiti wantu wa Yuda wankwendereya kuwera waminika kwa Mlungu mkulu.
2Wantu wa Israeli wankulolera liyega paliwala poseri wankuwinga liyega lya kwagulawa mashenji. Wongera mpayu na ungesera, wankutenda lipatanu na Ashuru na kujega lipaki Misri. 3Yakobu pakaweriti kakali hakeni yiwuki kamkoliti shisukunu kaka gwakuyi na pakaweriti mkulu kalikakanikiti na Mtuwa Mlungu. 4Yakobu kalikomangiti na ntumintumi gwa Mlungu na kumkanka, kaliliti na kumluwa Mlungu kamwoneri lusungu pakaweriti aku Beteli, kaliwoniti na Mlungu, aku na kayoweriti nayomberi. 5Mtuwa Mlungu gwa Mashonta ndo litawu lyakuyi. 6Vinu mwenga mumuwuyili Mlungu gwenu. Mumjimiri yomberi na mumutumbiri Mlungu gwenu mashaka goseri.
7Mlungu kalonga hangu, wantu wa Israeli wafira kwiwa, wapata mota kwa kwiwira wamonga. 8Israeli kalitakuliriti mweni hangu, neni ndo mlunda, neni wera mlunda! Kwahera yoseri yakaweza kundewelera kupata mota. Toziya Mtuwa Mlungu ndo Mlungu gwa Israeli. 9Mtuwa Mlungu kalonga hangu, neni ndo Mtuwa Mlungu, Mlungu gwaku yanikulaviyiti muisi ya Misri! Neni hanikutendi gulikali kayi mumalingu, ntambu yaguweriti kushiwala.
10Neni nyoweriti na wambuyi, ndo neni yaniwapanana malola gavuwa na kwa njira yawu mbwera mpangu gwawu. 11Aku Gileyadi ndo pahala pa vidoda, aku Giligali watambikiti ng'ombi shipalu, hangu vitalawanda vyawu haviweri vimatiru vya mabuwi kumifereji mumalambu.
12Yakobu katugiliti isi ya Aramu pakaweriti aku katenda lihengu su kapati mdala, kalolera kondolu su kapati mdala. 13Mtuwa Mlungu kawatumiti wambuyi wakuyi kuwalopola wantu wa Israeli kulawa muumanda muisi ya Misri na kuwalolera. 14Wantu wa Israeli wamkaliziya nentu Mtuwa Mlungu. Kumbiti Mtuwa Mlungu hakawawuziliri makosa gawu, hakawakomangi kwa mirandu midoda yawatenditi.
The Bible version in the Pogoro Language. @The Word for The World International and Pogoro Language translation. All rights reserved.