Hoseya 11
11
Ufiru wa Mlungu kwa wantu wakuyi wagalambuka
1Israeli pakaweriti mwana mdidini nimfiliti,
nimshemiti mwana gwangu kalawi misri.
2Kumbiti panendeleyiti kumshema,
yomberi kagenda kutali na neni,
womberi walekandiri kuwatambikira Mabaali,
na kuvitumiziya vinyagu vya wamlungu ubani.
3Neni ndo yanimfunditi Israeli kutyanga!
Neni namweni niwatoliti mumawoku gangu,
kumbiti wamanandiri kuwera neni ndo yaniwapoliti.
4Niwalongoziya kwa lusungu na ufiru.
Niwagonjiziya pashifuwa paneni.
Na ng'ong'onaliti pasi su kuwaliyiziya.
5Su, hawawuyi muisi ya Misri, hawakolwimlima na mfalumi gwa Ashuru, mana walema kumbuyira. 6Nkondu hayiyizi mumji agu, hayimegimegi ngwiligiziwu za migomi yakuyi na kuwagamiziya mumaboma gawu. 7Wantu waneni wafira kundeka neni, pawashemwa wizi pambindi, kwahera ata yumu yakaweza kuwatanga.
8Gwee Israeli, wezahashi kukuleka?
Wezahashi kukwasa gwenga Israeli?
Hawezihashi kukuwagamiziya handa mji gwa Adima?
Hawezihashi kukutenda gambira Seboimu!
Moyu gwangu gundewelera na tenda hangu,
lusungu lyaneni lyongereka nentu.
9Wera na maya na mwenga,
kumbiti hapeni niwagamiziyi kayi Israeli,
toziya neni na Mlungu na muntundiri.
Neni na Mnanagala muwamu mwa mwenga,
naneni nizandiri kuwawagamiziya.
10“Wantu waneni hawaniziri neni shaka pankuguguma gambira simba pakati pa wankondu wawu. Hawizi kwaneni kalongola pawalendemera kulawa kwaguzyeta mshenji. 11Hawizi kulawa Misri pawalendemera kwa lyoga gambira mpongu, hawaguluki kulawa Ashuru gambira ng'unda na neni haniwawuziyi ukaya kwawu, neni Mtuwa Mlungu nonga.”
Israeli na Yuda wang'alambuka
12Mtuwa Mlungu kalonga hangu, wantu wa Israeli wazyengeta kwa mpayu na Waisraeli wazyanga. Wantu wa Yuda wankung'alambuka neni Mlungu gwawu mwaminika.
The Bible version in the Pogoro Language. @The Word for The World International and Pogoro Language translation. All rights reserved.