Hoseya 13
13
Maya ga Mtuwa Mlungu kwa Israeli
1Wantu wa Israeli pawatakuriti, wantu wamonga walendemera na kutira, Wantu wa Israeli waweriti na makakala nentu aku Israeli, kumbiti watenditi vidoda kwa kumguwira Baali toziya ya aga hawahowi. 2Wantu wa Israeli watenditi vidoda nentu, walinyawira vinyagu vya kunonera, vinyagu vyavinyawitwi kwa umani wawu, vyoseri viweriti lihengu lya wanyawa. Weni walonga hangu, Tuvitambikiri! Wapalu wankunonera mwana gwa ng'ombi! 3Su, hawagamili kalongola gambira lifukafuka lya mandawira ama mangami ntambu yagagamira kalongola, handa miwawi yayigulusiwa pahala pa kukomera, handa lyosi lyalilawa mubomba.
4Mtuwa Mlungu kalonga hangu. Neni Mtuwa Mlungu ndo Mlungu gwenu, namweni niwalaviya muisi ya Misri, kwahera Mlungu yumonga ila neni na kwahera gwa kuwalopola ila neni. 5Neni niwaloleliti pamuweriti mushiwala, muisi yayiwera iyuma. 6Kumbiti pamliyiti kala na kwikuta, mwanjiti kuwera na mtiti mpaka mlyaluwa. 7Su, haniwagulukiri gambira simba mwawoseri mwenga, haniwawingi gambira duma munjira. 8Haniwagulukiri gambira dubu yakapokitwi wana gwakuyi. Haniwapapulangi mushifuwa shenu na kuwaliya palapanu handa simba, haniwapapulangi vipandivipandi handa nkanyama gwa kundundu. 9Haniwalagi mwenga Waisraeli. Na kwahera yakaweza kuwatanga. 10Kakoshi mfalumi gwenu vinu kawalopoli? Wakoshi walii wakulu wenu wawaloleri? Mwenga ndo yamluwiti nakulonga hangu. Gutupanani mfalumi na wakulu watukolimlima. 11Niwapananiti mfalumi agawu pawera na maya, shakapanu nimusiyiti paweriti na maya.
12Makontola ga Israeli nigalemba, Wantu wa Israeli haniwakomangi. 13Hawaweri na utama gambira utama wa mawu yakalera mwana yakalema kwiwuka mumtima gwa mawu! 14Hapeni niwalopoli wantu awa mukuhowa ama kuwalopola mumakakala gwa kuhowa. Gwee kuhowa gwizi gwagamiziyi. Neni hapeni niwawoneri kayi lusungu! 15Tembera Israeli kaherepa kuliku maisi gamonga,
neni Mtuwa Mlungu haniwajegeri lyega lya livuki lya kwagulawa mshenji, lyenga lyalilawira kushiwala na mbwiru yakuyi hayiperi mashi, mbwiru zakuyi haziyumi. Hanja zakuyi zoseri haziyumi. 16Wantu wa Samaria hawakomangwi toziya wang'alambuka neni. Hawalaguwi kukondu na wana wawu hawalaguwi na yawana yinda hawatumbulwi.
The Bible version in the Pogoro Language. @The Word for The World International and Pogoro Language translation. All rights reserved.