लुका 4
4
सैतानवइ येसुलाइ परिछ्या दासिउ
मत्ति ४:१-११; मर्कुस १:१२-१३
1येसु पबित्र आत्मावइ भरिपुर्न जास्द यर्दन भैङि ओल्के, हुकिं पबित्र आत्माइ येसुलाइ अर्मिर सु मालेउ थाउँत लोंकेउ। 2होत चालिस दिन् सम सैतानवइ येसुलाइ अनेक पापल, फसौ अस्पैंकेउ। चालिस दिन् ओखेमोत, निउज माज्यासिउवइ येसु भ्या करेके।
3होबेलाक ज सैतानवइ येसुलाइ हैदोकेउ, “ना परमेस्वरवइ ओजाकिं आउ लुँलाइ भरेस जास्नि लेद, आग्या दोको, नो लुँ भरेस ओजास्क।”
4येसुइ नोलाइ हैदोकेउ, “‘अर्मि भरेसवइ वाज माबाँचि’ हैलेद परमेस्वरवइ ओबचनल अप्सर्सिउ लिज्या#व्यबस्था ८:३।”
5सैतानवइ येसुलाइ तुबु झ्यों पोत, लाँद तफेतज मादमिलाउ स्यो राज्यर अस्तैंद योकेउ। 6सैतानवइ येसुलाइ हैदोकेउ, “ङा नालाइ आउ राज्यलाउ स्यो अधिकार सोनो धन दौलत ङायिंनि नेलाइलेक आउ स्योज ङालाइ यासिउ लिज्या हैजैद ङा जोलाइ यान्या इच्छ्या ङादाज्या होलाइज ङायाज्या। 7ना ङालाइ धो नयाङाकिंलेक आउ स्यो ना नमि जास्न्या ले।”
8येसुइ नोलाइ हैदोकेउ, “‘ना परमप्रभु, नपरमेस्वरलाइ वाज धो योको सोनो परमेस्वरलाइ वाज आदर दोको’ हैलेद परमेस्वरवइ ओबचनल अप्सरसिउ लिज्या#व्यबस्था ६:१३।”
9हैजैद सैतानवइ येसुलाइ यरुसलेमल लाँद परमेस्वरवइ उझिम्वइ ओज्युत नैद येसुलाइ हैदोकेउ, “ना परमेस्वरवइ ओजाकिंलेक आतिं मेल फाल्जाको। 10नेलाइलेक अप्सरसिउ लिज्या, ‘परमेस्वरवइ नरछ्या दान्या परमेस्वरवइ ओस्पाँ हैदान्यार अस्परिंन्या ले,#भजनसंग्रह ९१:११’ 11सोनो ‘नोराइ नालाइ याकुइवइ थामिन्यालेर, माकिंते नखुँ लुँत बजारिसिन्याले’#भजनसंग्रह ९१:१२।”
12येसुइ सैतानलाइ हैदोकेउ, “‘ना परमप्रभु नपरमेस्वरवइ ओजाँच तादोको’ हैलेद परमेस्वरवइ ओबचनल अप्सर्सिउ लिज्या#व्यबस्था ६:१६।”
13सैतानवइ येसुलाइ जाँच ओदोउ छिंङि फिरि गुँ मौका ओमाराउवा सम येसुलाइ बनैद हिंके। 14येसु पबित्र आत्मावइ ओसक्तिस गालिल्ल ओल्के, येसुइ ओबारेलाउ अस्पाँ होयालाउ स्यो थाउँयाल थास्के।
15येसुइ यहुदिर अस्दुसिन्या झिम्याल यास्पैकेउ हैजैद स्योराइ येसुइ उमि प्रसंसा दोकेर।
नासरतलाउ अर्मिराइ येसुलाइ बिस्वास मादोकेर
मत्ति १३:५३-५८; मर्कुस ६:१-६
16येसु ओल् उहुर्किउ नासरत सहरल राके। ओबानि अनुसार नान्या छ्याम् यहुदिर अस्दुसिन्या झिम्ल हिंके, हुकिं परमेस्वरवइ ओबचन परिन्या च्याँके। 17येसुलाइ परमेस्वरङि अस्पाँन्या यसैयावइ अप्सर्सिउ पुस्तक योकेर। येसुवइ नो पुस्तक पल्तैकेउ, सोनो आउ अस्पाँ अप्सर्सिउ खन्द अस्पुलैद परिके।
18“परमप्रभुवइ ओआत्मा ङास लिज्या, नेलाइलेक गरिबरलाइ अप्चाउ खबर सथैन्याको लागि, परमेस्वरवइ ङालाइ छानिनैङाउ। कैदिरलाइ छुत्कारा यान्या, सोनो यामि मारैंन्यारलाइ यामि सरैंद यान्या, थिचोमिचोल परिउरलाइ स्वतन्त्र जैन्याको लागि#यसैया ६१:१-२ ,
19परमेस्वरवइ उर्मिरलाइ छुत्कारा यान्या समय रादले हैलेद प्रचार दान्या ङालाइ अस्परिंनैङाउ” हैलेद येसुवइ पुस्तकलाइ बन्द जैकेउ।
20हैजैद तुबु सेबकलाइ याद येसु चुँके#4:20 चुँके: होबेलाकाउ समयल अर्मिरलाइ अस्पैन्या मास्तरराइ चुँद ज अस्पैन्या याचलन ले।। यहुदिर अस्दुसिन्या झिम्लाउ लिज्याउ स्यो अर्मिराइ येसुलाइ राँदनैकेर। 21येसुवइ नोरलाइ हैयादोकेउ, “आउ परमेस्वरवइ ओबचनल अप्सर्सिउ अस्पाँ आछिम् जे जेथैज्याक ज पुरा जास्द ले।”
22स्यो अर्मिराइ येसुइ ओप्रसंसा दोकेर। येसुइ हैओलेउ अप्चाउ अस्पाँर थैद नोर छक् परिकेर। हुकिं नोराइ हैलेकेर, “आउ योसेफवइ ओजा म्हा रो?”
23येसुइ नोरलाइ हैयादोकेउ, “जे ङालाइ पक्का आउ आन् हैदान्या जेले, ‘ए बैद्य, ना नालाइज सगराँको।’ सोनो ‘ना जो जति कफर्नहुमल दाद ननै हैलेद गे गेथैनै हो नसहर नासरतल ब दोको’ हैलेद जे ङालाइ हैदान्या जेले।” 24येसुइ नोरलाइ हैयादोकेउ, “दसाज ङा जेलाइ हैङादाच्योज्या, परमेस्वरङि अस्पाँन्यालाइ ओनाखाँ सहरल खर्क ब अर्मिराइ समान मादोर#युहन्ना ४:४४। 25छुतो अस्पाँ ङा जेलाइ हैङादाच्यो, एलियावइ ओसमयक सोंरिम छ महिना नम् मार्वाद घ्वो अनिकाल जास्के होबेलाक इस्राएलल भ्या राँदिर लेर#१राजाहरु १७:१ । 26तर सिदोन छेत्रल परिन्या सार्पत नाखाँलाउ राँदिइ ओलेउक वाज परमेस्वरवइ एलियालाइ अस्परिंकेउ#१राजाहरु १७:८-१६। 27परमेस्वरङि अस्पाँन्या एलिसावइ ओपालाक इस्राएलल भ्या कुरिर यालेदिब सिरिया देसलाउ नामान हैयादाज्याउ अर्मि वाज गराँके, गुँ सु मागराँकेर#२राजाहरु ५:१-१४।”
28आउ अस्पाँ थैद यहुदिर अस्दुसिन्या झिम्लाउ लिज्याउ स्यो अर्मिर यायुउँ-चोद चुर जास्केर। 29नोर जाराकजुरुक सोद येसुलाइ सहरङि बाहारदि अस्पुलैकेर। नोराइ यासहर दाँदात परि नो दाँदाताउ हाँ अर्ङैतिं येसुलाइ मेल भिंउ अस्पैंकेर। 30तर येसु नोराइ याखार्लिं छिरिद हिंके।
भुत लागिउ अर्मि गराँउ
मर्कुस १:२१-२८
31येसु गालिल छेत्रलाउ कफर्नहुम सहरल राके। नान्या छ्याम् येसुवइ नोरलाइ सिछ्या यायोकेउ। 32येसुइ उसिछ्या थैद नोर छक् परिकेर, नेलाइलेक येसुइ अधिकार्स यास्पैकेउ#मत्ति ७:२८-२९; मर्कुस १:२२। 33यहुदिर अस्दुसिन्या झिम्ल भुतलागिउ तुबु अर्मि ले। 34नो घ्यो अर्गास चिर्किके, “हे नासरतलाउ येसु, ना गेस नाति नएन्? ना गेलाइ समिन्या लेद नराउ रो? परमेस्वरवइ उस्परिंनिउ पबित्र अर्मि नाज हैलेद ङा ङासैंज्या।”
35आउ थैद येसुइ नो भुतलाइ हप्कैद हैदोकेउ, “छपक् लेनि, नो अर्मिङि पुलुस्द हिंनि।” हैजैद स्योराइ याबरिक नो अर्मिलाइ पछारिद भुत पुलुस्के तर नो अर्मिलाइ निउ चोत् पतक् मालागिके।
36हुकिं आउ राँद स्यो अर्मिर छक् परिद हैलेकेर, “आउ अर्मिवइ उबुलित कमदिउ अधिकार ओलेउ, आवइ ओवाहप्कौ पन्याज भुत्र ब पुलुस्द याबागिज्याउ!” 37हैजैद कफर्नहुम सहर जाँखाँ येसुइ ओचर्चा थास्के।
38यहुदिर अस्दुसिन्या झिम्ङि पुलुस्द येसु सिमोनवइ उझिम्क हिंके। सिमोनवइ उदुरुँ ओज्वरो राद थलापरिउ ले। झिम्लाउ अर्मिराइ नोलाइ सगराँद यासिको लेद येसुलाइ बिन्ति दोकेर। 39येसु ओज्वरो राज्याउवइ ओतैं छ्योक हिंद ज्वरोलाइ हकारिकेउ। हुकिं सिमोनवइ ओदुरुँलाइ ज्वरोइ रास्केउ। हैजैद नो सोद येसु सोनो ओचेलाराइ यासेवा सत्कार दोकेउ।
40घाम् उनुप्नाक अर्मिराइ छन्द भाँतलाउ याज्वरो राज्याउरलाइ येसुइ ओलेउक यारैकेर। येसुइ नोर स्योराइ याकलाँत उकुइ नैद यास्गराँकेउ। 41धम्सिउ अर्मिराइ यालेउङि भुत्र कलिद पुलुस्केर, “ना परमेस्वरवइ ओजा।” तर नो भुतरलाइ येसुइ हप्कैद अस्पाँउ मायोकेउ, नेलाइलेक नोराइ येसुलाइ मुक्ति यान्या ख्रिस्त हैलेद सरेस्सिउ ले।
42छकल्या मिंओराउँ पन्याज येसु पुलुस्द एकान्त थाउँक हिंके। तर भ्या अर्मिराइ याहुल्मुलवइ येसुलाइ खिमैखिमै ओलेउक कलेसरैकेर, “नोराइ गेलाइ भनैद ताहिंनि” हैलेद येसुलाइ उँन्या कोसिस दोकेर। 43तर येसुवइ नोरलाइ हैयादोकेउ, “ङा परमेस्वरवइ ओराज्यलाउ अप्चाउ खबर गुँ सहरल ब सथैउ परि नेलाइलेक ङालाइ आउको लागि ज परमेस्वरवइ उस्परिंङाउ।”
44हैजैद येसुवइ यहुदिया छेत्रलाउ लेउ यहुदिर अस्दुसिन्या झिम्याल हिंद प्रचार दोकेउ।
Attualmente Selezionati:
लुका 4: MAIK
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024 (Active), Mother Tongue Translators Society and Wycliffe Bible Translators, Inc. All rights reserved.
