Bikoluwa ndia Bhakwenda 25
25
Paulo naki̱ju̱li̱li̱a kindia Kai̱sali̱
1Fesito naladhaki̱ tolo salo nali gavuna ka kyalo ndia ka Kai̱sali̱ya, ai̱ya ka Yelusalemu, 2kindia bhabhembi̱ bhangbeku ndibha Mambombi̱ na bhasali̱a ndibha Bhayu̱daya ndibhetolo ka Yu̱deya kindia yabhasi̱dha-si̱dhani̱li̱o tolia Fesito musango ndia Paulo akoli̱o. 3Bhankunga Fesito eti abhubhalie andu̱lu̱ alagilie eti bhamu̱i̱se Paulo ka Yelusalemu nanga bhabhi̱ na tegeka sa oliliaki nesi̱yo. 4Fesito naki̱bhu̱si̱ki̱aku̱ bhiyo; “Paulo bhangbei̱li̱ ka Kai̱sali̱ya bhia nyankomo toli̱ nemi nili̱bi̱ya si̱ki̱ami̱ku̱. 5Odhuwe bemoti̱ ka bhasali̱a ndibhanu̱ bhai̱ye nemi andu̱lu̱ bhamunyegele Paulo kabha nali na musango ndia akoli̱o.”
6Fesito adhakia na bhabhembi̱ bhangbeku ndibha Mambombi̱ na bhasali̱a ndibha Bhayu̱daya tolo nane kedha komi̱ ka Yelusalemu du̱mbi̱ naki̱ya ka Kai̱sali̱ya. Tolo ndia adhabhiabe, Fesito naki̱li̱ki̱sa koti̱ nakibhulagilia bhasilikale eti bhambi̱ki̱se Paulo ka koti̱. 7Paulo ndia agodha ka koti̱, Bhayu̱daya ndibha bhatuka ka Yelusalemu nibhaki̱mbi̱sabe musango mamadha no bhakabhi̱ na bwakai̱so si̱.
8Du̱mbi̱ Paulo nakyetonganabe bhiyo; “Kili na kima poni ndie nikoli̱o ndia abhu̱ni̱ kilagilo ndia Mambombi̱ ampesi̱a Musa kedha ndia aki̱lu̱za Hekalo kedha sobhi̱li̱li̱a Kai̱sali̱.” 9Fesito abhi̱ kakabha eti Bhayu̱daya bhadhedheluwe nakingia Paulo bhiyo; “Okubhala yako ka Yelusalemu nicuelie kau̱ musango ndia bhaku̱bi̱si̱be?” 10Paulo naki̱nsi̱ki̱aku̱ bhiyo; “Endindi nili kei̱soa koti̱ ndia Kai̱sali̱ kindia bhagbokiliani̱ cuelia musango. Kili na kima ndie nisobhi̱o ka Bhayu̱daya nesi̱ newe nku̱mi̱ oi̱bi̱o. 11Paulo nakingia Fesito eti kabha ninikoli̱ kima ndia akidhuwa ninigbokiliani̱ ku̱wa, kikikoma ku̱wa. No musango ndia Bhayu̱daya bhani̱bi̱si̱be kabha nali mbela, kalibe mindia ali na kilagilo sa pesi̱ami̱ku̱ ka bhakpa bhenjo andu̱lu̱ bhaniole. Ni̱ju̱li̱li̱ eti bhani̱hi̱se kindia Kai̱sali̱.”
12Fesito naladhaki̱ kubhueolu̱li̱abe ndibhabhi̱ kimuhabhulaga, naki̱nsi̱ki̱aku̱ bhiyo; “Nesi̱ oju̱li̱li̱ eti bhaku̱i̱se kindia Kai̱sali̱, nikilagilia eti bhaku̱i̱se kau̱.”
Paulo kei̱soa Agu̱li̱pa na Bbeleni̱ke
13Tolo nke nalakoli̱be Sali̱a Agu̱li̱pa na namaki Bbeleni̱ke bhai̱ya ka Kai̱sali̱ya mamikiliana Fesito. 14Nibhaladhaki̱ku̱ tolo mamadha andu̱lu̱ Fesito ndia aongabe musango ndia Paulo na sali̱a Agu̱li̱pa. Nakingia bhiyo; “Alibe muluku mehe mindia Feleki̱si̱ anduwa ka nkomo, 15ndie ni̱ya ka Yelusalemu, bhabhembi̱ bhangbeku ndibha Mambombi̱ na bhangbeku ndibha Bhayu̱daya bhamunyegela Paulo toli̱ nibhakinikunga eti nincuelie musango.” 16Nibhutolia eti kali ka kilagilo ndia Bhaloma cuelia nkpa musango ndia ketonganimbebe kei̱soa ndibha bhamunyegeli̱o na mu̱cu̱. 17Ndibha bhamunyegela Paulo ndia bhabi̱ka mehe nemi, tolo ndia adhabhiabe niniki̱li̱ki̱sa koti̱ toli̱ ninikilagilia eti bhambi̱ki̱seku̱ Paulo.
18Ndia bhatelema eti bhaonge musango ndia Paulo akoli̱o, bhakamuongabe zidhi nesi̱ neli̱li̱kana. 19Bhuai̱be yabhi̱ sani̱ ndia agbei̱be di̱ni̱ ndiabho ndia Bhayu̱daya na muluku mindia aku̱wa i̱naki Yesu mindia Paulo amuongabe eti alia nali̱ki̱. 20Nitangia ndie kikitoka olu̱li̱aga na i̱ba mazima toto ndia ali ka musango yoho, ninikimuolu̱li̱a Paulo kabha nabhi̱ kibhala yaki ka Yelusalemu cuelia kau̱ musango ndiaki. 21No Paulo ndia aju̱li̱li̱a eti bhamu̱i̱se kindia Kai̱sali̱ andu̱lu̱ acue musango ndiaki, nibhulagilia bhasilikale eti bhamu̱li̱ki̱se ka nkomo doi̱sa kindie nikitiniliaku̱ eti bhamu̱i̱se kindia Kai̱sali̱.
22Du̱mbi̱ sali̱a Agu̱li̱pa nakingia Fesito bhiyo; “Nikikabha nimuokiane muluku miyo emi nku̱mi̱.” Fesito naki̱nsi̱ki̱aku̱ bhiyo; “U̱ma okumuoka.”
Paulo nakionga na Sali̱a Agu̱li̱pa
23Tolo ndia adhabhiabe, Agu̱li̱pa na Bbeleni̱ke bhai̱ya toli̱ nibhakigodha na ngu̱ko ka kisika manyeta kindia bhakpa yabhasi̱dha-si̱dhanaga imamoti̱ na bhangbekua bhasilikale na bhakpa bhatua ngu̱ko ndibha ka tau̱ni̱ manyeta. Fesito nakibhulagilia bhasilikale eti bhamu̱i̱se Paulo ka ku̱sei̱. 24Fesito nakigia bhiyo; “Sali̱a Agu̱li̱pa na bhenu̱ poni ndibho bhuli mehe, miyo andiye muluku mindia Bhayu̱daya ka Yelusalemu na mehe ka Kai̱sali̱ya bhakikabha eti aku̱we. 25Nitakana muluku miyo ndia kakoli musango ndia akidhuwa nibhakimuola, no nesi̱ aju̱li̱li̱ eti bhamu̱i̱se kindia Kai̱sali̱ acue ndie musango ndiaki, ni̱ti̱ni̱ku̱ eti bhamu̱i̱se ka Loma. 26No kili na ndie nikimuhandikilia Kai̱sali̱ ndia agbei̱be musango ndia muluku miyo. Ni̱mbi̱ki̱si̱ Paulo kei̱soanu̱ na si̱ni̱ kei̱soa sali̱a Agu̱li̱pa andu̱lu̱ bhikidhakia olu̱li̱agaki, nibhe na ndie nikihandika. 27Kabhongi i̱sa nyankomo kindia Kai̱sali̱ ka Loma ndio okoani̱si̱ musango ndia akoli̱o.”
Attualmente Selezionati:
Bikoluwa ndia Bhakwenda 25: KWAMBA
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Wycliffe Bible Translators, Inc., 2025