Bikoluwa ndia Bhakwenda 24
24
Bhayu̱daya nibhakimunyegela Paulo
1Tolo tano nalakoli̱be, ngbekua bhabhembi̱ ndibha Mambombi̱ Anania ai̱ya ka Kai̱sali̱ya na bhangbeku bemoti̱ ndibha Bhayu̱daya imamoti̱ na muongi̱ kulungi mindia Bhayu̱daya i̱naki nandiye Telu̱tu̱lo, nibhakimunyegela Paulo kei̱soa Gavuna Feleki̱si̱. 2Ndia bhamueka Paulo, Telu̱tu̱lo nakitandika nyegelaki kei̱soa Feleki̱si̱ bhiyo; “Kusali̱a ndiako mabhonga aki̱pesi̱ dudhukana bhesu̱ Bhayu̱daya toli̱ okoli̱ kima mpiaka mamadha ka nsi yoho. 3Nanga yoho poni ndio okoli̱o, ntua ngu̱ko Feleki̱si̱ kidhedhelu̱ si̱ni̱. 4Kikabhi̱ dhakia bwile ndiako mamadha no kikakungako eti okiokianebe.
5“Kitakani muluku miyo nali nti̱ni̱ nsi̱si̱ ka Bhayu̱daya ka nsi yoho poni. Andiye mindia atelemi̱li̱ kpata ndia Bhanazaleni#24:5 Bhanazaleni Bhakpa yabhabhugiagaku̱ bhai̱ki̱li̱za ndibha Yesu mindia ka tau̱ni̱ ndia ka Nazaleti̱. 6toli̱ kingba nali kakabha zi̱nani̱sa Hekalo mawelikana nali kabi̱ki̱saku̱ Bhakpa ndibha kali Bhayu̱daya. 7Ki̱bhi̱ kibha nikincueli musango sigikilia ka kilagilo ndiasu̱ no Li̱si̱ya ngbekua bhasilikale abi̱ka na mani̱ si̱ni̱ nakikibhuwabe muluku minjo. Du̱mbi̱ nakilagilia eti ndibha bhamunyegela bhabi̱ke kei̱soako.#24:7 Bbai̱bbu̱li̱ ndietolo kali na nkala yoho. 8Komuolu̱li̱aga muluku miyo, uwe nku̱mi̱ oku̱i̱ba ndia adhu̱ nikimunyegeli̱.”
9Bhayu̱daya ndibhetolo nibhakigia eti poni ndia Telu̱tu̱lo aongi̱o ali mazima.
10Gavuna Feleki̱si̱ amuani̱sa Paulo sazi̱bi̱li̱ai̱be eti aonge. Du̱mbi̱ Paulo nakigia bhiyo; “Ni̱hi̱bi̱ nesi̱ odhaki̱ mwaka mamadha nokucu̱wa musango ka Bhayu̱daya ka nsi yoho, nidhedhelu̱ kwetonganabe kei̱soako. 11Uwe nku̱mi̱ oku̱i̱ba nesi̱ abhi̱ ndia kakolimbebe tolo komi̱ na bhali niniki̱dhi̱ ka Yelusalemu ka lami̱a Mambombi̱ ka ndabho ndiaki. 12Bhayu̱daya bhakanitakana ninili ka sani̱ na nkpa poni ka Hekalo kedha ninili ka tina nsi̱si̱ ka bi̱ya bhakpa ka Ndabho kindia Bhayu̱daya yabhalami̱li̱aga kedha kindietolo poni ka tau̱ni̱ manyeta. 13Bhakakitoka pesi̱a bwakai̱so sa musango ndia bhani̱bi̱si̱be. 14No nibhali̱ya eti nikimulami̱aga Mambombi̱ mindia bhatatasu̱ yabhamulami̱aga toli̱ nikidhetiliaga ka nesi̱yo ndia Yesu ndia bhakigiaga eti andi sa mbela. Ni̱hi̱ki̱li̱zi̱ kilagilo ndia Mambombi̱ ampesi̱a Musa na poni ndia ali ka kitabo ndia bhanabbi̱ bhahandika, 15toli̱ nili na nihila kindia Mambombi̱ bhia bhaluku bhehe ndia bhali nai̱ eti ada kibhabe hu̱mbu̱ka ndia bhenjo ndibha bhagbokiliani̱o na ndibha bhakagbokiliani̱. 16Toli̱ mulima ndiamo anitoli̱ eti nikoli̱ ka Mambombi̱ na bhakpa poni kima mabhonga.”
17Ndie nidhakia mwaka mamadha ni̱ni̱tu̱ki̱ ka Yelusalemu, ni̱si̱ki̱aku̱ ka i̱sa ka bhakpa mbangana sa gabia bhanako na bhembilia Mambombi̱. 18Ndibha bhaninyegeli̱o bhanitakana ka mulima-bala sa Hekalo ninilidhaki tamba. Yakabhi̱be bi̱ya bhakpa toli̱ bhakpa bhakabhi̱ ka tina nsi̱si̱. 19No Bhayu̱daya bemoti̱ tuka ka kyalo ndia ka Asi̱ya bhabhi̱be toli̱ bhagbokiliani̱ bhabho mehe nyegelami kabha nalibe musango poni ndia bhaki̱ni̱bi̱sabe. 20Kedha odhuwe bhaluku ndibha bhali mehe bhatuwe musango ndie nikola ka kwetonganabe ka ku̱sei̱ ndia Bhayu̱daya 21bhuai̱be kima moti̱ ndie nionga ninitelemi̱ kei̱soabho nikigia bhiyo; “Bhuninyegeli̱ lelu nanga nili na hi̱ki̱li̱za eti Mambombi̱ ada ki̱bhu̱hu̱mbu̱la bhenjo ndibha bhaku̱wa.”
22Du̱mbi̱ Feleki̱si̱ mindia abha nabhu̱i̱bi̱ kulungi bhakpa ndibha bhakidhetiliaga ka nesi̱yo ndia Yesu, nakitelemi̱sabe ku̱sei̱ injo. Nakigia bhiyo; “Nikicu̱waku̱ musango ndiako Li̱si̱ya ngbekua bhasilikale kabi̱ka.” 23Nakimulagilia ngbekua bhasilikale ki̱ku̱mi̱ eti ambi̱se Paulo ka nkomo no abhubhali̱sane bhabhotuaki zi̱baki na paki ndia akikabha.
24Tolo nke nalakoli̱be, Feleki̱si̱ ai̱ya na nkali̱ mindiaki Du̱lu̱si̱la, Mu̱yu̱daya. Naki̱nti̱ki̱sa Paulo andu̱lu̱ bhamuokiane ka ongabe ndia agbei̱be hi̱ki̱li̱za ka Ki̱li̱si̱to Yesu. 25Paulo ndia aongabe gbokiliana, kwegendia na tolo ndia Mambombi̱ ada kibhucuelia bhakpa musango, Feleki̱si̱ atiya nakingia bhiyo; “Odhakilie menjo toli̱ oye. Kibha na bwile, nikitodha ekako.” 26No Feleki̱si̱ naye abhi̱ na nihila eti Paulo aki̱mpesi̱a mbangana du̱mbi̱ naki̱nti̱ki̱sa dou̱ mamadha onga naye. 27Mwaka bhali nalakoli̱be, Posio Fesito asi̱ki̱a ndiye ka nga Feleki̱si̱ no Feleki̱si̱ abhi̱ kakabha eti Bhayu̱daya bhadhedheluwe toli̱ bhai̱ye namusa na si̱maki, du̱mbi̱ nakinduwa Paulo ka nkomo.
Attualmente Selezionati:
Bikoluwa ndia Bhakwenda 24: KWAMBA
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Wycliffe Bible Translators, Inc., 2025
