ရိမ့ၤ 15
15
တဲၤမဲၤမီၤပၠၤအသး
1ဝၤအခဳးအအါအီၣ်တစီာ်နဳၤ, မီၤခီၣ်သးဒီအံာ်အခဳးအအါ တအီၣ်နီးတစီာ်နဳၤ. ဝၤကိအပွဲၤမဲၤကမဳၤထာ်နံၤအကဲတၱၢ်ကဲတဲၤတစီာ်, 2ကၱာ်မဲၤဇဳၤစဲာ်စာ်ဘိထဲၢ်စကဖၱထာ်ပီၢ်ခရၱာ်ဖဳးအခဳးဘါအါဓဳၤ တစီာ်နဳၤ. 3ခရၱာ်နဳၤစတကမဳၤအံာ်စနံၤခံလီၤနီး, စာ်ဘိစဲာ်စါထံ ဒီၣ်, “ပၠၤအတဲၤကီၤဆဲလဲၤဝဲၢ်သံလၤတ့ၢ်ယလီၤ.” 4တဲၤကိအမဳၤ ဒဳစဲာ်စါထံအပူၤနဳၤ မၱာ်အဘဲာ်ဝှ့းလၤဒဳတဲၤသဲာ်လှိဝၤအနံၤခံ, စာ်ဘိထဲၢ် ဝၤကအီၣ်ပီၢ်တဲၤဆးရှံအံာ်ဒဳတဲၤဝှ့းလၤစါထံ အတဲၤအံာ်ဝၤတဲၤသဳးဇိၤ သးဇိၤကၱာ်တဲၤအံာ်ခဳးအံာ်အါအစဲနဳၤ. 5ကၱာ်ကဘၱာ်စဲာ်, ထဲၢ်အမၱာ် တဲၤသဳးဇိၤသးဇိၤကၱာ်တဲၤအံာ်ခဳးအံာ်အါအကဳာ်ခွံးတပွဲၤကမဲၤဇဳၤဒီဧဲၤသံ စာ်ဘိထဲၢ်သံကအီၣ်သမိပျဳာ်ဒဳ တဲၤယံၢ်တဲၤဒွါအပူၤဒဳတဲၤစာ်လှိစာ်ဒီ ယ့ၣ်ရှူးခရၱာ်, 6စာ်ဘိထဲၢ်သံလဳစါစဲးကကီၢ်အံာ်ထါအံာ် ကဘၱာ်စဲာ်ကၱာ်ဝၤဘၱာ်စဲာ်ယ့ၣ်ရှူးခရၱာ်အပာ်, ဒဳသံသးတမဲလီၤအပူၤနဳၤ.
တဲၤသးလဳၢ်သးလၤအံာ်အဝၱၤအကဲဒဳပွဲၤသူကူာ်ဖဳးအနံၤခံ
7မဲၤကနဳၤဒဳၣ်, မဲၤအံာ်လှဲးပီၢ်လၢ်ဝၤတပွဲၤကၱာ်တပွဲၤဒဳ ကဘၱာ်စဲာ်အတီၤအသ့းအနံၤခံ, အစာ်ဘိခရၱာ်မဲၤအံာ်ကဲၤသံအခီနဳၤတကၱာ်. 8မၤနဲၢ်ဒဳၣ်, ခရၱာ် ကဲာ်ထာ်ပၠၤယူဒၤဖဳးတစီာ်အခၱအပွဲၤစာ်ဘိထဲၢ်စကဒဲလၱၢ်ထာ်ကဘၱာ်စဲာ် မၱာ်အအီၣ်အံာ်အတဲၤယၱၢ်ဘဲာ်, စာ်ဘိထဲၢ် စကမဲၤမှ့းမဲၤကျဳၤတဲၤထဲၢ်ကဘၱာ်စဲာ်ဒီဆးတီၤလီၤ ဝၤဖံဝၤဖူလှ့းမဳၤတစီာ်, 9ကၱာ်စကမဲၤဇဳၤ ပွဲၤသူကူာ်ဖဳးတစီာ်အကထါထာ်အံာ် ကဘၱာ်စဲာ် ဒဳစတဲၤသးခီၣ်ဝဲၤအစဲနဳၤ. အစာ်ဘိတဲၤဝှ့းလၤ အီၣ်,
“အယဳၤအခဳးစဲ, ယကထါထာ်အံာ်ကီနဲၤဒဳပွဲၤသူကူာ်ဖဳး တစီာ်အလှီမီၢ်
ကၱာ်သါပိၢ်အံာ်ကီနမံၤ,” နဳၤ.
10ဒဳအလဝ့ၤတချဳးအဒီၣ်ဝ့ၤ,
“သးလဳၢ်သးလၤပျဳာ်ပီၢ် ကဘၱာ်စဲာ်အပၠၤခွံဖဳးတစီာ်နဳၤ.”
11ကဒီသဳကျၤတကျၤဒီၣ်ဝ့ၤ,
“ပွဲၤသူကူာ်ဖဳးလဳစါစဲးကထါထာ်အံာ်ဒီဧဲၤ,
ဘၱာ်စဲာ်ကၱာ်ပၠၤလဳစါစဲးကသါပိၢ်အံာ် ဒီဧဲၤစမံၤ.”
12ဝံယရှါယၤဒီၣ်ဝ့ၤကဒီ,
“ယံးရှဲအခၣ်ဝံၤကပီးထာ်ခီ,
စကဝဲၢ်ထဳးအူအံာ်ကီပွဲၤသူကူာ်ဖဳးတစီာ်
စဲာ်တစီာ်ကဆးရှံအံာ်ကီစဲာ်.”
13တဲၤဆးရှံအံာ်အဘၱာ်စဲာ်ကလ့ၤ အံာ်ဒီဧဲၤသံ တဲၤသးကနၢ် အံာ်ကၱာ်တဲၤစဳးတဲၤမီၤ ဒဳသံတဲၤဘူၣ်အပူၤစာ်ဘိထဲၢ်သးစါထံကဖၱးကဲဘဲာ် တဲၤအစဳကျဳၤသံတဲၤဆးရှံတစီာ်နဳၤ.
စီၤပီလူးအတဲၤဝှ့းလှၱထာ်ဖျီထာ်
14ယသဲပူၤဝ့ၤတစီာ်, ယတဘူၣ်သံနီးတဘဲာ်နီး, မၱာ်ယသၱာ် ဟဲ လၤတံၤလၤဆ့းထဲၢ်သံတဲၤသးအဲးနံၤမၱာ်အအဲးဇၱၢ် အဲးဇိၢ်တခီ, သံနံၤဘဲာ်တဲၤသၱးဒိးသၱာ်ဟဲကၱာ်သံအံာ်ကဳအံာ်ကၠးဇၤ ဇၱၢ်လၢ်ဝၤနဳၤ. 15ယဝှ့းနံၤသံစဲာ်ကၱာ်ဒီၣ်ဆးဆိးကဲၤသံတပျာ်ပျာ်မၱာ်အကမဲၤသဲထာ် က့ၤသံတဲၤကမဳၤဒဳကဘၱာ်စဲာ်အံာ်လၤနံၤကဲၤယဲၤအဟိအယီၤအခဳးအအါ နဳၤ. 16စလဲၢ်ထာ်ကဲၤယဲၤယ့ၣ်ရှူးခရၱာ်အပၠၤလှူၣ်တဲၤအဓဳၤ ကၱာ် ယကမဲၤအံာ် ဘဲာ်ပၠၤလှူၣ်တဲၤအဓဳၤအတဲၤဖၱးတဲၤမဲၤဒဳတဲၤလ့ၤအံာ်လၤနံၤ ပွဲၤသူကူာ်ဖဳးတစီာ်ကဘၱာ်စဲာ်အတဲၤသးလဳၤသးလၤအံာ်အဝၱၤအကဲ ကၱာ် အမဲၤဖၱထာ် စဲာ်တစီာ်တဲၤလှူၣ်ထာ်အံာ်အမီၤဖၱးနံၤဒဳအဘဲာ်မဲၤစါထံထဳ ကၱာ် သးစါထံတစီာ်နဳၤ. 17ပျဳာ်ပျဳာ်ကၱာ်ယ့ၣ်ရှူးခရၱာ်ယမဲၤကဲာ် ထာ်ထဳကဘၱာ်စဲာ်အနံၤခံ ပွ့တမံၤအခဳးအစဲယဖၱးဓဳၤဖၱးမူၤတပွဲးယန့ၤ, ယကမဳၤဒဳၣ်. 18ယသးအဲးဒီၣ်မၱာ် စာ်ဘိထဲၢ် ပွဲၤသူကူာ်ဖဳးတစီာ် ကက့ၤနံၢ်ပီၢ်ဝၤကျဲနဳၤ, ခရၱာ်မဲၤအံာ်ကဲၤယတဲၤဒီၣ်တဲၤဆးကၱာ်ယတဲၤဖၱး တဲၤမဲၤ, 19ဒဳသးစါထံအစိသလဲအပူၤ, တဲၤပီၤတဲၤပၤကၱာ်တဲၤစီး ကျၱးစီးရှဲတစီာ်အခဳးအစဲနဳၤ. စာ်ထာ်ဒဳယ့ၣ်ရူၤရှလ့ၣ်အူးထိဓဳ အံးလူၤရံ ကူးနဳၤ, ယဒီထိးဒီတလဲၤထဳ တဲၤသးလဳၢ်သးလၤအံာ်အဘဲာ်ကၠးခရၱာ်အဝၱၤအကဲပွ့ယကဲာ်ထာ်အသရ့နဳၤ. 20ယပဲၢ်ထာ်ကဲၤယသး အကဒီထိးကီတဲၤသးလဳၢ်သးလၤအံာ်အဝၱၤအကဲဒဳအတသၱာ်ဟဲဘဲာ်ခရၱာ်အမံၤ နီးတစီာ်အီၣ်အလ့ၤအကျဲးနဳၤ. အနဳၤမၱာ်ယတသးအဲးပြးထာ်တဲၤဒဳ ပၠၤ ဘီာ်ထာ်ဝှါကဲၤအကါဒီခဳးနီးအစဲလီၤ, ယတဲၤသးအဲးနံၤမၱာ်အကမဲၤဖၱထာ် 21စဲာ်စါထံအတဲၤဒီၣ်,
“ပၠၤအတသၱာ်ဟဲစဲာ်နှၱနီးတစီာ်ကစာ်ထၱးစဲာ်
ကၱာ်အတဆီးခ့န့းဘဲာ်စဝၱၤစကဲနှၱနီးတစီာ်ကသၱာ်ဟဲကီစဲာ်,” နဳၤ.
စီၤပီလူးအတဲၤကဳတဲၤကၠး
22အဝၱၤအကဲအယဳၤအခဳးအစဲ, ယတဲၤလ့ၤပိာ်ဒဳထၱးသံနီး အီၣ်ယၱၢ်အီၣ်ကၠးကဲၤ, 23မၱာ်ယသးအဲးအကလ့ၤ ထၱးသံနဳၤအီၣ် ကဲၤအဒ့ာ်အလှဲပွ့တမံၤတခီ. မၱာ်ခဳနူၤယဳၤယမီၤ မဲၤတဲၤဘ့ယဳၤတအီၣ် ပ့ၤ တမံနီးအခဳးအစဲ, 24ယဆးရှံ အံာ်အကစာ်ထၱးသံဘ့ယလ့ၤဒဳ စပၤနံအက့ၤနဳၤ, ယကအီၣ်ကိာ်ကီသံကါတဒဳၣ်တဆး. ယဆးရှံအံာ်ယကလ့ၤယကျဲးထိအကူဓူၤဒဳသံတဲၤသဲလ့ၤဝၱၤဝၱၤမီၤမီၤယဲၤအပူၤနဳၤ. 25အအူဆူးတမံၤမၱာ်, ယကလ့ၤအံာ်ဘဲာ်ပၠၤအစါထံဒဳယ့ၣ်ရူရှလ့ၣ်အူး ပူၤနဳၤတစီာ်ပၱဒဳပၱဆးတကၱာ်, 26မၤနဲၢ်ဒဳၣ်, မၤက့းဒနံကၱာ် အဃါယၤက့ၤဘဲလါထဳအသးအကသဲလ့ၤတဲၤမဲၤဇဳၤ, ဒဳပၠၤစါထံအကျဲ, အဆဲးညဲဖဳးအအီၣ်ဒဳယရူၤၡလ့ၣ်အူးပူၤတစီာ်အစဲနဳၤ. 27အမၱာ် နှဲးနှဲးတဲၤသဳးလှီသးလှီအတဲၤမဲၤလှူၣ်, မၤနဲၢ်ဒဳၣ်, စမၱာ်တဲၤဆါက့ၤအစွ့ တမဳၤ, ပွဲၤသူကူာ်ဖဳးထဲၢ်အနံၤဘဲာ်ကိာ်ကဲၤအဆဲးညဲဖဳးတစီာ်သဳးသး အတဲၤတစီာ်နဳၤမီၤမဲၤဇဳၤက့ၤစဲာ်တစီာ်ဒဳဖ့းဟၱးအတဲၤတခီနဳၤ. 28မဲၤကနဳၤဒဳၣ်, ဘယလ့ၤအံာ်လၤဝှါတဲၤထူးပျဳာ်ဘဲပျဳာ်တစီာ်နဳၤဒဳၣ်, ယကလ့ၤပိာ်ဒဳထၱးကီသံဒဳယလ့ၤစပၤနံယက့ၤအခၠၱးနဳၤ. 29ယသၱာ်ဟဲ တပွဲးဘ့ယဓဳၤထၱးသံနဳၤ, ယကလ့ၤအံာ်ကီခရၱာ်အတဲၤဟိးဝၱၤ ဟိးမီၤအီၣ် အဲးအီးအီးဒဳး.
30ပရၤဆါယတၤမီၤသံ, အဳသဲပူၤဝ့ၤတစီာ်, ဒဳဘၱာ်စဲာ် ယ့ၣ်ရှူးခရၱာ်ကၱာ်သးစါထံအတဲၤဘးလှိအပူၤ, မဲၤဇဳၤပီၢ် ယဲၤဒဳတဲၤ ဘဲာ်ရှဳအကျဲတဲၤသဘဲထာ်ယနံၤခံဒဳကဘၱာ်စဲာ်အလှီမီၢ်နဳၤ. 31သဘဲထာ်ပီၢ်စာ်ဘိထဲၢ်ယကလှိထာ်ပီၢ်ဒဳ အတဘူၣ်တဲၤနီးအအီၣ် ဒဳ ယူဒၤက့ၤအစူးခီးပူၤနဳၤ ကၱာ်တဲၤမဲၤဇဳၤ ယလ့ၤအံာ်တစီာ်နဳၤပၠၤစါထံ အအီၣ်ယ့ၣ်ရရူရှလ့ၣ်အပူၤတစီာ်ကနံၤဘဲာ်ကီနဳၤ. 32ကဘၱာ်စဲာ် တဲၤသးအဲးနံၤကအီၣ်မၤဒဳၣ်, ယကဆီဓူၢ်ဆီဒဲမီၤမီၤဝၱၤဝၱၤကဘဲာ်တပွဲး သံကါ. 33ကဘၱာ်စဲာ်အတဲၤစဳးတဲၤမီၤကအီၣ်ကိာ်ဒီဧဲၤသံကါ, အၤမ့ၣ်.
Geba Roman New Testament © Bible Society of Myanmar, 2021.