ရိမ့ၤ 16
16
တဲၤနှူဆဲးကၱာ်တဲၤသဘဲ
1ဝၤပၱးကီနီၢ်ဖံဘ့ၤထဲၢ်က့ၣ်ဃရ့းအတဲၤအီၣ်ပျဳာ်အသဲၣ်ထီး နဳၤယအံာ်လၤစဲာ်သံစူးခီးပူၤအကစာ်အံာ်ခွဲးအံာ်စဲာ်. 2ဒဳဝၤဘၱာ်စဲာ် အမံၤအပူၤဖၱးနံၤပီၢ်စဲအစာ်ဘိအတး နံၤပၠၤစါထံတစီာ်နဳၤကၱာ်မဲၤပ့ထာ်ပီၢ် စတဲၤသးအဲးနံၤတစီာ်. စစာ်အံာ်ခွဲအံာ်အီၣ်အဲးအီးအီးကဲၤ ပၠၤထဳတဳၤလၤ ယဲၤနဳၤ.
3ယနှူဆဲးတပွဲးနီၢ်ပြံစကံးလၤကၱာ်စီၤအကူလၤ, ယခီကလဳၢ် ဒဳယ့ၣ်ရှူးခရၱာ်ပူၤ, 4ထဲၢ်အခးသံအန့ၤယသးသမိအနံၤခံတစီာ် နဳၤ. အကသၱာ်ဟဲထာ်က့ၤစဲာ်တစီာ် မၱာ်တဘဲာ်ထ့ယဲၤတပွဲၤလီၤနီး, မၱာ် တဲၤအီၣ်ပျဳာ်အီၣ်ပွဲၤသူကူာ်ဖဳးအတၱၢ်အပျဲးလဳစါစဲးပာ်ပာ်. 5နှူဆဲးတပွဲးတဲၤအီၣ်ပျဳာ်ဒဳအလၤတ့ၢ်ပျဳာ်ဒဳစဲာ်တစီာ်အရှံၣ်ပူၤနဳၤနဳၤ.
ယသဲလ့ၤယတဲၤဆဳဝၱၤဆဳမီၤဒဳယခီကလဳၢ်ယဘဲာ်လီၢ်စီၤအ့ပဲန့းတူး, ထဲၢ်အမၱာ်ပၠၤအဘူၣ်ခရၱာ်အအူဆူးကဓူ ဒဳအၤစံက့ၤအပူၤတပွဲၤအအီၣ် နဳၤ. 6ယနှူဆဲးတပွဲးနီၢ်မၤရၱထဲၢ်အမဲၤဆီးဝဲဘဲသးသံနံၤခံတဲၤ တပွဲၤ နဳၤ. 7နှူဆဲးဒီးအပျဲၢ်အဘီၣ်စီၤအၤဒြနံကူးကၱာ်စီၤယူၤနံ, ယသီၣ်ကၱာ်ယခီထဲၢ်တဲၤကၱတၱၢ်ဖဳးအဖၱထာ်အအူဆူးကဲၤယဲၤခရၱာ်ဖဳး တစီာ်နဳၤ.
8ယနှူဆဲးဒီးစီၤအၣ်ပျံ, ယသီၣ်ဒဳကဘၱာ်စဲာ်အမံၤအပူၤ တပွဲၤ, 9နှူဆဲးဒီးစီၤအူၢ်ဘါနူးအမဲၤပျဳာ်ယဲၤတဲၤ မဲၤဒဳခရၱာ်အမံၤ အပူၤ, ကၱာ်ယခီကလဳၢ် စီၤစတါဃူၣ်ပာ်ပာ်. 10နှူဆဲးဒီၣ် ယသီၣ်စီၤအၤပ့းလ့ၣ်ထဲၢ်အခးဘဲာ်ကဲၤခရၱာ်အနံၤခံပွ့တမံၤတပွဲၤ, ပၠၤကိအပွဲၤအအီၣ်စီၤအရံးစတီးဘူလူး အရှံၣ်ပူၤတစီာ်နဳၤ. 11ယခီဒဳဖဳးစီၤဟ့ၤရဒံ, စီၤနၢ်ကံစူးအရှံၣ်ပူၤဖါပူၤဖဳးအဘဲာ်ကၠးကဘၱာ်စဲာ် တစီာ်နဳၤ.
12နှူဆဲးပီၢ်နီၢ်တြူဖဲၤနၤကၱာ်နီၢ်တြူဖဳးစၤထဲၢ်အမဲၤကဲၤ ဘၱာ်စဲာ် အနံၤဖံပွ့တမံၤတစီာ်နဳၤ, ယသီၣ်နီၢ်ပ့ၢ်စံ ထဲၢ် အမဲၤဆိးထဳ ဘၱာ်စဲာ်အနံၤခံတဲၤတပွဲၤနဳၤ. 13စီၤရူဖူး, အဘဲာ်ရိၤ ကဘၱာ်စဲာ် အပွဲၤဇဳၤတပွဲၤနဳၤကၱာ်စမဳၤထဲၢ်အမၱာ်ယမဳၤတပွဲၤနဳၤ. 14ယနှူဆဲးတပွဲးစီၤအစူၣ်ကြံတူး, စီၤဖျ့ကီၣ်, စီၤဟ့ၣ်မၤ, စီၤပၤတြီးဘၤ, စီၤဟ့ၣ်မ့ၣ်ကၱာ်သဲပူၤဝ့ၤအအီၣ်ကိာ်စကါလဳစါစဲး, 15စီၤဖံၤလလီး ကူး, ယူၤလံကၱာ် နၤရ့းကၱာ်စပၱးကီ, စီၤအီးလူၣ်ပၤကၱာ်ပၠၤစါထံ အအီၣ် ကိာ်စကါလဳစါစဲး.
16နှူဝံာ်လှဲးပီၢ်လၢ်ဝၤဒဳ တဲၤနှူဝံာ်အစါထံအပူၤနဳၤ. ခရၱာ်အတဲၤအီၣ်ပျဳာ်လဳစါစဲးနှူဆဲးလ့ၤတပွဲးသံကိအပွဲၤနဳၤ.
စီၤပီလူးအတဲၤနှူဆဲးအကဓူၤလါ
17ယတၤမီၤသံ, သဲပူၤသဲဝ့ၤတစီာ်. ဝဳၤအံာ်ပီၢ်သံ န့ၤဒဳအကမဲၤကီၤသီကဳၤရီၤတဲၤ, အမဲၤပၤမဲၤဆဲသံဒဳ သံတဲၤသိၣ်တဲၤသီတစီာ်အီၣ် နဳၤ. ဆီးခ့န့းပီၢ်စလ့ၢ်. 18ပၠၤအယဳၤတစီာ်တဘဲာ်ယ့ၣ်ရှူးခရၱာ် အဇိၤအပွဲၤနီး, မၱာ်စတဲၤသးအဲးနံၤအဇိၤအပွဲၤကမဲၤထဲၢ်နံၤဝံနံၤဝၤပၠၤ အဘၱာ်အယူၢ်တစီာ်အတဲၤကမဳၤဒဳယတဲၤတရၤအကျဲနဳၤ. 19သံတဲၤဘူၣ်တဲၤနဲၢ်ခရၱာ်အခဳးနဳၤပၠၤသၱာ်ဟဲကိလၢ်လၢ်တဲၤအမဲၤ သးလဳၢ် သးလၤအံာ်ယဲၤသံခဳးသံစဲ. ယဆးရှံအံာ်သံကဇၤကပျၤအဘဲာ်ကၠးတဲၤ အအဲးကၱာ် အီၣ်လှိအီၣ်လၤကၱာ်အတဲၤကမဲာ်ဒဳအဘဲာ်ကၠးတဲၤကၱကဲာ်နဳၤ. 20တအီၣ်ယၱၢ်အီၣ်ကၠးနီး, ကဘၱာ်စဲာ်ကတီၤပြၱးကီမဳၤဒဲးလၱး ဒဳ သံခၣ်အၱသးလဲၢ်နဳၤ.
ဘၱာ်စဲာ်ယ့ၣ်ရှူးခရၱာ်အတဲၤစဳးတဲၤမီၤကအီၣ်ကိာ်ဒီဧဲၤသံကါ.
21စီၤတံၤမသ့းထဲၢ်အမဲၤပျဳာ်ယဲၤတဲၤမဲၤတပွဲၤနှူဆဲးလ့ၤသံ, ကၱာ်ဒီယခီယခဲးစီၤလူကံၤ, စီၤယါစီၣ်, ကၱာ် စီၤစိပၤတြူး ပာ်ပာ်.
22ယဲၤ, စီၤတ့ၢ်တံၤ, ထဲၢ်အဝှ့းစဲာ်အယဳၤတပွဲၤနှူဆဲးသံဒဳ ဘၱာ်စဲာ်အမံၤအပူၤ.
23စီၤကါယူးထဲၢ်အအံာ်က့ၤစာ်က့ၤယဲၤတပွဲၤကၱာ်တဲၤအီၣ်ပျဳာ် အလၤတ့ၢ်ပျဳာ်လၢ်ဝၤဒဳစရှံၣ်ပူၤတစီာ်နှူဆဲးသံစီၤအ့ ရၤစတူးထဲၢ်အစာ် အံာ်ဟိမူၤပွ့ၤတပွဲၤနှူဆဲးသံကၱာ်ဝၤသဲပူၤဝ့ၤစီၤ ကူအၢ်တူးမၱာ်မၱာ်ကနဳၤလီၤ လီၤ. 24(ဘၱာ်စဲာ်ယ့ၣ်ရှူခရၱာ်အလှူၣ်အတါကအီၣ်ကိာ်သံကါ ကိအပွဲၤနဳၤ.)
တဲၤထါထာ်အံာ်
25တဲၤဓီၤတဲၤသ့းကဘဲာ်ဒီဧဲၤစဲာ်ထဲၢ်အအံာ်လၤ နံၤသံတဲၤခဳး တဲၤအါ အကအီၣ်ကိာ်တဲၤသးလဳၢ်သးလၤအံာ် အဝၱၤအကဲအစာ်ဘိယဒီ ထိးဒီတဲၤလဲၤနံၤကဲၤသံယ့ၣ်ရှူးခရၱာ် ထဲၢ်တဲၤအီၣ်ဟူၣ်အအီၣ်ဟူးကဲၤလှ့ အဇိၤအခဲပွ့တမံၤတပွဲၤနဳၤ, 26မၱာ်ခဳနူၤယဳၤ, အလှၱထာ်ဖျီထာ်ထဳဒီ ဝံအတဲၤဒီၣ်သၱာ်ဟဲအစဲ ကၱာ်အစာ်ဘိကဘၱာ်စဲာ်အအီၣ်လၤထူလၤပျဳၤ အတဲၤမှဲးလၤအီၣ်နဳၤ, အကဘဲာ်ဒီၣ်အူဒီဆးဘဲာ်ကီပွဲၤသူကူာ်ဖဳးတစီာ်ကဘူၣ်ကၱာ်ကဆီးခ့န့းပီၢ်နဳၤ.
27ကဘၱာ်စဲာ်ထ့တပွဲၤထဲၢ် အအီၣ်ကၱာ်အတဲၤဇၤတဲၤပျၤ လဳစါစဲးနဳၤ ကဘဲာ်ဒီဧဲၤ တဲၤဓီၤတဲၤသ့းသဲာ်ယိလၤထူလၤပျဳၤ. ပဲၢ်ဓီၤပဲၢ်သ့းပီၢ် စဲာ်ဒဳယ့ၣ်ရှူခရၱာ်အမံၤအပူၤနဳၤသဲာ် ယိလၤထူလၤပျဳၤ. အၣ်မ့ၤ.
Geba Roman New Testament © Bible Society of Myanmar, 2021.