ရိမ့ၤ 14
14
စံးရးမဲးပၠၤမဲး
1ပၠၤတပွဲၤပွဲၤအတဲၤဘူၣ်ကမှ့းမၤဒဳၣ်, ဖၱးနံၤမီၤမီၤ ဝၱၤဝၱၤပီၢ် စဲာ်. ပရၤဆါဒဳစဲာ်တစီာ်အတဲၤကမဳၤကမၢ်အစဲယၱၢ် ဘဲာ်ခဳးကါပီၢ်မဲးစဲာ်မဲး. 2ပၠၤအီၣ်အမဳအမဳၤလီၤပွ့တစီာ်စီာ်အၣ်တဲၤဟၱးတဲၤဘးအမဳအမဳၤ, ကၱာ်တစီာ်စီာ်အတဲၤဘူၣ်က့ၤကျၢ်ပွ့စတအၣ်ဘူၣ်တဲၤဟၱးတဲၤဘးတမံနီး, မၱာ်ဟါသူးဘၣ်လှဲာ်လီၤနဳၤ. 3အအၣ်တဲၤဟၱးတဲၤဘးတစီာ်တတီၤ ပံၤယံၢ်လၤဘဲာ်ပွဲၤသးဖဳတစီာ်နဳၤနီး, အလဝ့ၤတခီမၱာ်ပွဲၤသးဖီ တစီာ်တစံး ရးဖးမ့ဘဲာ်အအၣ်တဲၤဟၱးတဲၤဘးတစီာ်နဳၤနီး. မၤနဲၢ်ဒဳၣ်, ကဘၱာ်စဲာ် လဲၤခး ထဳကဲၤစဲာ်တစီာ်. 4သံတစံးရးပၠၤအလဝ့ၤအဇိၤအပွဲၤနီၤ, စအီၣ်မှ့းအီၣ်ကျဳၤမၱတမၱးနီးလၤခူးလၤဓ့ၢ်နဳၤမၱာ်အဘဲာ်ကၠးစဘၱာ်စဲာ်လီၤ. စကအီၣ်မှ့းအီၣ်ကျဳၤတပွဲး, မၤနဲၢ်ကဘၱာ်စဲာ်မဲၤဆီထဳးဇၤတပွဲးစဲာ်.
5ပၠၤတပွဲၤပွဲၤအမူၤနံၤကဝၱၤကစါဒဳၣ်လံပၠၤအလဝ့ၤအဲကၱာ် အလဝ့ၤတပွဲၤအတဲၤကမဳၤအပူၤနဳၤမၱာ်လဳစါစဲးမၱာ်အဝၱၤ အစါယါသဳးသဳး လီၤဒဳၣ်, စအီၣ်ဒီဧဲၤစဲာ်တစီာ်အစာ်ဘိစတဲၤကမဳၤအဓ့နဳၤ. 6ပၠၤအအီၣ်အံာ်လၤဓူၢ် မူၤနံၤစါထံတပွဲၤမၱာ်မဲၤတပွဲးအစာ်ဘိစလဲၢ်ဒဳလဲၢ်ယး ကဘၱာ်စဲာ်နဳၤ. အအၣ်တဲၤဟၱးတဲၤဘးတပွဲၤမၱာ်မၱာ်မဲၤကဲၤကနဳၤလီၤလီၤ. မၤနဲၢ်စမၱာ်အသၱာ်ဟဲထာ်က့ၤကဘၱာ်စဲာ်တပွဲၤပွဲၤနဳၤ, အဒူၣ်တဲၤဟၱးတဲၤ ဘးတပွဲၤမၱာ်အလဲၢ်ဒဳလဲၢ်ယးကဘၱာ်စဲာ်ကၱာ်အသၱာ်ဟဲထာ်က့ၤကဘၱာ်စဲာ်. 7ဝၤတပွဲၤတပွဲၤလၤဓူၢ် အတဲၤ အီၣ်ကၱာ်အတဲၤသံမဲၤနံၤဇၤပၠၤ အလဝ့ၤအနံၤခံတဲၤပွ့တမံၤ, 8“ဘ့ာ်မ့ဝၤအီၣ်သမိဒဳၣ်, ဝၤအီၣ် ဘၱာ်စဲာ်အနံၤခံ, ကၱာ် ဘ့ာ်မ့ဝၤသံဒဳၣ်, ဝၤသံဘၱာ်စဲာ်အနံၤခံ, စာ်ဘိထဲၢ် ဝၤတဲၤအီၣ်ကၱာ်ဝၤတဲၤသံအပူၤဝၤကမၱာ်ပီၢ်ကဘၱာ်စဲာ်အအဲနဳၤ.” 9အယဳၤမၱာ်အဒဲလၱၢ်ခရၱာ်သံကၱာ်စထာ်ပဳၤက့ၤစာ်ဘိထဲၢ်စကမၱာ်ပီၢ် ပၠၤသံ ကၱာ်အအီၣ်တစီာ်အဘၱာ်စဲာ်နဳၤ. 10မဲၤကနဳၤအခဳးအစဲ, သံကတစံးရးဘဲာ်သံသဲပူၤဝ့ၤတပွဲၤနီး, မၱာ် တမၱာ်နီးထဲးကဲထဲးအိးဘဲာ်စဲာ် နီးအစာ်ဘိသံမဲၤနဲၤနီၤကဲၤနဳၤနီး. ဝၤကိပွဲၤကဆီထဳးအီၣ်ဘဲာ်ကီဒဳ ကဘၱာ်စဲာ်အတဲၤစံးရးအနၤအလှီမီၢ်, 11စာ်ဘိစဲာ်စါထံဒီၣ်နဳၤ,
“ဒဳယဲၤမၱာ်ကဘၱာ်စဲာ်ထဲၢ်အအီၣ်သမိ,
ပၠၤကိအပွဲၤကဓဳၢ်နှဳလါဘဲာ်ကီယလှီမီၢ်,
ပျၱၤကိအဘီကထါထာ်အံာ်ကီကဘၱာ်စဲာ်နဳၤ.”
12မဲၤကနဳၤဒဳၣ်, ဝၤတပွဲၤတပွဲၤလၤဓူၢ်ကဒဲလၱၢ်ထာ် ဘဲာ်ကီအန့ၤဒဳကဘၱာ်စဲာ်အလှီမီၢ်နဳၤ.
မဲၤလၤခူးမဲးနသဲပူၤဝ့ၤမဲး
13သရိသံကစံးရးလှဲးလၢ်ဝၤအစၱးစၱးအထွဲးထွဲးနဳၤ, သံ ဧဳၤ အံာ်ဘဲာ်သံန့ၤ, သံတမၱာ်ပ့ၤပၠၤလဝ့ၤအနံၤခံတဲၤထဲသကူကၱာ် တဲၤလၤခူး လၤတကျဳနီးနဳၤ. 14ယသၱာ်ဟဲလၤတံၤလၤဆ့းတပွဲးထဲၢ်စယၱၢ်ဘဲာ် ဘၱာ်စဲာ်ယ့ၣ်ရှူးအနံၤခံတဲၤအရါနဳၤ, အပျၱအစါလီၤ. မၱာ်ပၠၤတပွဲၤပွဲၤအတဲၤ ကမဳၤအပူၤ, တဲၤအၣ်တဲၤအီတမံၤမံၤကတရူမၤနီးဒဳၣ်, အမၱာ်တပွဲး ယနံၤခံ အတပျၱတစါနီး. 15သံတဲၤအၣ်တဲၤအီကမၱာ်မၤသံသဲပူၤ ဝ့ၤအနံၤခံသဳးကဲသးကဲဒဳၣ်, တဲၤဘဲာ်လီၢ်ကတသိထိးဇၤတပွဲးသံနီး. သံ တဲၤအၣ်တဲၤအီကမၱာ်မၤပၠၤထဲၢ်ခရၱာ်သံနံၤခံကဲၤတပွဲၤပွဲၤအတဲၤလၤခူး ဒဳၣ်, သံတအီၣ်လှိအီၣ်လၤဇၤမဲၤတပွဲၤနီး. 16သံတဲၤမဲၤအံာ်တရၤ ဇါဘဲာ်တဲၤအံာ်လၤနံၤသံတစီာ်နီး. 17မၤနဲၢ်ကဒီၣ်ဓဳၤဒဳၣ်, ကဘၱာ်စဲာ် ထံက့ၤတဘဲာ်တဲၤအၣ်တဲၤအီနီး, မၱာ်တဲၤတၱၢ်တဲၤမှး ကၱာ်တဲၤစဳးတဲၤမီၤ, တဲၤသးခူသးကနၢ်အံာ်ထဲၢ်သးစါထံအံာ်လၤကဲၤဝၤနဳၤ. 18သံကခးဇိၤမၤခရၱာ်ကယဳၤဒဳၣ်, သံကမဲၤကဲာ်ထာ်ကဘၱာ်စဲာ်ကၱာ်သံကနံၤဘဲာ် ကီပၠၤအတဲၤဒဳတဲၤယး.
19မဲၤကနဳၤအခဳးအစဲ, ဝၤကအီၣ်ဒီဧဲၤတဲၤအနူၤ အဒီထဲၢ်အလ့ၤအံာ်ဟူဝၤဒဳတဲၤစဳးတဲၤမီၤကၱာ်တဲၤဓဳၤထာ်မူၤထာ်အကျဲးပူၤနဳၤ, 20ဒဳတဲၤအၣ်တဲၤအီအစဲမဲၤကဲပီၢ်မဲး ကဘၱာ်စဲာ်အတဲၤဖၱးတဲၤမဲၤမဲး. တဲၤအၣ်တဲၤအီမၱာ်အပျၱအစါလဳလီၤ, မၱာ်သံတဲၤအၣ်တဲၤအီကမဲၤလၤခူး မၤပၠၤဒဳၣ်, အဖၱထာ်တပွဲးကဲၤတဲၤအတအဲးနီး. 21ဘ့နဳၤအခဲ အအဲးကဓူမၱာ်ကဒူၣ်တဲၤဟၱးတဲၤဘးကၱာ်, သဳးပရှံးထံဘ့အမဲၤထဲသကူ ကၱာ်အမဲၤဖၱးလၤယီၤလၤသံသဲပူၤဝ့ၤတပွဲၤပွဲၤအခဲနဳၤ. 22ဖီးကျဳၤ အံာ်ပီၢ်သံတဲၤဘူၣ်ဒဳသံကၱာ်ကဘၱာ်စဲာ်အဇိၤနဳၤကၱာ်ကမဳၤပီၢ်ပၠၤအတထာ် ခဳးကါအသးအဳးပူၤနီးတပွဲၤမၱာ်ပၠၤအဘဲာ်ဟိးဝၱၤ. 23ပၠၤအအၣ်ဒဳ တဲၤထဲးနံၤဝံနံၤဝၤအပူၤတပွဲၤဘဲာ်စံးရးထဳ, မၤနဲၢ်, စတဲၤဘူၣ်တမှ့း ကဲၤ နီးကၱာ်တဲၤမဲၤအရါအထာ်ဒ့ဒီၣ်တဲၤဘူၣ်မၱာ်တဲၤခီၣ်ဝဲၤလီၤ.
Geba Roman New Testament © Bible Society of Myanmar, 2021.