ရိမ့ၤ 13
13
တဲၤဆီးခ့န့းလ့ၢ်သဲးဝှိထံက့ၤအခဳးအန့ၤတစီာ်
1သံကိအပွဲၤ ကဆီးခ့န့းလ့ၢ်သဲးဟိ ဘဲာ်အအူအံာ်စာ်အံာ် တဲၤအခဳးအန့ၤ. မၤနဲၢ်ဒဳၣ်, ကတမၱာ်မၤကဘၱာ်စဲာ်အံာ်လၤစဲာ်တစီာ် အခွဲးနီးဒဳၣ်, စဲာ်တစီာ်တအီၣ်ထာ်ဇၤနီး ကၱာ်ပၠၤအအူအံာ်တဲၤ ခဳနူၤယဳၤ တစီာ်မၱာ် ကဘၱာ်စဲာ်လဲၢ်ထာ်စဲာ်လီၤ. 2ကၱာ်ကယါပၠၤအထာ်ဒ့ဒီၣ် အအူအံာ်စာ်အံာ်တဲၤစထာ်ဒ့ဒီၣ်ကဘၱာ်စဲာ်အတဲၤပ့ၢ်လၤကၱာ်ပၠၤထဲၢ် အမဲၤတဲၤကမဲာ်အယဳၤမၱာ်တးနံၤဘဲာ် တဲၤစံးရးအနံၤခံလီၤ. 3တဲၤ ဖၱးတဲၤမဲၤအဝၱၤအဘဲာ်တရှံးဆါနံၤတဲၤစံးရးအလ့ၤနီး. အမီၤစံးရးမၱာ် အတဲၤကမဲာ်အီၣ် တစီာ်နဳၤလီၤ. သံကတသးအဲးရှံးဆါနံၤအခဳးအန့ၤ အလ့ၢ်နီးဒဳၣ်အီၣ်တၱၢ်အီၣ်မှးပီၢ်ကၱာ်အခဳးအန့ၤတစီာ်ကလဲၢ်ဓဳၤလဲၢ်မူၤ သံတခီ. 4ထံက့ၤမၱာ်အကခးဇိၤကဘၱာ်စဲာ်သံနံၤခံ. သံကခဲဘး တဲၤမှဲးလၤဒဳၣ်, သံမီၤရှံးဆါအလ့ၤအီၣ်တပွဲး. တဲၤအီၣ်အံာ်ဒာ်ဆ့မၱာ်အထာ်ပဳၤထာ်ဘါအီၣ်တပွဲးပွဲး. အခဳးအန့ၤတစီာ်မၱာ်အကခးဇိၤဘဲာ် ကဘၱာ်စဲာ်, အကဆူးမၤဘဲာ်ပၠၤအမဲၤကၱကဲာ်မဲၤလှီတဲၤတစီာ်နဳၤ. 5မဲၤကနဳၤဒဳၣ်, သံကဆီးခ့န့းလ့ၢ်သဲးဝှိဘဲာ်တဲၤ, တဘဲာ်ထ့သံရှံးဆါ အကဘဲာ်ကဘၱာ်စဲာ်အတဲၤစံးရးလီၤနီး, မၱာ်ဒဳသံသးအဳးပူၤအခဳးအစဲ.
6မဲၤကနဳၤဒဳၣ်, သံကအံာ်လၤဘဲာ် တဲၤမှူ, မၤနဲၢ်ဒဳၣ်, ထံက့ၤ အခဳးအန့ၤတစီာ်နဳၤမၱာ်ကဘၱာ်စဲာ်အဇိၤအပွဲၤ. စဲာ်တစီာ်ခးဇိၤကဘၱာ်စဲာ် ဒဳတဲၤတၤတဲၤမှူအပူၤနဳၤ. 7မဲၤကနဳၤဒဳၣ်, အံာ်ပီၢ်စဲာ်တဲၤထဲၢ်သံကဘဲာ်အံာ်တစီာ်နဳၤ. ကယါမၱာ်တဲၤသွဲထဲၢ်သံဘဲာ်အံာ်အီၣ်တမဳၤမဳၤနဳၤ, အံာ် လၤပီၢ်. ကၱာ်ဒီဒဲလၱၢ်ပီၢ်တဲၤဒဳတဲၤယးကၱာ်တဲၤပဲၢ်တီၤပဲၢ်သ့းလဳစဲာ်တစီာ် အီၣ်နဳၤ.
တဲၤဘဲာ်လီၢ်လှဲးလၢ်ဝၤ
8အီၣ်အံာ်မဲးစွ့မံၤမဲး, မၱာ်တဲၤဘဲာ်လီၢ်အစွ့မံၤလီၤ. သံကဘဲာ် လီၢ်ဘ့ာ်မ့သံခီသံခဲးဒဳၣ်, သံကမဲၤပ့ထာ်ဘဲာ်သံတဲၤဖၱးတဲၤမဲၤလီၤနဳၤ. 9တဲၤမှဲးလၤတစီာ်နဳၤမၱာ်, “မဲၤလၤကမဲာ်မဲးတဲၤမဲး, မဲၤသံမဲးပၠၤမဲး, အၣ်ဟူးမဲးတဲၤမဲး, သးအဲးနံၤမဲးပၠၤတဲၤထီတဲၤလၤမဲး,” တဲၤလဳအကျဳၤပူၤ မၱာ်တမဳလီၤ. “နဘဲာ်လီၢ်ဘဲာ်နခီနခဲးအစာ်ဘိနန့ၤနဳၤ.” 10မဲၤကနဳၤအခဳးအစဲ, တဲၤဘဲာ်လီၢ်မၱာ် အမဲၤပ့ထာ်တဲၤမှဲးလၤလဳစါစဲးတစီာ်နဳၤ.
11ဒဳၣ်ချဳမၱာ်သံသၱာ်ဟဲတပွဲးအခၠၱးဘဲာ်ထဳနဳၤ, သံကဖိးသနဲး ထာ်ဘဲာ်ကဲာ်, ဝၤတဲၤလှိထာ်က့ၤဘိာ်ထၱးဒဳၣ်လံကၱာ် လှ့ဝၤဘါချဲးထာ်ဝၤ တဲၤအီၣ်နဳၤ. 12တဲၤခံးသးမီကူဓူၤထဳ, တအီၣ်ယၱၢ်အီၣ်ကၠးနီး, တဲၤကလှၱကဲၤ, ဝၤလဲၢ်ကဲလဳပီၢ်တဲၤဖၱးတဲၤမဲၤဝၤမဲၤနံၤကဲၤတဲၤခံးကျဲ တစီာ်နဳၤ. ဝၤကြဳၢ်ထာ်ဘူထာ်ဒီဧဲၤတဲၤရၱၢ်တဲၤစူကၱာ်ဟဲထာ်ဒီဧဲၤဒဳ တဲၤလှၱအကျဲနဳၤ. 13ဝၤအီၣ်သါပြၢ်ဒီဧဲၤစာ်ဘိပၠၤမဲၤလူၤမူၤဆဲး ခဲနဳၤ. တဲၤအီမှူးအၣ်ပီး, တဲၤဇီၤလီၢ်အီၣ်အဲ, တဲၤထာ်ဓဳၤထာ်ရၤကၱာ်တဲၤ သးကျးကတအီၣ်ပ့ၤနီး. 14ဘၱာ်စဲာ်ယ့ၣ်ရှူခရၱာ်ကမၱာ်ဒီဧဲၤ သံ စူးဒ့ထာ်လး, ဆီးသိပိၢ်နှဲးပီၢ်တဲၤသးအဲးနံၤအကမဲၤသံ သံန့ၤဘၱစဲာ် တစီာ်နဳၤ.
Geba Roman New Testament © Bible Society of Myanmar, 2021.