نامه فیلیمونِ ره 1
1
1پولُسِ جا، مسیحْ عیسی زندانی، و اَمی برار تیموتائوس،
اَمی عزیز همکار فیلیمونِ ره، 2اَمی خواخور آپْفیا و اَمی هم رَزم آرخیپوس، و کلیسایی کی تی خانه درونِ:
3فیض و صلح و سلامتی اَمی پئر، خُدا و خُداوندْ عیسی مسیحِ طرفِ جا، شمرأ بایه.
فیلیمونِ محبت و ایمان
4من می دُعائانِ درون تَره یاد آورم، همیشک می خُدای شُکر کونَم، 5چونکی من تی محبت و ایمانِ باره کی خُداوندْ عیسی و تمانِ مُقدّسین ره دَری ایشتاوَم، 6و دعا کونَم مشارکتی کی تی ایمانِ درون دَری، کمک بُکونه و مسیحِ خاطری هر خُبِ چی باره کی اَمی درون دَره، ایتا تمان و کمالِ شناختَ ثمر باوَره. 7ای برار، چونکی تی محبتِ جا خَیلی شاد بُبوستَم و تَسلی بیگیفتَم، انه واسی کی مُقدّسینِ دیلان بواسطه تو ایوارده جان بیگیفت.
پولُسِ خواهش اونیسیموس باره
8جه اَ رو، هرچن مسیحِ درون اَ جرأتَ دَرم تَره حکم بُکونَم تا اونچیَ کی لازم ایسه، انجام بَدی 9با اَن وجود، محبتِ واسی صلاح دَنَم کی تی جا خواهش بُکونم: من، پولُس کی ایتا پیر مَرداکم، و الانَم مسیحْ عیسی زندانی ایسَم، 10می زای اونِسیموسِ باره کی زندان درون اونِ پئر بُبوستم، تی جا خواهش دَرم. 11اون، قدیمان تِره فایده ناشتی، ولی هسّا، هم تِره و هم مِره فایده دَره.
12من می جگر گوشه یَ تی ورجه اوسه کونم. 13من خوشحال، بوستیم کی اونَ می ورجه بداشته بیم تا اَ زماتی کی انجیلِ واسی زندانِ درونم، بجای تو اون مَرا خیدمت بُکونه. 14ولی صلاح بدانستَم کی بدونِ تی رضایت کاری نُکونَم، تا تی خُبی کودَن زوری نَبه بلکی تی میل امرا بِبه. 15شاید چون، اَنه خاطری بو کی ایپچه زمات تی جا سیوا بُبوست، تا دِه همیشک ره تی ورجه واگرده، 16ولی دِه نه نوکر مانستن، بلکی نوکرِ جا بُجورتر، ایتا عزیز برار مانستن. بخصوص مِره، ولی چنقد ویشتر تَره، هم جسم درون هم خُداوند درون.
17پس اگر مَرا تی ریفق دانی، اونَ هُطو قُبیل بُکون کی مَرا قُبیل بُکودی. 18اگر تَره بَدی بُکوده، یا ایچی تَره بدهکار ایسه، اونَ می حساب بَنه. 19من، پولُس، می دَسِ مرا نیویسم: من اونَ تلافی خوائم کودن- البت لازم نیئه بگم کی تو، تی جانَم می مدیونی. 20بله ای برار، خوائَم کی خُداوندِ درون تی جا مرا منفعتی فارسه. می جانَ مسیح درون تازه بُکون. 21اَنه نیویسم چونکی تی اطاعت کودَنِ جا خاطر جمع ایسَم و دانم کی حتی ویشتر جه اونچی کی گَم، خوائی کودَن.
22ضِمنن، ایتا اتاق مِره آماده بُکون، چونکی اُمید دَرم خُدا شیمی دُعائانَ مستجاب کونه و به لوطف خودِش مَرا شیمی ورجه واگردانه.
23اِپافْراس، کی مسیحْ عیسی واسی می امرا زندانِ درون ایسا، تَره سلام فاراسانه، 24و هَطو می همکارانم، مَرقُس، آریستارخوس، دیماس و لوقا تَره سلام فاراسانیدی.
25خُداوندْ عیسی مسیحِ فیض شیمی روح امرا بِبه.
Attualmente Selezionati:
نامه فیلیمونِ ره 1: GIL
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
@ 2024 Korpu Company