نامه، مسیحیانِ عبرانی نـژادِ ره 1
1
خُدا پسر، فیریشته ئانِ جا سرتره
1قدیمان، خُدا چندین و چن وار و جورواجور رائانِ درون، بواسطه پیغمبران، اَمی پئرانِ اَمرا گب بزه، 2ولی اَ آخرتا روجانِ درون، اون بواسطه خو پسر اَمی اَمرا گب بزه، هو پسر کی اونَ ایتا وارثِ مانستن تمانِ چیانِ درون تعیین بُکود و بواسطه اون جهانَ خلق بُکود. 3اون، خُدا جلالِ نور ایسه و اونِ تمان و کمالِ ذاتِ نَقش ایسه، و اون تمانِ چیانَ خو کلامِ قدرت مرا دَره. اون، بعد اَنکی گُنائانَ پاک بُکوده، راسِ دسِ اُ کسی بینیشت کی باعظمت ایسه و عرش بَرینِ درونِ. 4هونقدر کی فیریشته ئانِ جا سرتره، اُ نامی ئَم کی به ارث بَبرده، اوشانِ نامِ جا بجورتره.
5چونکی خُدا کویتا جه فیریشته ئانَ بگفته:
«تو می پسری؛
ایمرو من تَره مولود بکودم»؟
و یا:
«من اونِ ره پئر خوائم بوستن،
و اون مِره پسر»؟
6و بازم اُ موقع کی اون، اولتّا زاکَ اَ جهان درون آوَره، گه:
«تمان خُدا فیریشته ئان اونَ پرستش بُکونید.»
7فیریشته ئانِ باره گه:
«اون، خو فیریشته ئانَ بادانِ مانستن،
و خو خادمانَ آتشِ ولِ مانستن چاکونه.»
8ولی پسرِ باره گه:
«اَی خُدا، تی سلطنتِ تخت ابدی ایسه،
تی پادشائی عصا، عدالتِ عصا ایسه.
9تو صالح بوستنَ دوست دَری و شرارت جا خَفت داری؛
جه اَ رو خُدا، تی خُدا، تَره ویشتر جه تی همراهان شادی روغنِ مرا مَسح بُکوده.»
10و:
«تو، اَی خُداوند، در آغاز، زمینِ پیَ بَنَئی،
و آسمانان، تی دسِ کار ایسید!
11اوشان از بین شیدی، ولی تو بِجا مانی!
اوشان همتان رختِ مانستن، کُهنه خوائید بوستن!
12اوشانَ ایتا قبا مانستن واپیچانی،
ایتا رختِ مانستن عوض دکش خوائید بوستن.
ولی تو هون ایسی،
و تی سالان تمانَ نیبه!»
13خُدا تا هسّا کویتا جه فیریشته ئانَ بگفته:
«می راستِ دَس وَر بینیش،
تا اُ موقع کی تی دُشمندانَ تی پا جیر تَوَدَم»؟
14مگر اوشان همتان روح ئانی نیئید کی خیدمت کونیدی و اُ کسانِ خیدمت ره اوسه بید کی نجاتَ به ارث بَریدی؟
Attualmente Selezionati:
نامه، مسیحیانِ عبرانی نـژادِ ره 1: GIL
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
@ 2024 Korpu Company