Revelation 17
17
1ဖလားခုနစ်လုံး ကိုင်ဆောင်ထားသော နတ်ဒေဝါခုနစ်ပါးအနက် တစ်ပါးသည် လာ၍ ကျွန်ုပ်အား “လာကြလော့။ မြစ်များစွာရှိသောနေရာ၌ တည်ရှိသည့် ဆိပ်ကမ်းမြို့ကြီးဖြစ်သော ပြည့်တန်ဆာမကြီး ခံရမည် အပြစ်ဒဏ်များကို သင့်အားငါပြမည်။ 2ဤကမ္ဘာလောကပေါ်ရှိ ဘုရင်များသည် ထိုပြည့်တန်ဆာမနှင့် ကာမဂုဏ်ခံစားခဲ့ကြ၏။ ဤကမ္ဘာလောကကြီးတွင် နေထိုင်ကြသောသူအပေါင်းတို့သည်လည်း သူ၏ကာမဂုဏ်ခံစားခြင်းတည်းဟူသော စပျစ်ရည်ဖြင့် ယစ်မူးခဲ့ကြ၏။ 3ထို့နောက် ကျွန်ုပ်အပေါ် ဉာဏ်အလင်းတော်သည် သက်ရောက်လာသဖြင့် နတ်ဒေဝါသည် ကျွန်ုပ်ကို တောကန္တာရသို့ ခေါ်ဆောင်သွား၏။ ထိုနေရာ၌ အနီရောင်သားရဲပေါ်တွင် ထိုင်နေသောအမျိုးသမီးကိုမြင်ရ၏။ ထိုသားရဲပေါ်တွင် ဦးခေါင်းခုနစ်လုံးနှင့် ဦးချိုဆယ်ချောင်းပါရှိပြီး တစ်ကိုယ်လုံး၌လည်း ဘုရားရှင်အား စော်ကားသောအမည်များကို ရေးထား၏။ 4ထိုအမျိုးသမီးသည် ခရမ်းရောင်နှင့် နီမြန်းသောတဝတ်အစားများကို ဝတ်ဆင်ကာ ရွှေ၊ ကျောက်မျက်ရတနာနှင့် ပုလဲတို့ကို ဆန်မြန်းထား၏။ သူ၏လက်၌စက်ဆုပ် ရွံရှာဖွယ်ရာများ၊ တရားနှင့်မညီသော ကာမဂုဏ်ခံစားခြင်းတို့၏ ညစ်ညမ်းဖွယ်ရာများနှင့် ပြည့်နေသော ရွှေခွက်ကို ကိုင်ဆောင်ထား၏။ 5သူ၏နဖူးပေါ်၌ “ပြည့်တန်ဆာတို့နှင့် ကမ္ဘာလောကရှိ စက်ဆုပ်ရွံရှာဖွယ်ရာတို့၏ မိခင်၊ ဘေဘီလုံမြို့ကြီး” ဟူသော အလွန်လျှို့ဝှက်နက်နဲသောအမည်ကိုရေးထား၏။ 6ထိုအမျိုးသမီးသည် ကိုယ်တော်ယေရှုအကြောင်းကို သက်သေခံသော သန့်ရှင်းမွန်မြတ်သူတို့၏သွေးကိုသောက်၍ ယစ်မှုးနေကြသည်ကို ကျွန်ုပ်မြင်ရ၏။ သူ့ကိုမြင်ရသောအခါ ကျွန်ုပ်သည် အလွန်အံ့ဩလျက်နေ၏။ 7ထိုအခါ နတ်ဒေဝါက “အဘယ်ကြောင့် အံ့ဩနေသနည်း။ ထိုအမျိုးသမီး၏ လျှိုဝှက်နက်နဲသော အကြောင်းကိုလည်းကောင်း၊ ထိုအမျိုးသမီးထိုင်နေသော ခေါင်းခုနှစ်လုံးနှင့် ဦးချိုဆယ်ချောင်းရှိသည့် သားရဲ၏ လျှို့ဝှက်နက်နဲသော အကြောင်းအရာများကိုလည်းကောင်း ငါပြောပြမည်။ 8ယခုသင်ရသော သားရဲသတ္တဝါသည် ယခင်က အသက်ရှင်သော်လည်း ယခုမရှင်တော့ပေ။ သို့သော် မကြာမီသူသည် တွင်းနက်ကြီးထဲမှ တက်လာ၍ ဖျက်စီးခြင်းကိုခံရလိမ့်မည်။ ကမ္ဘာလောကပေါ်၌ နေထိုင်ကြသောသူတို့တွင် ကမ္ဘာဦးစကတည်းကပင် အသက်စာစောင်၌ စာရင်းမဝင်သူများက ထိုသားရဲကို မြင်ရသောအခါ အလွန်အံ့ဩလိမ့်မည်။ အကြောင်းမှာ ယခင်အသက်ရှင်ခဲ့သည့် ထိုသားရဲသည် ယခုမရှင်တော်သော်လည်း မကြာမီပြန်ပေါ်လာဦးမည့် ဖြစ်သောကြောင့်ဖြစ်၏။ 9ဤကိစ္စနှင့်ပါတ်သက်၍ ဉာဏ်နှင့်ယှဉ်သော အသိစိတ်ရှိရန်လိုအပ်၏။ ထိုအမျိုးသမီးထိုင်နေသော သာရဲ၏ခေါင်းခုနစ်လုံးမှာ တောင်ခုနစ်လုံးကို ကိုယ်စားပြု၏။ 10ရှင်ဘုရင်ခုနစ်ပါးကိုလည်း ကိုယ်စားပြု၏။ ထိုခုနစ်ပါးတွင် ငါးပါသည် ကျဆုံးပြီ။ ဆဠမမြောက်ရှင်ဘုရင်သည် ယခုနန်းစံလျက်ရှိ၏။ သတ္တမမြောက်ဘုရင်မှာ နန်းမတက်သေး။ နန်းတက်လျှင်လည်း သူ၏နန်းသက်မှာတိုတောင်းလိမ့်မည်။ 11ယခင်က အသက်ရှင်ခဲ့သော်လည်း ယခုအသက်မရှင်တော့သည့် အနီရောင်သားရဲမှာ အဠမမြောက်ဘုရင်ခုနှစ်ပါးကဲ့သို့ပင် ပျက်စီးသွားမည့်သူဖြစ်၏။ 12သင်မြင်ရသည့် သားရဲ၏ဦးချိုဆယ်ချောင်းသည် မင်းအာဏာြစက်ကို မရသေးသောဘုရင်ဆယ်ပါကို ကိုယ်စားပြု၏။ ထိုဘုရင်တို့သည် သာရဲနှင့်အတူ ခဏမျှသာ နန်စံခွင့်ရကြလိမ့်မည်။ 13ထိုသူတို့သည် ရည်ရွယ်ချက်ချင်းတူ၍ မိမိတို့၏ အစွမ်းတန်ခိုးကို သားရဲအားပေးရန် သဘောတူထားကြ၏။ 14သူတို့သည် သိုးသငယ်တော်ကို တိုက်ခိုက်ကြလိမ့်မည်။ သို့ရာတွင် သိုးသငယ်တော်သည် ဘုရင်တကာတို့၏ ဘုရင်၊ သခင်တကာတို့၏ သခင်ဖြစ်တော်မူသောကြောင့် သူတို့ကို အောင်နိုင်လိမ့်မည်။ သိုးသငယ်တော်နှင့်အတူရှိသောသူတို့သည် ဖိတ်ခေါ်ခြင်းခံရသူများ၊ ရွေးချယ်ခြင်းခံရသူများ၊ သစ္စာရှိကြသူများဖြစ်၏” ဟုကျွန်ုပ်အား မိန့်၏။ 15ထို့နောက် နတ်ဒေဝါက ကျွန်ုပ်အား “ပြည့်တန်ဆာဖြစ်သော ထိုဆိပ်ကမ်းမြို့ကြီး တည်ရှိရာ၌ စီးဆင်းနေသည့်မြစ်များသည် လူမျိုးအသီးသီး၊ လူမျိုးအသီးသီး၊ တိုင်းနိုင်ငံအသီးသီး၏ ဘာသာစကားအား ပြောဆိုသည့်သူများကို ကိုယ်စားပြု၏။ 16သင်မြင်တွေ့ရသော ဦးချိုဆယ်ချောင်းနှင့် အနီရောင်သားရဲသည် ထိုပြည့်တန်ဆာကို မုန်းကြလိမ့်မည်။ သူ၌ရှိသမျှအရာကို ဖျက်စီး၍ အဝတ်ဗလာဖြစ်စေလိမ့်မည်။ သူ၏အသားကိုလည်းစား၍ မီးရှို့ကြလိမ့်မည်။ 17မိမိအကြံအစည်တော်အတိုင်း လုပ်ဆောင်ရမည့်သဘောကို ဘုရားရှင်သည် ထိုသူတို့၏စိတ်ထဲသို့ ထည့်သွင်းတော်မူ၏။ ဤသည်မှာ သူတို့သည် ဘုရားရှင်မိန့်တော်မူသော အရာများဖြစ်ပျက်လာချိန်အထိ မိမိတို့၏သာသနာတော်အုပ်စိုးခွင့်ကို သားရဲအား သဘောတူညီတညွတ်တည်းပေးအပ်ရန် ဖြစ်၏။ 18သင်မြင်ရသောအမျိုးသမီးသည် ကမ္ဘာလောက၏ ဘုရင်တို့ကို အုပ်စိုးသည့်မြို့ကြီးကို ကိုယ်စားပြုဩ” ဟု မိန့်တော်မူ၏။
Attualmente Selezionati:
Revelation 17: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
