Revelation 16
16
1ထို့နောက် ဗိမာန်တော်ထဲမှ “သွားလော့။ ဘုရားရှင်၏ အမျက်တော်နှင့် ပြည့်နေသောဖလားခုနှစ်လုံးကို ကမ္ဘာမြေပေါ်သို့ သွန်းလောင်းလော့” ဟုနတ်ဒေဝါခုနှစ်ပါးတို့အား ကျယ်လောင်စွာပြောသည့်အသံကို ကျွန်ုပ်ကြားရ၏။ 2ပထမနတ်ဒေဝါသည် သူ၏ဖလားကို ကမ္ဘာမြေကြီးပေါ်သို့ သွန်းလောင်းလိုက်သောအခါ သားရဲ၏ အမှတ်တံဆိပ်ရှိသောသူတို့နှင့် သားရဲ၏ ရုပ်တုကို ကိုးကွယ်သောသူတို့၌ အလွန်ဆိုးရွားသော အနာစိမ်းများ ပေါက်လေ၏။ 3ဒုတိယနတ်ဒေဝါသည် သူ၏ဖလားကို ပင်လယ်ထဲသို့သွန်းလောင်းလိုက်သောအခါ ရေသည် လူသေ၏သွေးကဲ့သို့ဖြစ်သွားပြီး ပင်လယ်၌ ရှိသောသတ္တဝါအားလုံး သေကုန်လေ၏။ 4တတိယနတ်ဒေဝါသည် သူ၏ဖလားကို မြစ်များနှင့် စမ်းရေတွင်းများပေါ်သို့ သွန်းလောင်းလိုက်သောအခါ ရေသည် သွေးဖြစ်သွား၏။ 5ထို့နောက် ရေကိုအုပ်စိုးသော နတ်ဒေဝါက “အို… သန့်ရှင်းတော်မူသောအရှင်… ကိုယ်တော်သည် ယခုကာလတွင်လည်းရှိ၍ ယခင်ကာလာတွင်လည်းရှိတော်မူပြီး ကိုယ်တော်၏ တရားစီရင်ခြင်းသည် တရားမျှတပါ၏။ 6ထိုသူတို့သည် မြင့်မြတ်သူတို့နှင့် ပရောဖက်တို့၏ သွေးကိုသွန်ခဲ့ကြသဖြင့် ထိုသူတို့နှင့် ထိုက်တန်သည့်အတိုင်း ကိုယ်တော်သည် ထိုသွေးကို သူတို့အား တိုက်တော်မူ၏” ဟုပြောသည်ကို ကျွန်ုပ်ကြားရ၏။ 7ထို့နောက် “မှန်ပါ၏ အို အနန္တတန်ခိုးရှင် ဘုရားရှင်… ကိုယ်တော်၏ စီရင်တော်မူချက်တို့သည် မှန်ကန်၍ တရားမျှတပါ၏” ဟူ၍ပူဇော်ပလ္လင်မှ ထွက်လာသောအသံကို ကျွန်ုပ်ကြားရ၏။ 8ထို့နောက် စတုတ္ထနတ်ဒေဝါသည် သူ၏ဖလားကိုနေပေါ်သို့ သွန်းလောက်လိုက်သောအခါ နေသည် လူတို့အား မီလောင်ရသော အခွင့်ကိုရလေ၏။ 9လူတို့သည် ပြင်းထန်သောအပူရှိန်ကြောင့် လောင်ကျွမ်းခြင်းကို ခံရသဖြင့် ဤဘေးဒဏ်များ ကျရောက်စေရန် အခွင့်အာဏာရှိသော ဘုရားရှင်၏နာမတော်ကို ကျိန်ဆဲကြ၏။ သူတို့သည် နောင်တလည်းမရကြ။ ကိုယ်တော်၏ ဂုဏ်တော်ကိုလည်း မချီးမွမ်းကြ။ 10ထို့နောက် ပဉ္စမနတ်ဒေဝါသည် သူ၏ဖလားကို သားရဲ၏ ရာဇပလ္လင်ပေါ်သို့ သွန်းလောက်လိုက်သောအခါ သားရဲ၏နိုင်ငံသည် မှောင်မိုက်သွား၏။ သူတို့သည် ပြင်းထန်သောဝေဒနာကြောင့် လျှာကိုကိုက်ထားကြရ၏။ 11သူတို့သည် ခံစားရသောဝေဒနာနှင့် အနာစိမ်းတို့ကြောင့် ကောင်းကင်ဘုံရှင် ဘုရားရှင်ကို ကျိန်ဆဲကြ၏။ မိမိတို့၏ အကျင့်ဆိုးများအတွက်လည်း နောင်တသံဝေဂမရကြ။ 12ဆဌမနတ်ဒေဝါသည် သူ၏ဖလားကို ယူဖရေးတီးမြစ်ကြီးပေါ်သို့ သွန်းလောင်းလိုက်သောအခါ မြစ်ရေခန်းခြောက်သွား၏။ ထို့ကြောင့် အရှေ့ပြည်၌ရှိသော ဘုရင်များအတွက် လမ်းပွင့်သွား၏။ 13ထို့နောက် ဖားနှင့်တူသော မကောင်းဆိုဝါးသုံးကောင်ကို ကျွန်ုပ်မြင်ရ၏။ ထိုနတ်ဆိုးတို့သည် နဂါ၊ သားရဲ၊ နှင့် ပရောဖက်အတုအယောင်တို့၏ ခံတွင်းအသီးသီးမှ ထွက်လာကြ၏။ 14သူတို့သည် နိမိတ်လက္ခဏာများကို ပြနိုင်သော နတ်ဆိုးတို့၏ ဝိဉာာဉ်များဖြစ်ကြ၏။ ၎င်းတို့သည် အနန္တတန်ခိုးရှင် ဘုရားရှင်၏ တရားစီရင်ရာနေ့ရက်ကြီးတွင် ဆင်နွှဲမည့် စစ်ပွဲအတွက် ကမ္ဘာတစ်ဝန်းလုံးရှိ ရှင်ဘုရင်များကို စုဝေးရန်ထွက်ခွါသွားကြ၏။ 15“ကြည့်လော့။ သူခိုးကဲ့သို့ငါလာမည်။ သို့ဖြစ်၍ အဝတ်မပါဘဲသွားလာသဖြင့် အရှက်ကွဲခြင်းမျိုးမဖြစ်စေရန် မိမိ၏အဝတ်ကို အသင့်ဝတ်ဆင်လျက် နိုးကြားနေသောသူသည် မင်္ဂလာရှိ၏။” 16ထိုမကောင်းဆိုးဝါးတို့သည် ရှင်ဘုရင်များအားလုံးကို ဟေဗြဲဘာသာစကားဖြင့် “အာမဂေဒုန်” ဟုခေါ်သောအရပ်တွင် စုဝေးစေ၏။ 17ထို့နောက် သတ္တမနတ်ဒေဝါသည် သူ၏ဖလားကို လေထဲသို့ သွန်းလောင်းလိုက်သောအခါ “အမှုပြီးမြောက်ပြီ” ဟု ဗိမာန်တော်အတွင်းရှိ ရာဇပလ္လင်တော်မှ ကျယ်လောင်စွာပြောဆိုသောအသံ ထွက်ပေါ်လာ၏။ 18ထိုအခါ လျှပ်စီးလက်ခြင်း၊ အသံမြည်ဟည်းခြင်း၊ မိုးခြိမ်းခြင်း၊ တို့ဖြစ်ပေါ်လာပြီးနောက်တွင် အလွန်ပြင်းထန်သောငလျင် လှုပ်ခတ်လေ၏။ ကမ္ဘာမြေပေါ်တွင် လူတို့ဖြစ်ပေါ်လာသည့်အချိန်မှစ၍ ထိုမျှလောက်ပြင်းထန်သော ငလျှင်မျိုး တစ်ခါမှ မလှုပ်ခတ်ဖူးပေ။ 19မြို့ကြီးသည် အပိုင်းသုံးပိုင်းကွဲသွား၍ တိုင်းနိုင်ငံတို့၏မြို့များသည်လည်း ပြိုပျက်ကုန်၏။ ဘုရားရှင်သည် ဘေဘီလုံမြို့ကြီး၏ အပြစ်များကို သတိရတော်မူလျက် အမျက်ဒေါသနှင့် ပြည့်နက်နေသော စပျစ်ဝိုင်ကို ထိုမြို့အားတိုက်လေ၏။ 20ထိုအခါ ကျွန်းများအားလုံးသည်လည်း ပျောက်ကွယ်သွား၍ တောင်များသည်လည်း ပျောက်ကွယ်သွားကုန်၏။ 21ကောင်းကင်မှ ပေါင်တစ်ရာမျှအလေးချိန်ရှိသော မိုးသီးတို့သည် လူတို့အပေါ်သို့ကျကုန်၏။ ထိုမိုးသီးဘေးဒဏ်အလွန်ပြင်းထန်သောကြောင့် လူတို့သည် ဘုရားရှင်ကို ကျိန်ဆဲကြ၏။
Attualmente Selezionati:
Revelation 16: TPV-RV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
