Maajɨ Bɛtɔ Twamagɨɨ 26
26
Bulus A Jǝg Dul Gǝnɔ A Kǝga Agaribasɨ
1A daagɔ nǝngɔ Agaribas a sʊwa Bulus gɔ, “N nǝ ń gola. Jǝg dul mʊnɔ.” Nǝngɔ Bulus a gung kang a tǝl sʊwatǝm kɛlɨ gɔ, 2“Fɔlɔgɔ, n maa fulotǝm nǝl a kǝga mʊn, mǝ jǝg dul mǝndɨ lɛ dwiyen a katɨ nɨ Yahudawagɔ sʊwala lɛ a dul mɨɨ. 3Mʊ nǝn nyǝmtǝm a jǝfʊlǝn Yahudawagɨɨ jǝbɔ kanjǝl nɨ jǝ maa gʊbkatǝm lɛ a dul gǝnɨ. A dul kɛl nɨ mǝ kela ń nɛ bǝm nǝl mʊnɔ kaa lɔl, ń nyʊwa ɨ.
4“Yahudawagɔ gwam a nyǝm yɨm nɨ mǝ yɨɨ, a tǝl nǝn kwama mǝ a lɔ bwɛsǝnɨ, a tǝm mǝndɨ jǝbɔ Urushalima a bɛ nǝn a kǝngkɨɨ. 5Ja kwɛl ja nyǝm ɨ a kʊta, na ja jǝlaɨ jǝ nǝ nǝ nyiyo ja sʊwa gɔ mǝ bwɛ Farisa, gwanga nǝb nɨ mɨ maa gaan nɛ nǝn jǝfʊlǝn nǝnɨ. 6Kǝngkɔ mǝ tɨm a kǝga jen sǝ jǝ́ maa mɨ borang a yatǝm nǝl mǝndɨ a swatǝm yaa nɨ Kwaama a maa tʊgalam bǝnɔ gǝmɨ. 7N swatǝm yaa nɨ dʊʊm nǝnɔ kʊb jeli yoi ja ya nǝl sǝ ja kuwo yiitǝm gǝnɨ, kanga jǝ bǝlá Kwaama lɛ kum jǝbɔ kɔkɔɨ. Fɔlɔgɔ, Yahudawagɔ tuwo i lɛ, jʊ a bwɨɨ n yatǝm nǝl a swatǝm yaa nɨ mǝ nǝnɨ! 8N wɛ a bwɨ jǝ́ jǝla bɔ n bɨlǝngkɛl Kwaama gung gung nǝbɔ a bwaaɨ?
9“Mǝ nǝn kang mɨ galɨgǝn n kuwo n dǝngdǝng n maa kanjǝlɔ a gǝlala, wʊnɨ kal dun Yesu Bwɛ Nazarat nɨ lɛ mɨsɔ ja kǝga lɛɨ. 10N maa nyɔ a Urushalima. N nya fɔlɔn a daa dʊʊm nǝbkǝlamɔ woi, sǝ n kubʌl nǝb sagsagɔ a lada a lɔsomi. Kwama nɨ jǝ jʌm ji lɛɨ, mǝ bwa jim bwa guu. 11Mǝ bwangtǝn kantɨn mɛlalɨgɔ lɛ, mǝ bʊg ji lɛ. Mǝ maa gola lɛ sǝ n dǝg ji ja soga dun Yesui. N maa nabwɨl jǝbɔ ji dangǝn, mǝ bwang jim lɛ a kaam tuulɔtɨn nǝbɨɨ, sǝ n nǝ ji gaalan.
Bulus A Bǝla Bwɨlangkɛl Gǝnɔ
(Mbt 9:1-19; 22:6-16)
12“A mʊgɔ maatǝmɔ nyɨɨ, kaa di mǝ a mʊgɔ yɔm a Dimaska. Dʊʊm nǝbkǝlamɔ a nɨ ɨ fɔlɔn jǝbɔ langǝn bwangǝn kwaan. 13Fɔlɔgɔ, bɛ Kwaama a ta ń wo. Nǝn sɨmang kɔkɔ a gola, n kuwo kaa nyalǝm nɨ a laa nyalǝm kɔkɔgɨɨ a biyo a dʌbʌl, a kang ɨ jǝbɔ fatǝm yɔm mǝndɨɨ. 14Gwam nǝnɔ nǝn tǝla a tǝm. Nǝngɔ mǝ nyʊwa kaa diil sʊwa lɛ nǝn nyiyo Yahudawagɨɨ gɔ, ‘Shawulu, Shawulu! Wɛ a bwɨ mʊ nɨ ɨ gaalan nɛɨ? Mʊ nǝ dul mʊnɔ gaalan, mʊ maa kɨlan nɛ jǝbɔ mǝɨ.’
15“Nǝngɔ mǝ sʊwa mǝʊ, ‘Mɔ nǝn nuwo Tɛlalɔ?’
“Nǝngɔ Tɛlalɔ a sʊwa ɨ gɔ, ‘Nǝmǝ mǝ Yesu wʊnɨ mʊ nǝ gǝn gaalan nɛɨ. 16Gun tɨ tɨɨ. Mǝ nʊng dul mǝndɨ a daa mʊ woi, sǝ n dǝg ń, ń maa mɨ maajɨ, sǝ ń sʊwa kanjǝl nɨ mʊ kuwo a dul mɨɨ jǝbɔ kanjǝl nɨ mǝ nʊng ń nɛ a kǝgaɨ. 17Mǝ bʊʊ bʊʊ nǝn mɔ a daagɔ nǝbam mʊnɔ woi, jǝbɔ nǝb nɨ n Bʌtʌbi, nǝb nɨ mǝ twam ń nɛ a daagɔ ji woi. 18Mǝ maa nyɔ sǝ ń wum jim nu, ja yǝla a kumtojili ja bɛ a nyalǝm. Ja yǝla a daagɔ kwaan Mammɔ woi, ja bɛ a daagɔ Kwaama woi. N gola nɨ jǝ nya kǝlǝmtǝm bwɨlangkɛltɨn nɛɨ, sǝ ja nya kʊla kʊlɨ jǝbɔ nǝb nɨ gwam a yǝlam nǝb sagsagɨ, a gola nǝtǝm bɨlǝngkɛl a daa mǝ woi.’
Bulus A Sʊwa Maajɨ Gǝnɔ
19“Agaribas, Fɔlɔgɔ, a kɛl dul jʊ nɨ mǝ kɔ bɔ maatǝm jʊ dʊgam nyangnyangɔ a nʊng ɨɨ, wʊnɨ a bɛ a dʌbʌli. 20Mǝ tǝl sʊwatǝm nǝbɔ Dimaskaɨ kɛl Kwaamaɨ, nǝngɔ a la nǝbɔ Urushalimaɨ jǝbɔ Yahudiyagɔ, nǝngɔ a la Bʌtʌbi, mǝʊ ja bǝla bwɨlangkɛl jinɔ ja yǝla a daa Kwaama woi, sǝ ja maa kanjǝl nɨ nʊng lɛ ja yǝla ja bǝla bwɨlangkɛl jini. 21N jʊ a bwɨ Yahudawagɔ a ta ɨ a mʊgɔ Kan Kwaaman jǝ swɨ lɛ ja jʌ ii. 22Kwaama a tɨka ɨ a ba la nǝn dwiyeni, n jʊ a bwɨ mǝ fɔ mǝ sʊwa dʊʊmɔ lɛ jǝbɔ bɛtɨɨ. Ke bɔ kaa jǝl nǝn kwan mǝ sʊwa lɛɨ. N jʊ nǝbkuwotǝmkǝgagɔ jǝbɔ Musa ja sʊwa gɔ bwɨ bwɨɨ. 23Jǝ sʊwa lɛ gɔ Kiristi nɔɔ nɔɔ gaalan, yǝlam nǝ tɨkǝga a guntǝm a bwaa. N gola guntǝm gǝnɔ a bwaaɨ, bɛ lɛ nǝn nyalǝm a Yahudawagɔ gǝm jǝbɔ Bʌtʌbɔ gwamɨ.”
24Bulus a mʊgɔ sʊwatǝm kɛl jǝgtǝm dul gǝnɔ, nǝngɔ Festas a ga gǝm wulong gɔ, “Bulus mʊ nǝ wabɨ ka? Kiyotǝm langǝn bwangǝnɔ yǝla mʊn dul lɛ!”
25Nǝngɔ Bulus a sʊwa gǝn gɔ, “Nǝ dʊʊ Festas, mǝ ke bɔ nǝ wabɨ. N bɨlǝngkɛl mǝ sʊwa ń nɛɨ a mʊgɔ tatǝm dul. 26Fɔlɔgɔ a nyǝm katɨ nɨ. Mǝ sʊwa gǝn kɛlɔ mɨ taal wo. N nǝ bɨlǝngkɛl a nyʊwa jʊtǝb nɨ gwam, jʊ a bwɨɨ ke bɔ daddad ja maaɨ. 27Fɔlɔgɔ, ń nǝ bɨlǝngkɛl nǝn nǝbkuwotǝmkǝgagɔ ka? N nyǝm ń nǝ bɨlǝngkɛl.”
28Nǝngɔ fɔlɔ Agaribas a sʊwa Bulus gɔ, “Nǝn kǝlɨ kwama nɨ mʊ swɨ lɛ ń gʊ ɨ, sǝ n yǝlam nǝ bwangtǝm Kiristii ka?”
29Bulus a sʊwa gǝn gɔ, “Na do kumɔ wini, na do kumtɨnɔ a gǝlalaɨ, mǝ kela Kwaama lɛ, ke bɔ mɔ kwaamɔ, gwam nǝb nɨ nyʊwa ɨ lɛ dwiyeni, ja yǝlam na mǝ, ke bɔ nǝn golman nɨ.”
30Nǝngɔ fɔlɔgɔ a gun, jǝbɔ gwamnagɔ, jǝbɔ Barniki, jǝbɔ nǝb nɨ yǝm jǝbɔ jii. 31Ja jel a kan borangɨ, nǝngɔ jǝ sʊwaka lɛ gɔ, “Nʊ nɨ a maa bɔ jʊ nɨ a la jǝ kubʌl gǝn nɛ jǝbɔ jʌtǝm gǝnɨ.” 32Nǝngɔ Agaribas a sʊwa Festas gɔ, “Na ke bɔ jʊ nɨ balɨ nɨ a dem borang gǝnɔ a yɔ nǝn a kǝga Kaisarɨ, na bǝ dem gǝm dem kang.”
Attualmente Selezionati:
Maajɨ Bɛtɔ Twamagɨɨ 26: DBD
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©️2024 Luke Initiative for Scripture Translation
