Maajɨ Bɛtɔ Twamagɨɨ 25
25
Bulus A Dem Katǝmɔ A Yɔ Nǝn A Kǝga Kaisarɨ
1A gul kumɔ taal wʊnɨ Festas a tam maajɨ gwamnaɨ, nǝngɔ a gun a Kaisar a gwi a shu a Urushalimaɨ. 2Nǝngɔ dʊʊm nǝbkǝlamɔ jǝbɔ dʊʊm Yahudawagɔ ja yɔ nǝn kɛl Bulusi a daa gǝ woi. Ja kela gǝn 3gɔ, a maa jim jǝ nya, a bɛ nǝn Bulus a Urushalima. Jʊ a bwɨɨ, ja fɛka kaam nǝb nɨ bal gǝn nɛɨ, sǝ ja jʌ gǝn a gola. 4Festas a gar jim gɔ, “Ja ta taɨ Bulus a Kaisar. Mǝ nǝn kang mɨ mǝ yɔ yɔ fʌlen mɨsɔ kʊta lɛ. 5A dul kɛl nɨ, bɛ nǝb dʊʊm jenɔ ja bɛ jǝbɔ mǝ. Na balɨ nɨ nǝn bwɨlangkɛlɨ, sǝ ja sʊwa jʊtǝb nɨ jǝ tuwo gǝn nɛ nǝnɨ.”
6A maa kumɔ naalǝb a yɔ nǝn a kʊb dakini jǝbɔ ji, sǝ a yǝla a shu a Kaisar. Nǝn tǝmsɛlɨɨ, nǝngɔ a yɨ a daa yɨm borangɨ, a dǝg ja bɛ nǝn Bulus a kǝga gǝnɨ. 7Bɛtǝm Bulusi a kan borangɨ, nǝngɔ Yahudawa nɨ a jela a Urushalimaɨ, ja gun, ja kang gǝn, jǝ bɛ lɛ nǝn kaam katɨ nɨ mɨsɔ nʊng lɛ gɔ katǝm jinɔ n dǝngdǝngɨ. 8Nǝngɔ Bulus a kʌshi dul gǝnɔ gɔ, “A mǝndɨ mǝ maa bɔ diil Yahudawagɨɨ gǝm bwɨlangkɛl. Mǝ maa bɔ Kan Kwaamanɔ jǝbɔ Kaisar gǝm bwɨlangkɛl wo dǝm nɨ.”
9Festas swɨ lɛ a maa Yahudawagɔ gǝm jǝ nya. Nǝngɔ a bʌ Bulus gɔ, “Ń jǝla ja yɔ nǝn mɔ a Urushalima, n maa mʊn borangɔ a dul katɨ nɨ ka?”
10Nǝngɔ Bulus a jǝla gɔ, “Mǝ na a kǝga kan borang Kaisarɨ fɔ. N daagɔ a bʊm mʊ maa mɨ borang lɛ woi. Mǝ maa bɔ Yahudawagɔ gǝm bwɨlangkɛl. Mɔ tǝmʊn ń nyǝm nyɔ. 11Na mǝ nǝ bwɨlangkɛlɨ, bwɨlangkɛl nɨ a la jǝ jʌ i lɛɨ, mɨsɔ mǝ kɔ lɛ ja jʌ i. Na mɨ bɨlǝngkɛl wo a mʊgɔ katɨ nɨ Yahudawagɔ a sʊwa a dul mɨɨ, mɨ nʊ nɨ wo a la nyɔ, nǝ ji mǝ lɛɨ. Mǝ kela lɛ jǝ́ do kɛl mǝndɨ, jǝ́ yɔ nǝn a kǝga Kaisarɨ.” 12Kwama Festas a kiyo kɛl jǝbɔ nǝb gǝnɨ, nǝngɔ a jǝla gɔ, “Ń kel mɔʊ ja yɔ nǝn kɛl nɨ a kǝga Kaisarɨ, n daa Kaisarɨ mʊ shu lɛ woi.”
Bulus A Kǝga Agaribasɨ Jǝbɔ Barniki
13Kumtɨnɔ a shui, fɔlɔ Agaribas jǝbɔ kɨla gɔ Barniki ja bɛ a Kaisar sǝ ba ja nǝ Festas dʊʊn. 14Ja maa kumɔ a gǝlala fʌleni, nǝngɔ Festas a bɛ nǝn kɛl Bulusi a daa fɔlɔgɔ woi. Festas a sʊwa gɔ, “Kaa balɨ wɔ wʊnɨ Filikus a bǝla mɨ a lɔsomii. 15Kwama mǝ shu a Urushalimaɨ, dʊʊm nǝbkǝlamɔ jǝbɔ dʊʊm Yahudawagɔ a bɛ mɨ nǝn katǝm kɛl balɨ nɨɨ. Ja kela ɨ gɔ n mwatɨ gǝm borang bwaa.
16“Nǝngɔ mǝ gar jim mǝʊ n ke bɔ jǝfʊlǝn nǝbɔ Romaɨ nǝn maa nǝ bwɨlangkɛl gǝm borang nyɔ. A bʊm nyɔ ja bɛ nǝn gɔ a kǝga nǝbɔ a ka kɛl gǝnɔ kǝga jǝbɔ kǝgaɨ. Jǝ nǝ gǝn nǝ talɨ, sǝ ga jǝg dul gǝnɔ a katǝm kɛl nɨ ja maa gǝmɨ.
17“N dul kɛl nɨ ja bɛ jǝbɔ mǝ fǝɨ, mǝ ta bɔ bʊtɔ. Nǝn tǝmsɛlɨ nǝngɔ mǝ gwi daa yɨm borangɨ, nǝngɔ mǝ dǝg ja bɛ nǝn balɨ nɨɨ. 18Nǝb katǝm gǝnɔ a guni, ja sʊwa bɔ kaa bwɨlangkɛl nɨ mǝ bʊʊla lɛ mǝʊ nǝn gɔ a maaɨ. 19Ja sʊwala katɨ nɨ ja jǝla bɔ nǝn Bulusi a dul bwangtǝm jǝfʊlǝn jini, jǝbɔ Yesu wʊnɨ a bʊlaɨ, wʊnɨ Bulus sʊtǝn sʊwatǝmɔ lɛ gɔ nǝn kʊlɨɨ. 20Mǝ tǝmɨ mǝ dwal bɔ kanga mǝ fɨɨm kanjǝl nɨ lɛɨ, nǝngɔ mǝ bʌ Bulus mǝʊ na gǝ jǝla jǝlaɨ, ga yɔ a Urushalima sǝ ja maa gǝm borang wo a dul katɨ nɨɨ. 21Bulus a saa gɔ ja tɨ nǝn kɛl gǝnɔ sǝ dalɨ fɔlɔgɔ, Kaisar, a biyo gǝm borangɔ. Nǝngɔ mǝ nǝ diil mǝʊ ja tɔɔ gǝn, a la nǝn a kwama nɨ mǝ tʊng gǝn nɛ a daa Kaisar woi.”
22Nǝngɔ Agaribas a sʊwa Festas gɔ, “Mǝ tǝmɨ mǝ swɨ swɨ n nyʊwa balɨ nɨ nǝn kang mɨ.”
Festas a sʊwa gǝn gɔ, “Mʊ nyʊwa gǝn nyʊwa fʌng.”
23Nǝn tǝmsɛlɨ nǝngɔ Agaribas jǝbɔ Barniki ja bɛ a dʊʊl fɔlɔnɨ, ja dɔ kan mʊrkatǝmɔ dakini jǝbɔ daltɔ dʊʊm sʊwajaamɔ jǝbɔ nǝbɔ jǝ nyʊwa lɛ nǝn a tuulɔ gɨɨ. Nǝngɔ Festas a nǝ ji gola gɔ ja dɔ nǝn Bulusi. 24Nǝngɔ Festas a sʊwa gɔ, “Fɔlɔ Agaribas jǝbɔ nǝb nɨ gwam dakini jǝbɔ nǝnɨ, jǝ́ kuwo balɨ nɨ! Yahudawagɔ gwam ja bɛ nǝn kɛl gǝnɔ a daa mǝ woi a Urushalima jǝbɔ fɔ a Kaisar. Jǝ gaba wulong lɛ gɔ a bʊm bɔ ja bǝla gǝn nǝn kʊlɨ. 25A mɨɨ mǝ kuwo bɔ a maa jʊ nɨ a la jǝ jʌ gǝn nɛɨ. Gǝ nǝn kang gǝn a saa gǝ ja yɔ nǝn gɔ a daagɔ fɔlɔ Kaisarɨ, nǝngɔ mǝ mǝ tʊng gǝn tʊng a daa gǝ woi. 26Mɨ mǝ nǝn kɛl nɨ mǝ mʊla tɛlalɔ mɨ gǝm lɛ a dul gǝnɨ. N dul kɛl nɨ mǝ bɛ nǝn gɔ a kǝga jeni, a bʊm a laa jǝlɨ n kǝga mʊn Fɔlɔ Agaribas. Na bǝ fɨɨ gǝnɨ kɛna mǝ nya jʊ nɨ lɛ mǝ mʊla lɛɨ. 27A kuwotǝm mǝndɨɨ, n ke bɔ dǝngdǝng ja tʊng bwɛ lɔsomii a daagɔ fɔlɔ Kaisar woi, na ja sʊwa bɔ bwɨlangkɛlɔ a maaɨ.”
Attualmente Selezionati:
Maajɨ Bɛtɔ Twamagɨɨ 25: DBD
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©️2024 Luke Initiative for Scripture Translation
