रोमियों 3
3
1यहुदी हैबे ते का लाभ या खतना कराबे ते का फायदा है? 2हर तरैह ते भौत कछू, चौंकि सबनते पैहले परमेस्वर कौ वचन यहुदिन कूं सौंपौ गयौ हतो। 3अगर यहुदिन में ते कछू भरोसे योग्य नांय निकरे, तौ का भयौ? का बिनके भरोसे योग्य नांय निकरबे ते परमेस्वर भरोसे योग्य नांय रैहबेगौ? बिलकुल नांय। 4भलेई हरेक लोग झूंठे निकर जाबें, पर परमेस्वर सच्चौ ठहरैगौ। जैसौ कै पबित्र सास्त्र में लिखौ भयौ है कै,
“तू अपनी कही भयी बातन में धरमी ठहरायौ जा सकै,
और जब तेरौ न्याय होबे तब जीत पा सकै।”
5जामारै अगर हमारौ अधर्म परमेस्वर की धारमिकता कूं दिखातै, तौ मैं जि आदमी के स्वभाब के अनुसार कैह रयौऊं, का परमेस्वर अन्याय नांय करत, जब बू हमें दन्ड देतै? 6बिलकुल नांय। अगर परमेस्वर अन्यायी होतौ तौ बू संसार कौ न्याय कैसे कर सकतौ?
7पर कछू लोग कह सकतै कै, “मेरे झूंठ की बजैह परमेस्वर की सच्चाई और जादा उजागर होतै, तौ जाते वाकी महिमाई होतै, फिरऊ मोय दोसी चौं ठहरायौ जातै?” 8फिर चौं नांय कहें, “तौ आओ, हम बुराई करैं, जाते भलाई उत्पन्न होबे”? जैसौ कै कछू लोग हमारे बारे में ऐसौ कैहकै हमें बदनाम करतै कै, हम ऐसौ कैहतैं। ऐसे लोगन कूं दोसी ठहरायौ जाबौ ठीक है।
कोई धरमी नांय
9तौ फिर हम का कहें? का हम यहुदी, गैर यहुदिन ते काऊ तरैह ते अच्छे है, नांय बिलकुल नांय। चौंकि हम पैहलेई यहुदी और गैर यहुदिन के बारे में जि कैह चुके हैं कै, बे सबके सब पाप के वस में हैं। 10जैसौ के पबित्र सास्त्र में लिखौ भयौ है,
“कोई धरमी नांय, एकऊ नांय।
11कोई समझदार नांय, एकऊ नांय।
कोई ऐसौ नांय, जो परमेस्वर कूं खोजतौ होबे।
12सब भटक गये हैं,
बे सबई निकम्मे बन गये,
कोई भलाई नांय करत, एकऊ नांय।
13उनकौ गलौ खुली भयी कबर के जैसे है,
बे अपनी जीब ते झूंठ बोलतैं।
बिनके होटन के नीचे सांप कौ जहर है।
14बिनकौ मौंह साप और कड़बाहट ते भरौ भयौ है।
15हत्या करबे काजै बे हर दम उतावले रैहतैं।
16बे ज्हांऊं जातै मांपै नांस और कलेस लातैं।
17बे सान्ती कौ रस्ता नांय जान्त।
18बिनकी आँखन में परमेस्वर कौ भय नांय।”
19अब हम जि जानतैं कै, व्यबस्था जो कछू कैहतै, बू बिनई लोगन ते कैहतै, जो व्यबस्था कूं मानतैं। ताकि हर एक कौ मौंह बन्द करौ जा सकै और परमेस्वर के सामने सबरी दुनियां दन्ड के लायक मानी जाबै। 20#गला 2:16 जामारै व्यबस्था के कामन के द्वारा कोई आदमी परमेस्वर के सामने धरमी नांय मानों जाबेगौ। पर व्यबस्था केई द्वारा पाप की पैहचान होतै।
भरोसे के द्वारा धारमिकता
21पर अब बास्तव में लोगन के काजै जि बतायौ गयौ है कै, परमेस्वर व्यबस्था के बिनाई बाय अपने काजै धारमिकता कैसे बनातै। जाकी गबाही व्यबस्था और परमेस्वर की ओर ते बोलबे बारे देतैं। 22#गला 2:16 परमेस्वर ते मिलबे बारी धारमिकता ईसू मसीह पै भरोसौ करबे ते मिलतै, सब भरोसौ करबे बारेन काजै है, चाहे बे कोई चौं ना होबैं। 23चौंकि सबन नें पाप करौ है और सब परमेस्वर की महिमा ते दूर हैं। 24पर परमेस्वर की किरपा ते सब कूं सेंत मेंत में पापन की छमा मिली है, चौंकि ईसू मसीह नें सबन कौ उद्धार करौ है। 25परमेस्वर ने ईसू मसीह कूं, बामें भरोसे के द्वारा पापन ते छुटकारौ दिलाबे काजै लोगन कूं दयौ। बानें जि काम ईसू मसीह के बलिदान के रूप में करौ। ऐसौ जि साबित करबे काजै करौ गयोओ कै परमेस्वर सहनसील है चौंकि बानें पैहले के लोगन कूं बिनके पापन कौ दन्ड दये बिना छोड़ दयौ हतो। 26आजऊ अपनों न्याय दिखाबे काजै बू न्यायपूर्न है और बिन सबन कौ न्याय करबे बारौऊ है, जो ईसू में भरोसौ करतै।
27जामारै काऊऐ अपने पै घमन्ड करबे कौ अधिकार नांय रहौ। किस व्यबस्था की बजैह ते जि अधिकार जातौ रहौ? जि करम कान्ड की व्यबस्था की बजैह ते नांय, पर भरोसे की व्यबस्था की बजैह ते भयौ है। 28जाते हम जान सकतै कै लोग व्यबस्था के करम कान्ड के द्वारा नांय पर भरोसे के द्वारा धरमी ठहरतै। 29का परमेस्वर केवल यहुदिन कौ परमेस्वर है? का बू गैर यहुदिन कौ परमेस्वर नांय? हाँ, पक्कौ बू गैर यहुदिन कौऊ परमेस्वर है। 30#गला 3:20 चौंकि केवल एकई परमेस्वर है जो खतना बारेन कूं भरोसे ते और बिना खतना बारेन कूंअंऊ बाई भरोसे ते धरमी ठहराबेगौ। 31तौ का, हम भरोसे के आधार पै व्यबस्था कूं बेकार ठहरा रये हैं? बिलकुल नांय। पर हम तौ व्यबस्था कूं और जादा सक्तीसाली बना रये हैं।
Attualmente Selezionati:
रोमियों 3: BRAJ
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
NonCommercial-NoDerivatives 4.0 International (CC BY-NC-ND 4.0)
