Markus 8
8
Dit 8. Capitel.
1Ön di salw Dågen, diär en gurt Kär Lid biarküder wiär, en nönt hed tö iten, rööp Jesus sin Lirlings tö sik, en said tö jam:
2Hat jammert mi om di Kär Lid, for ja sen nü tri Dågen bi mi blewwen, en ja hå nönt tö iten.
3En wan ik jam nu nügtern van mi tüs gung let, wild ja üp di Wei forsmagte. For Sommen wiär van firens kjemmen.
4Sin Lirlings swåret höm: Hurvan nem wü Broad hjir ön di Wösteni, dat wü jam sådige?
5En hi fraget jam: Hur manning Broad ha I? Ja said: Sowen.
6En hi boad di Kär, dat ja jam lagert üp di Öörd. En hi noom di sowen Broad, en danket, en broks, en döds sin Lirlings, dat ja-s voarli skuld, en ja leid di Kär voar.
7En ja hed en litjet Fesk, en hi danket, en said, dat ja dit uk voarli skuld.
8En ja hå iten en sen sat uden; en ja noom di Brokken, diär aurblewwen wiär, sowen Korrew vol.
9En di Kär, diär iten hed, wiär hen bi vjurdüsend, en hi let jam gung.
10En dådelkst stapt hi aur ön en Skep me sin Lirlings, en kâm ön di Gegend van Dalmanutha.
11En di Farisäers ging üt, en begent höm tö befragin; stelt höm üp di Prōw, en forlangt van höm en Teken van Hemmel.
12En hi hålet sa-n diip Holsik ön sin Geist, en said: Wat sjukt dag döt Geslegt Teken? Wårelk, ik si ju: Döt Geslegt skel niin Teken dön ud.
13En hi forlet jam, en stapt weder aur ön-t Skep, en foar aur tö di üder Sid.
14En ja hed-t auriten, Broad me tö nemmen, en hed ek moar üs jen Broad bi jam ön-t Skep.
15En hi boad jam en said: Sé tö, nem ju ön Agt voar di Farisäers jår Süring, en voar di Süring van Herodes.
16En ja tågt hen en weder, en said tö arküder: Dit est, dat wü niin Broad me nommen hå.
17En Jesus fornoom dit, en said tö jam: Wat aurli I nü dag, dat I niin Broad hå? Fornem I jit nönt en forstūn I-t jit ek? Hå I jit sa en starrig Hart ön ju?
18Hå Ogen, en se ek, hå Oaren, en hīr ek? En täänk er ek om?
19Diär ik fiif Broad brok foar di fiif düsend Man, hur vūl Korrew vol Brokling I da âpheewt? Ja said: Twelf.
20Mar diär ik di sowen brok foar vjur düsend, hur vūl Korrew vol noom I da âp? Ja said: Sowen.
21En hi said tö jam: Wat fornem I jit nönt?
22En hi kam jen Bethsaida: En ja brågt en Blinden tö höm, en boad höm, dat hi höm önråket.
23En hi noom di Blind bi Hund, en fört höm bütten di Flekken üt, en spüttet ön sin Ogen en leid di Hunden üp höm, en fråget höm, of hi wat såg?
24En hi lukket âp en said: Ik se Mensken gungen#8.24 Die Endung -en ist später hinzugefügt worden., allik üs se ik Bomer.
25Diärna leid hi weder di Hunden üp sin Ogen, en fing höm tö âptölukkin; en hi wåd weder herstelt, dat hi Alles skarp se küd.
26En hi stjürt höm tüs, en said: Gung ek iin ön di Flekken, en si-t tö Nemmen ön di Flekken.
27En Jesus en sin Lirlings ging üt üp Marked van di Stadt Cäsarea Filippi. En üp di Wei fraget hi sin Lirlings en said tö jam: Hokken si di Lid, dat ik sen?
28Ja swåret: Ja si, dü best Johannes di Döper; Sommen si, dü best Elias; Sommen, dü best jen van di Profeten.
29En hi said tö jam: Mar I, hokken si I, dat ik sen? Diär swåret Petrus, en said tö höm: I sen Christus.
30En hi forboad jam strääng, dat ja Nemmen wat si skuld van höm.
31En hi begent jam tö liren: Di Menskenseen mut vuul lid, en forstöt ud van di Olderlid en Opperpröster, en Skreftlirten, en om-t Lewent brågt ud en na tri Dågen âpstun.
32En hi sprok dit Uurd fri üt. En Petrus fing höm hjårt tö höm, en wild höm ofreed.
33Mar hi wäänt höm om, en lukket sin Lirlings ön, en formånet Petrus, en said: Gung agter mi, dü Satan, for dü menst ek, wat göttelk, mar wat menskelk es.
34En hi rööp di Kär tö sik me samt sin Lirlings, en said tö jam: Hokken mi eterfölge wel, di forlögne sik salw, en nem sin Krüts üp sik en fölge mi eter.
35For hokken sin Lewent behoald wel, di wel-t forlees, en hokken sin Lewent forlast om min wel en dit Evangiljes wel, di wel-t behoald.
36Wat helpt et di Mensk, wan hi uk di hile Warld went, en sin Seel lad Skåd?
37Of wat kjen di Mensk iiw, dat hi sin Seel liset?
38Mar hokken sik voar mi en min Uurd skammet mung dös wanredig en sendig Geslegt, voar höm wel di Menskenseen sik uk skamme, wan hi komt ön sin Vaders Herligheid me di hellig Engeler.
Attualmente Selezionati:
Markus 8: NFNT
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Translated by Peter Michael Clemens (1804-1870)
