રોમનોનેં પત્ર 11
11
ઇસરાએંલ ઇપેર પરમેશ્વર ની દયા
1એંતરે હારુ હૂં કું હે, પરમેશ્વરેં પુંતાનં મનખં નેં સુંડ નહેં દેંદં, કેંમકે હૂં હુંદો તે ઇસરાએંલ ન મનખં મનોસ એક માણસ હે, ઇબ્રાહેંમ ની પીઢી નો અનેં બિન્યામીન ના ઘરાણા નો હે. 2હૂં ફેંર કું હે કે પરમેશ્વરેં, પુંતાનં મનખં નેં સુંડ નહેં દેંદં, ઝેંનનેં હેંને પેલ થકીસ પસંદ કર લેંદં હેંતં, તમું જાણો હે કે પવિત્ર શાસ્ત્ર મ એલિય્યાહ ભવિષ્યવક્તા ના બારા મ હું કે હે, વેયો ઇસરાએંલ ન મનખં ના વિરુધ મ પરમેશ્વર નેં એંમ લાળો કરે હે? 3“હે પ્રભુ, એંનવેં તારં ભવિષ્યવક્તં નેં માર દડ્યા, અનેં તારી વેદજ્યી નેં હુદી નાશ કર દડજ્યી હે, અનેં તારી ઇપેર વિશ્વાસ કરવા વાળં મનો હૂં એંખલો જીવતો રિયો હે, અનેં વેય મનેં હુંદં માર દડવા માંગે હે.” 4પુંણ પરમેશ્વરેં એલિય્યાહ ભવિષ્યવક્તા નેં કેંદું, “મેંહ મારી હારુ હાત હજાર મનખં નેં બસાવેં રાખ્ય હે, ઝેંનવેં બાલ દેંવતા ની મૂર્તિ ની આરાધના નહેં કરી.” 5ઠીક ઇવીસ રિતી એંના ટાએંમ મ પરમેશ્વર ના અનુગ્રહ નેં લેંદે, એંનં યહૂદી મનખં નો એક નાનહોક ટુંળો હે, ઝેંનેં પરમેશ્વરેં પુંતાનં હાસં મનખં ના રુપ મ પસંદ કર્ય હે. 6ઇયુ પરમેશ્વર ના અનુગ્રહ થકી થાયુ હે, નહેં કે તાજં કામં કરવા થકી થાયુ, અગર તાજં કામં કરવા થી થાતું, તે ફેંર પરમેશ્વર નું અનુગ્રહ, અનુગ્રહ નેં કેંવાતું.
7હેંનું પરિણામ ઇયુ હે કે ઇસરાએંલ ન મનખંવેં ધર્મી બણવા ની કોશિશ કરી, પુંણ વેય સફળ નેં થાય. પુંણ ઝી મનખં નેં પરમેશ્વરેં પસંદ કર્ય વેય ધર્મી ઠરાવા મ આય, અનેં અમુક મનખં ન મનં નેં કઠોર કર દેંવા મ આય. 8ઝેંવું પવિત્ર શાસ્ત્ર મ યશાયાહ ભવિષ્યવક્તા દુવારા લખેંલું હે,
“પરમેશ્વરેં હેંનનેં આજ તક
મંદ બુદ્ધિ આલેં મિલી હે,
અનેં ઇવી આંખેં આલજ્યી હે કે ઉગડતી આંખં થી હુંદં નેં ભાળેં સકે,
અનેં એંવા કાંદડા આલ્યા કે વેય હામળે પુંણ હમજેં નેં સકે.”
9અનેં દાઉદ રાજા હુંદો કે હે, “હેંનનું ખાવાનું હેંનં હારુ જાળ અનેં પાહ,
અનેં અવિશ્વાસ હેંનં હારુ દંડ નું કારણ થાએં જાએ. 10હેંનની આંખેં આંદળી થાએં જાએ,
એંતરે કે વેય ભાળેં નેં સકે, અનેં તું હમેશા હેંનનેં મુસિબત મ રાખ.”
11હૂં એંમ કું હે કે ઇસરાએંલ ન મનખં નેં વિશ્વાસ નેં કરવા થી હેંનનેં પાસું ફેંર કેંરં યે તારણ નેં મળે એંવું નહેં, પુંણ હેંનં ના અવિશ્વાસ થી બીજી જાતિ ન મનખં નેં તારણ મળે, કે હેંનં દુવારા ઇસરાએંલ ન મનખં બળે. 12અગર ઇસરાએંલ ન મનખં ના અવિશ્વાસ અનેં પરમેશ્વર થી સિટી થાવા થી બીજી જાતિ ન બદ્દ મનખં નેં આશિષ મળી હે, તે ઝર વેય બદ્દ પાસં પરમેશ્વર કન આવેં જાહે તર હઝુ વદારે આશિષ મળહે.
બીજી જાતિ ન મનખં નું તારણ અનેં કલમ કરવા નો દાખલો
13હૂં હાવુ તમનેં બીજી જાતિ ન મનખં નેં કું હે. ઝર હૂં તમારી વસ મ પરસાર કરવા હારુ મુંકલવા મ આયો હે, પુંતાની સેવા ની બડાઈ કરું હે, 14એંતરે કે કીવી બી રિતી થી હૂં પુંતાની યહૂદી જાતિ ન મનખં મ તમાર હામેં બળતરા પેદા કરેં સકું, અનેં એંનેં દુવારા મારી જાતિ ન મનખં મહં અમુક મનખં નું તારણ કરાવું. 15કેંમકે ઝર પરમેશ્વર દુવારા, ઇસરાએંલ ન મનખં નેં સુંડ દેંવા થી દુન્ય ન બીજં બદ્દ મનખં નો પરમેશ્વર હાતેં મેળ-ભાવ નું કારણ થાયુ, તે હેંનનો ફેંર પાસો પરમેશ્વર ઇપેર વિશ્વાસ કરવો, મરેંલં મહું પાસું જીવતું થાવા નેં બરુંબર વેંહે. 16ગુંધેંલા લુંઠ મહું થુંડોક લુંઠ લેંનેં પરમેશ્વર નેં અર્પણ કરવા થી પૂરો લુંઠ પવિત્ર કેંવાએ હે, અનેં ઝર એક ઝાડ ન મૂળં પવિત્ર વેહ તે હીની ડાળજ્યી હુદી પવિત્ર કેંવાએ હે.
17ઇસરાએંલ ન મનખં એક તાજા જેતૂન ના ઝાડ ની ડાળજ્યી જુંગ હે, અનેં ઇબ્રાહેંમ, ઇસાગ, અનેં યાકૂબ હેંના ઝાડ ન મૂળં નેં જુંગ હે. વેયે અમુક ડાળજ્યી ભાગેં દડવા મ આવજ્યી, અનેં તમું બીજી જાતિ ન મનખં ઝી જંગલી જેતૂન ના ઝાડ ની ડાળજ્યી જુંગ હે, હેંના તાજા જેતૂન ના ઝાડ મ કલમ કરવા મ આય હે, એંતરે હારુ ઝીવી રિતી હીની ડાળજ્ય નેં ઝી તાજા જેતૂન ના ઝાડ ન મૂળં ના રસ થકી ફાએંદો થાએ હે, હિવીસ રિતી તમનેં હુદી યહૂદી મનખં ન બાપ-દાદં ને લેંદે આશિષ મળી હે, 18એંતરે હારુ તમું કલમ કરેંલી ડાળજ્યી, ઝી ડાળજ્યી ભાગેં દડવા મ આવજ્યી હે હેંનેં ઇપેર ઘમંડ નહેં કરો, અગર તમું ઘમંડ કરો હે તે ઇયુ જાણ લો, કે મૂળં ડાળજ્ય ને આધારેં નહેં રેંતં, પુંણ ડાળજ્યી મૂળં ને આધારેં રે હે. 19ફેંર તમું જરુર કેંહો હે કે, “તાજા ઝાડ ની ડાળજ્યી એંતરે હારુ ભાગેં દડવા મ આવજ્યી કે, હમું ઝી જંગલી ઝાડ ની ડાળજ્ય જુંગ હે હેંનેં મ કલમ કરવા મ આવજ્યે.” 20ઠીક હે, વેયે તે અવિશ્વાસ ને લેંદે ભાગ દડવા મ આવજ્યી, પુંણ તમું વિશ્વાસ નેં લેંદે ટકેં રેંલં હે, એંતરે હારુ ઘમંડ નહેં કરો, પુંણ પરમેશ્વર ની બીક રાખો. 21કેંમકે ઝર પરમેશ્વરેં અસલી ડાળજ્યી નેં કાપેં દડજ્યી હે, તે તમનેં હુંદં કાપેં દડહે. 22એંતરે હારુ પરમેશ્વર દયાળુ તે હે, પુંણ હેંનેં હાતેં-હાતેં કડક હુંદો હે, ઝી ભાગેં દડવા મ આય હેંનં ઇપેર પરમેશ્વર નો ગુસ્સો આયો, પુંણ તમારી ઇપેર દયા કરી હે, અગર તમું હીની દયા મ નેં બણેં રો તે તમનેં હુંદં ભાગેં દડવા મ આવહે. 23અનેં અગર વેય વિશ્વાસ કરહે, તે હેંનનેં હુંદં પાસં કલમ કરવા મ આવહે, કેંમકે પરમેશ્વર હેંનનેં ફેંર કલમ કરેં સકે હે. 24કેંમકે અગર તમું ઝી જંગલી જેતૂન ના ઝાડ જુંગ હેંતં, હેંના ઝાડ મહં કાપેંનેં, તાજા જેતૂન ના ઝાડ ની ડાળજ્યી કલમ કરવા મ આવી, તે ફેંર તાજા જેતૂન ના ઝાડ ની ડાળજ્યી નેં ઝી પેલ કાપેં દડજ્યી હીત્યી, તે વેયે પુંતાનાસ ઝાડ મ કેંમ નેં કલમ કરવા મ આવહે.
ઇસરાએંલ ન બદ્દ મનખં નું તારણ
25હે વાલોં, ખેંતુંક એંવું નેં થાએ કે તમું ઝી બીજી જાતિ ન હે પુંતાનેં ઇપેર ઘમંડ કરવા મંડો, એંતરે હૂં નહેં સાહતો કે તમું એંના ભેદ થી અજણ્ય રો, કે ઝર તક તમારી મન બદ્દ મનખં પરમેશ્વર કન નેં આવેં જાએ, તર તક ઇસરાએંલ ન મનખં મનો એક ભાગ એંવોસ કઠોર રેંહે. 26અનેં એંનેં બાદ ઇસરાએંલ ન બદ્દ મનખં તારણ મેંળવહે. ઝેંવું પવિત્ર શાસ્ત્ર મ લખેંલું હે, “તારણ આલવા વાળો યરુશલેમ સેર થી આવહે, અનેં યાકૂબ ની પીઢી ન મનખં ના પાપ માફ કરહે. 27અનેં ઝર હૂં હેંનં ના પાપ માફ કર દેં, તર મારો હેંનં હાતેં કરેંલો ઇયો કરાર પૂરો થાહે.” 28ઇસરાએંલ ન મનખં તાજા હમિસાર ના સબંધ મ પરમેશ્વર ન વેરી હે, અનેં ઇયુ તમારી હારુ ફાએંદેમંદ બણેંજ્યુ હે, પુંણ પસંદ કરવા ના સબંધ મ હેંનં ન બાપ-દાદં ને લેંદે પરમેશ્વર હેંનનેં પ્રેમ કરે હે. 29કેંમકે પરમેશ્વર ઝેંનેં પસંદ કરે હે અનેં ઝેંનેં આશિષ આલેં હે, હેંનં થી કેંરં યે પુંતાનું મન બદલેંનેં પાસું નહેં લેંતો. 30કેંમકે ઝેંમ તમેં બીજી જાતિ ન મનખંવેં પેલ પરમેશ્વર ની આજ્ઞા નેં માની, પુંણ હમણં ઇસરાએંલ ન મનખં દુવારા આજ્ઞા નેં માનવા થી પરમેશ્વરેં તમારી ઇપેર દયા કરી. 31વેમેંસ હેંનવેં હુદી હાવુ આજ્ઞા નેં માની, એંતરે હારુ કે ઝીવી રિતી તમારી ઇપેર દયા કરવા મ આવી હે વેમેંસ હેંનં ઇપેર હુદી દયા કરવા મ આવે. 32કેંમકે પરમેશ્વરેં બદ્દ મનખં નેં આજ્ઞા નેં માનવા ને લેંદે બંદી બણાવેંનેં રાખ્ય હેંતં, કે વેયો બદ્દ મનખં ઇપેર દયા કરે.
પરમેશ્વર ની સ્તુતિ
33પરમેશ્વર ની દયા નું ધન અનેં બુદ્ધિ અનેં જ્ઞાન વાસ્તવ મ ઘણં મહાન હે, અનેં હેંના ફેસલા અનેં તરિકા કુઇ નહેં જાણેં સક્તું. 34પરમેશ્વર ન વિસારં નેં કુઇ નહેં જાણેં સક્તું, અનેં હેંનેં કુઇ સલાહ નહેં આલેં સક્તું. 35અનેં કઇને યે પેલ થી પરમેશ્વર નેં કઇ નહેં આલ્યુ, અનેં નેં હેંનેં પાસું આલવું પડે. 36કેંમકે બદ્દું પરમેશ્વર થી હે અનેં બદ્દું હેંનેસ બણાયુ હે, અનેં બદ્દું હેંનુંસ હે, હીની મહિમા જુંગ-જુંગ થાતી રે. આમીન.
Attualmente Selezionati:
રોમનોનેં પત્ર 11: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.
