રોમનોનેં પત્ર 10
10
1હે વાલોં, મારા મન ની અસ્યા અનેં પરમેશ્વર નેં અરજ ઇયે હે કે, પરમેશ્વર ઇસરાએંલ દેશ ન મનખં નેં બસાવ લે. 2કેંમકે હૂં હેંનની ગવાહી આલું હે, કે હેંનનેં પરમેશ્વર નેં જાણવા ની ઘણી અસ્યા હે, પુંણ વેય નહેં હમજતં કે કેંકેંમ અસલ રિતી થી હેંનેં જાણે. 3કેંમકે હેંનવેં ઇયુ ધિયાન નેં દેંદું કે પરમેશ્વર મનખં નેં ધર્મી ઠરાવે હે, પુંણ વેય પુંતાના તરિકા થી ધર્મી બણવા ની કોશિશ કરેં રિય હેંતં, એંતરે હારુ વેય પરમેશ્વર ની નજર મ ધર્મી નેં બણેં સક્ય. 4કેંમકે ઇસુ મસીહ નેં આવવા થી મૂસા ના નિયમ નું મક્ષદ પૂરુ થાએંજ્યુ હે, એંતરે હારુ હાવુ ઝી કુઇ ઇસુ મસીહ ઇપેર વિશ્વાસ કરે હે, હેંનેં પરમેશ્વર ધર્મી ઠરાવે હે.
તારણ બદ્દ મનખં હારુ હે
5પવિત્ર શાસ્ત્ર મ મૂસો નિયમ ને આધારેં ધર્મી બણવા ના બારા મ લખે હે કે, “ઝી કુઇ મનખ હેંના નિયમ પાળે હે વેયુ હેંનેં દુવારા જીવતું રેંહે.” 6પુંણ પવિત્ર શાસ્ત્ર મ લખેંલું હે કે ઝી મનખં વિશ્વાસ થી ધર્મી ઠરાવા મ આવે હે, વેય પુંતાના મન મ એંમ નેં વિસારે કે “ઇસુ મસીહ નેં નિસં લાવવા હારુ, હરગ ઇપેર કુંણ સડહે?” 7કે પસે “ઇસુ મસીહ નેં મરેંલં મહો જીવતો કરેંનેં ઇપેર લાવવા હારુ, અધોલોક મ કુંણ ઉતરહે?” 8એંનું મતલબ એંમ હે કે, “વસન તારી નજીક હે, તારા મોડા મ અનેં તારા મન મ હે,” આ વેયુસ વિશ્વાસ નું વસન હે, ઝી હમું પરસાર કરજ્યે હે, 9કે અગર તું પુંતાના મોડા થી ઇસુ નેં પ્રભુ માનેંનેં કબુલ કર લે, અનેં પુંતાના હૃદય થી વિશ્વાસ કરે, કે પરમેશ્વરેં ઇસુ નેં મરેંલં મહો પાસો જીવતો કર્યો હે, તે પાક્કું પરમેશ્વર તારું તારણ કરહે. 10કેંમકે ધર્મી બણવા હારુ હૃદય થી વિશ્વાસ કરવા મ આવે હે, અનેં તારણ મેંળવવા હારુ પુંતાના મોડા થી કબુલ કરવા મ આવે હે. 11કેંમકે યશાયાહ ભવિષ્યવક્તાવેં પવિત્ર શાસ્ત્ર મ ઇસુ મસીહ ના બારા મ લખ્યુ હે, “ઝી કુઇ મનખ હેંનેં ઇપેર વિશ્વાસ કરહે હેંનેં કેંરં યે લાજેં નેં મરવું પડે.” 12સાહે વેયુ મનખ યહૂદી વેહ કે પસે યૂનાની વેહ, એંતરે હારુ કે પરમેશ્વર બદ્દનો પ્રભુ હે, અનેં હેંનેં કન મદદ માંગવા વાળં નેં વેયો બસાવે હે. 13કેંમકે પવિત્ર શાસ્ત્ર મ લખેંલું હે, “ઝી કુઇ પ્રભુ નું નામ લેંહે વેયુસ તારણ મેંળવહે.”
14પુંણ ઝેંનવેં હેંનેં ઇપેર વિશ્વાસ નહેં કર્યો, વેય હેંનેં કન મદદ કેંકેંમ માંગે? અનેં અગર ઝેંનવેં હેંના બારા મ નહેં હામળ્યુ, તે વેય હેંનેં ઇપેર કેંકેંમ વિશ્વાસ કરે? અનેં ભાષણ આલવા વાળુંસ નેં વેહ તે કેંકેંમ હામળે? 15અનેં અગર પરસાર કરવા હારુ મુંકલવા મ નેં આવે, તે કેંકેંમ પરસાર કરે? ઝેંવું પવિત્ર શાસ્ત્ર મ લખેંલું હે, “તાજો હમિસાર હમળાવા વાળં નું આવવું કીતરી અસલ વાત હે.” 16પુંણ બદ્દ મનખંવેં હેંના તાજા હમિસાર નેં ગરહણ નહેં કર્યો, યશાયાહ ભવિષ્યવક્તા કે હે, “હે પ્રભુ, કઇને હમારા તાજા હમિસાર ઇપેર વિશ્વાસ કર્યો હે?” 17એંતરે હારુ પરસાર હામળવા થી વિશ્વાસ પેદા થાએ હે, અનેં પરસાર ઇસુ મસીહ ના વસન થી થાએ હે.
18એંનો મતલબ એંમ નહેં કે હેંનવેં નહેં હામળ્યુ,
હામળ્યુ તે જરુર હે, કેંમકે પવિત્ર શાસ્ત્ર મ લખેંલું હે,
“હેંનના પરસાર કરવા ની વાણી ધરતી ન દરેક મનખં કન,
અનેં હેંનનું વસન દુન્ય ની દરેક જગ્યા પુગિજ્યુ હે.”
19અનેં હૂં એંમ હુંદો કું હે કે ઇસરાએંલ ન મનખંવેં હુંદું હામળ્યુ હેંતું, પેલ પ્રભુ પરમેશ્વરેં મૂસા દુવારા એંમ કેંદું,
“હૂં બીજી જાતિ ન મનખં દુવારા,
તમારા મનં મ બળતરા ઇબા કરેં,
હૂં તમનેં બીજી જાતિ ન મુરખ મનખં દુવારા ગુસ્સો સડાવાડેં.” 20ફેંર યશાયાહ ભવિષ્યવક્તા હિમ્મત થી કે હે, “ઝી મનખં મનેં જુંવતં નેં હેંતં, હેંનવેં મનેં જુંએં લેંદો,
અનેં ઝી મનખં મારા બારા મ પુસતં હુંદં નેં હેંતં હેંનં ના વસ મ હૂં હઝર થાયો.”
21પુંણ ઇસરાએંલ ન મનખં ના બારા મ પરમેશ્વર યશાયાહ ભવિષ્યવક્તા દુવારા એંમ કે હે,
“હૂં આખો દાડો મારી આજ્ઞા નેં માનવા વાળં અનેં હુંમલો કરવા વાળં મનખં નેં, મારી કન પાસં વળવા બુંલાવતો રિયો.”
Attualmente Selezionati:
રોમનોનેં પત્ર 10: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.
