WAROMA 9
9
1Njiideda kya lohi njii Kristo-hu, njihamba wongopfo, na ngo tsa mrimenyi foko tsii-njiwanze nyi Mumuyo Mwele tso tsanjiikanya ihoṟotsa kiṟingishyo ki. 2Ke njiwodo mnu mfowa na mawawio ipfo ngoonyi na wukiwa wochitochatocha kitsitsi kipfa kya wandu wako lui samu imu. 3Kyamba njiwekundi ke inyi njimonyi njitano msese kyewa lyenenga wanawawama wako wa mkambo fumu na inyi wawehenda ikiṟo. 4 Wo nyiwo wai Waisraeli sa Ruwa alewasambuṟa wawe wana wake, kawasumba wuitoṟi na mkundana fulya na wuwawaso wulya na wuindi woindya Ruwa na shyasa shilya. 5Na waku walya na wawo, na ipfo kowo Kristo achee apaṟikye kowo ili amefeo mndu, nyio Ruwa mokaa huya-shose moichimbiṟo mlungana. Amenyi.
6Manya chi cha ili idedo lya Ruwa lilachikiepfo. Kyamba chi wandu wose iwo wapaṟikye ko Israeli wai wambuṟe wa Ruwapfo. 7 Cha kipfa chi iwa wai luwa lya Abrahamu wakeri wana wosepfo, Chando Madedo Maele hahambye “Luwa lyapfo nyi lyechiuka ko Isaki.” 8Lyo likeri lile; ke wana wawafee kimbihu chiwo wai wana wa Ruwapfo chila nyi wana wawafee kui kyaasenyi nyiwo sa waitalo ke wai luwa. 9 Kyamba kyaasa kilya nyi, “Alya cha wulalu njechiicha-se njikoye Sara awode mana.”
10Kya indi chi ikyo kyake tupupfo, na kya Rebeka ili awekupfungye wamboṟa awuta ko ichu umu nyio ndeyadu so Isaki. 11 Kyamba kyawo ma indi wana walawendefeo ma walawendewuta kiwe kii kicha kiwe kii kiporu kashika iwio kyewadumbuya, kundu kyama kya Ruwa kyesambuṟa kikae-ho kechitoṟya. 12Kilahendeke kyechiwa na mweke fo ngaata tsa mndu kya indi kiwukye ko Ruwa ichu modika ndaho kikyenyi, nakyo kiwei kiile, ke wawae nyi echisingya manawo. 13 Na wudo ku-kuṟehie ke, “Yakobo nyio njilemkunda indi Esau nyio njilemleha.”
14Aka luhambe luda? Kulako Ruwa nyi aledeko? Manya-le 15 kyamba nyi awie Mose, “Njechisaṟia ichu njechikunda imsaṟia.” 16Alewo koka na wudo kii kindo-kyo kyawa ikundo nyi mndu ang'u iidikyo nyiopfo kya indi kii kya Ruwa mosaṟya amonyi. 17 Kyamba Maṟehyo Maele hahambye kya Farao, “Kitewe ngakuwika mangi nyi kundu njimanyishye kopfo pfinya yako mbode na rina lyako liweongoya ipfo orukenyi kose.” 18Kyasia ng'u Ruwa nekesaṟia icho ose akunda imsaṟia; ichu amdumbuya kyemumiṟa nyi aimumiṟa.
Tuke na osaṟio lo Ruwa
19Kulako nyi ochireeka na inyi nonjiwie, “Nyi kiili Ruwa awonya-se mndu owingo? Kyamba nyi o ku awehodana na kyama kyake?” 20 Hoo iyo ui mndu o wandu; nyi ukeri o ku koanduyana na Ruwa? Aka kindo kiwumbe kitane kyawia mokiwumba, “Nyi kiili untanye kudi?” 21Mowumba chi awode pfinya na kilya alewumba nakuwutye chando akundi kumu kakuwumbya kihia kyechia kumu kakuwumbya-ho sa kyefana. 22Indi Ruwa narie imanyishya shihia shilya shimpfulutsya nyashi tuuke yake, na iloṟa-ho kilya akuidimye nyi ashilelye na wuleeli wung'anyi ma shishitsye ihenda rumatso. 23Nyi kundu nawemanyishya-ho mfoe fo wuitoṟi woke alya shihie-hu shirio nyi wutonga woke isho alesonguo ishiteseheṟya wuitoṟi wulya. 24Nawo nyiso so alelulaha lupaṟikye chi ko Wayuda tupupfo kya indi na ipfo mkambonyi ya wahenu. 25 Kiidikyanyi na kilya ahambye kui dumbu lya Hosea; “Njechilaha fulawei mkambo fuwe mkambo foko. Na ichu alawei mkunde nawe Mkunde oko. 26 Na mwikimbi ipfo kundo wawekewio, Nyo mukeri wandu wakopfo mpfondo wechikaa wasendo wana wa Ruwa menyi-moo.” 27 Na Yesaya apoṟohoṟya Israeli, “Kukoye mfoye fo wana wa Israeli wueshikya cha mbuṟusanga tsa mbai ya ipalyipalyi lya wuyana sa wechikiṟo-ho nyi waangu tupu. 28Kyamba Mndumii nyi echimarisa iwika kitanyo na limu na idumbwo teṟe ipfo sangenyi lyose.” 29 Kiwe chando Yesaya alewesonguo ihamba, “Kima Mndumii Menyi-Matoṟito alawelutsuhaṟya luwa nyi luwewa cha Wasodomu na ifanana na Wagomora.”
Waisraeli na Ndumi ya Sia
30Aka luhambe luda? Nyi kikeri kiile wa mkambo mhenu walawewingya wuhoṟotsu, oshangunyi lo Ruwa wo wakawada wuhoṟotsu, oshangunyi lo Ruwa, kui wuidiki. 31Indi Israeli ili iweiwingya wuhoṟotsu oshangonyi lo Ruwa ikusirye na wuwawaso ileshika ikoya wuwawasopfo. 32Nyi ki kyaduma? Nyi kipfa ilawekuwode kiwanje-hu kya wuidiki indi iwekuwode kiwanje-hu kya mawuto ikakapa mtuulya alya iho-hu lya mtuulya. 33 Chando Madedo Maele hahambie, “Ambuya a ulya ngaleṟya iho lyekapya mtuulya kulya Sioni na piita ya iho yedekesha. Mdu moidikia ichu ai iho lyo echisukapfo.”
Attualmente Selezionati:
WAROMA 9: KIM2
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Kimochi Bible © Bible Society of Tanzania, 2016.
