WAROMA 10
10
1Ee-wo wanawawama, macha ha mrima hanjiwodye kyawo njiwaterewya ko Ruwa wahende wonyo okiio. 2Kyamba nyi ngawawikya kiṟingishyo ke nyi wekekapa mtambakira wechipfula Ruwa, indi chi kya osaṟefo. 3Kyamba ili walaweichi wuhoṟotsu wo Ruwa wakawetambahanya ikulikisha-ho wowo wawenyi nkyo kiletewa walakutambe na wuhoṟotsu wu wo Ruwa. 4Kyamba mtsitsyonyi fo wuwawaso nao Kristo moendie orio mwidiki wuhoṟotsu oshangunyi lo Ruwa.
Okiṟo ko wandu wose
5 Kyamba kilya Mose ahambye kya wuhoṟotsu oshangunyi lo wuwewonyo kui mweeke fo wuwawaso kikeri kiile ke, “Nyi mtanyi mowutana chandu mawawaso hahambie nyio mndu echiwada moo na mweeke fowo.” 6 Kya indi wuhoṟotsu-wu oshangunyi lo Ruwa wuṟukye wuidikinyi wo wuhambye wudi, “Kulawone koihamba, mrimenyi fopfo, nyi o ku echidoya ruvehu?” (Lyo liwewa isotsa Kristo na wanda.) 7“Ang'u nyi o ku echisoka na kulya ko wapfu.” (Lyo liwewa idosa Kristo ipfo ko wapfu naendo na huye.) 8Madedo Maele hahambye. “Idedo lyo lya Ruwa lii afui, naiyo nyi likukerye ipfo dumbunyi lyapfo na ipfo ngoonyi yapfo.” 9Kipfa komkooya kohamba na dumbu lyapfo ke Yesu nyio Mndumii na iidikya koidikya ipfo ngoonyi yapfo ke Ruwa nyi alemṟutsa ipfo wapfunyi nyi ochikiṟo. 10Kyamba lumwidikya kui mrima liende wuhoṟotsu oshangunyi lo Ruwa; na imhamba kui dumbu liwonye mndu okiio. 11 Kyamba Madedo Maele hahambie, “orio mndu ose echimwidikya o echikaa nahoyo nyi sonupfo.” 12Nyiko wandu wose; kwiho mletsano foletsana Wayuda na Wagrikipfo. Kyamba ichu umu nyio Mndumii owo wose nyi aisuṟia iwo wechimterewa wose. 13 Kyamba Madedo Maele hahambie “orio mndu echiterewa kui rina lya Mndumii nyi echikiṟo.”
14Aka wechiidima imlaha wada walamwidikye ngesa? Indi wamwidikye wada walandeshikio mbonyi tsake ngesa? Indi washikio wada mbonyi tsake kulaiho mowaongoya ngesa? 15 A wandu waongwo wada walaiwadume ngesa? Chando kiikiṟehye ke, “Apa ndifo tsa waende ndumi ya Sia chando tsaona.” 16 Kya indi chi wose waleambia Ndumi ya Siapfo. Kyamba Yesaya ahambye, “Hoi Mndumii, nyio-wu aleidikya ndumi yadu?” 17Kyasia wuidiki nyi wokeamtso nyi ndumi, indi ndumi nyi ikurye na idedo lya Kristo.
18 Ang'u njiwesenyi njihambe, Ngesa nyi waleleicho ndumi-yo? Ee-ko. Waleicho Kuwukye mangelele hawo hakadung'ana wanda ii kose, na madedo hawo hakatana hashika kulyando mtsitsio fo wuyana. 19 Ang'u njiwese-se, Kulako Waisraeli walaweichi ngesa? Nao nyi Mose alemhamba, “Inyi njechimutewa muhende inyeng'a wandu walai mkambo, mhenu ineng'a mukunyashe kya mkambo-fu fulaweimpfunde.” 20 Na Yesaya kawekaria kehamba, “Nyi njilekunda ikoyo nyi walya walawekenjipfula, ngawewonekya walya walawewesie mbonyi tsako.” 21 Indi Israeli kaiwia, “Njiwetsinda mkonu fose njechileshia mkambo hako mawoko fulanjiidikie fukawewa mlemeshi.”
Mwanduye fo Ruwa ko Waisraeli
Attualmente Selezionati:
WAROMA 10: KIM2
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Kimochi Bible © Bible Society of Tanzania, 2016.
