Loomë 5
5
N'sikë yimunë Nzaambi
1Mu lyaawu, beeso tweekë baatu bësulëmë mu Nzaambi mu cibilë ci ciminu ciitu i beeso tweekë mu n'sikë yimunë naandi mu Fumwiitu Yeesu Kliistu. 2Mu ciminu mu Yeesu, twabakë muulë wu Nzaambi wunë tun'kalilë tuciindë. Linë lituvangisi sinyeenzi, mati civuufu mu kubakë cikuuku mu bumpumu bu Nzaambi. 3Beeso tuke beenë liyaanji mu simpasi tum'monë, cibilë tuzabisi ti simpasi sin'twaalaangë n'ciimbë moonyi, 4n'ciimbë moonyi yin'vaangësyaangë kuciindë mu simpekaadu i kuciindë kun'vaanaangë civuufu. 5Civuufu be cyooci cisë tufwiisi sonyi ko, cibilë Nzaambi wudukulë luzolo lwaandi mu mitimiitu mu Ciluunzi ci Saantu cyo naandi kutuvaanë.
6Mu bwaawu, bunë beeso tukaambu kubakë likanë mu kubasikilë, Kliistu wufwiilë mu misumici mu ntaangu yo Nzaambi kusitikë. 7Mati simpasi mu kucikunë mu kufwiilë mu cibilë ci muutu wusulëmë. Muutu kupodi kwaandi kufwiilë mu cibilë ci muutu wumboti. 8Kasi Nzaambi watuleesi ti naandi wutuzolisi. Kliistu wufwiilë mu beeso, bunë twabooso mu mësumu. 9Mu luvakulu lwaandi, beeso tweekë baatu bësulëmë fë nduunzi Nzaambi. Buni beeso tun'kaambu kuvukilë mu likaanzi li Nzaambi! 10Beeso twabë simbeenyi si Nzaambi, kasi watuvangisi kuba cindiku yimunë naandi mu lufwa lu Mwanaandi. Kwisilë buni bubwayi aci, bo tweekë mu n'kangulu yimunë naandi, tun'vuukë mu luziingu lu Mwanaandi. 11Beeso tuke beenë liyaanji fë nduunzi Nzaambi mu cibilë ci Fumwiitu Yeesu Kliistu, mu naandi mwaawu twavutulë cindiku yimunë Nzaambi.
Adaamë i Kliistu
12Mu lyaawu, bo bumweekë ti mu muutu mweekë mwaawu lisumu likotilë mu buloongo i mu lisumu li lufwa i mu bwaawu lufwa lwabwilë mu baatu booso, cibilë babooso bësumukë#5.12 cibilë bakë booso basumukë: mu cibilë cyaandi (Adaamë) Ntn 2.17; 3.6,17-19.. 13Bosuku Nzaambi wuvaanë n'kaakë ke Moyiisë, lisumu limwe bangaangë mu buloongo, kasi mu lukaambu lu n'kaakë, lisumu lisye taangë ko.
14Kasi lufwa luvumisi kutoonë Adaamë tee Moyiizë. Lufwa lutukilë yivaandi banë bëkaambu kusumukë mpilë mweekë yi Adaamë, awu wuke cifwaani ci wo wufwenikini kwiisë. 15Kasi fëkeeli mpilë mweekë ko mu likabu libuunë li Nzaambi yimunë libi li Adaamë. Ningë mu cibilë ci lisumu li muutu mweekë mpaapë bëfwa, kuvyookë ofo, muulë Nzaambi i likabu li muutu mweekë, Yeesu Kliistu, biinji bunenë mu mpaapë baatu. 16Likabu li Nzaambi like nteku yin'ka yi lisumu li muutu mweekë. Lufundusu luyisilë mu lisumu li muutu mweekë lisë natë lutabu, kosuku likabu libuunë lin'veewu mu mpaapë tudiifu lin'vaanë n'sulumunu. 17Cibeeni, lufwa lusë n'leesi lutumu lwaandi mu libi li muutu mweekë, mu cibilë ci muutu be woowo. Kasi, mu Yeesu Kliistu vwiili, beeso tun'tambulë bivyokili: bakë booso bën'kwaakë muulë lunduu wu Nzaambi i likabu lu cisalu cyaandi ci luvukulu, bën'zingilë i bëm'waalë mu cibilë ci Kliistu.
18Mu bwaawu, lisumu li muutu mweekë, Adaamë, lisë kuvangisi lutabu lu baatu lumoonyi booso. Bo bumweekë, livaangë lisulëmë li muutu mweekë, Yeesu Kliistu, wun'kobulë baatu lumoonyi booso mu lufundusu i wubëvangisi kuziingë. 19Bwaawu, mu cibilë ci muutu mweekë wukaambu kuwulu Nzaambi mpaapë baatu bëbwa mu lisumu, bo bumweekë, mu cibilë ci luciinzu lu muutu mweekë, mpaapë bisë ba bësulëmë fë nduunzi Nzaambi.
20Bunë n'kaakë watuuci i mësumu misë waalë. Kasi, fanë fën'waalë lisumu, muulë Nzaambi wum'ba lunduu. 21Oboobo, lisumu lyaleesi lutumu lwaandi lu lufwa, bo bumweekë muulë Nzaambi wun'leesi lutumu lwaandi lu n'sulumunu, mu kutunatë mu luziingu lu sakë yi sakë, mu Yeesu Kliistu Fumwiitu.
Attualmente Selezionati:
Loomë 5: NTVIL
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2019, Wycliffe Bible Translators, Inc. and © Alliance Biblique du Congo. All rights reserved.
