Loomë 10
10
1Baanë bë nguli, miinu yin'tiisi mu n'timaami wooso mu kuloombë ke Nzaambi bwiinji Sizwiifë bëvuukë. 2Cyelikë yibëtubilë cimbaanji ti baawu bëke beenë buvavambë mu Nzaambi, kasi buvavambë bwaawu bukeeli ko buwaalë mu luzaabu. 3Licyelikë, baawu bisye bakulë ko buni Nzaambi wun'vangisyaangë baatu kuba bësulëmë fë ntwaalaandi i baawu bisë toombë ntekwaawu yi kuzingilë. Baawu bisye yilekulë ko mu lusalusu lu Nzaambi. 4Cibilë Kliistu wanatë tee ku siitu n'kaakë Moyiizë, bwiinji bakë booso bën'ta maanë bësulëmë fë meeso më Nzaambi.
Luvukulu luke mu wosuku wun'ta maanë mu Fumu
5Tala linë Moyiizë wusonikë mu manë mën'talë likanë mu kuba wusulëmë mu n'kaakë : « Wunë wun'salilë tutumu tu n'kaakë wun'zingilë mu twaawu#10.5 Lev 18.5.. » 6Kasi tala buni naandi wun'tubilë mu likanë mu kuba wusulëmë mu ciminu : « Keelë wulëtubë mu njeveekë : Nani wum'makë ku yilu? » (dedë ti : mu kukululë Kliistu.) 7Keelë wulëtubë : « Nani wun'kulukë ku buluunji bu mbaasu? » (Mu kutubë ti : mu kubaasi Kliistu fë meeyi bëfwa.) 8Mbici lin'tubë? Lyaliili : « Libuungu libelëmë yi njeeyi, mu munwaaku i mu n'timaaku#10.8 Det 9.4; 30.12-14.. » Libuungu be liili lya saangu yi ciminu yinë beeso tulë mu kutendulë. 9Ningë ti mu munwaaku wulë mu kusisiminë fëke bakë booso ti Yeesu wuli Fumu i ningë njeeyi wun'ta lyaanë mu n'timaaku wooso ti Nzaambi wun'vulumunë mu bëfwa, njeeyi wun'vuukë. 10Cibilë mu n'timë, mwaawu bëkun'teelë maanë i Nzaambi wun'vangisyaangë kusulëmë muutu wo wacikunë, mati mu munu tun'sisiminë i Nzaambi wun'vuuci wunë wun'vangilë kati obo. 11Cyelikë lisonëmë : « Wosuku wun'ta maanë mu naandi kusë wum'monë sonyi ko#10.11 Ezy 28.16.. » 12Boobo, luvyakunu voo yimunë Sizwiifë i basë Ngeleekë: bakë booso fumwaawu yimweekë, wun'vangaangë mëboti maandi ke bakë booso bëkun'telë mbilë. 13Cibeeni bëtubë : « Wosuku wun'telë lizinë li Fumu wun'vuukë#10.13 Zol 3.5.. »
14Kasi buni bëm'podi kun'telë mooti bësye n'teelë maanë ko? Buni bëm'podi kun'cikuninë mooti bësye kuwulu wosuku wutubilë mu naandi? Buni bëm'podi kun'yuwulu mooti muutu ve wukun'tendulë? 15Buni bëkun'tendulë ningë baatu ve bëfilisi mu lyaawu? Busonëmë : « Mati liboti mu kumonë lwisulu lu banë bën'natë Mpolu Mboti#10.15 Ezy 52.7.! » 16Kasi yaaku bakë booso ba basiinji Mpolu Mboti. Ezayi wutubë : « A Fumu nani wata lyaanë mu Mpolu Mboti yo twatendulë#10.16 Ezy 53.1.? » 17Boobo, ciminu cin'fuminë mu manë tun'kuwu i manë tun'kuwu mën'fuminë mu Libuungu li Kliistu.
18Miinu yin'kufulë : Sizwiifë bësye kuwu Mpolu ayi kwe? Kasi ningë baawu bëyiyuwu! Lisonëmë :
« Mbeembwaawu yiyuwukunu fë mongu butoto n'viipë,
i mëbuungu maawu mëtuukë tee kunë kusitikilë buloongo. »
19Miinu yin'kufulooso: Islayeelë sye zikulë kuwu kwe? Ee, talaanu manë mën'vutulë Moyiizë :
« Miinu yin'vangisi ti beeno luba yi likwaafi mu banë bëkeeli ko nguliku likaandë bo Nzaambi kutubilë,
miinu yiluvangisi kuba mu likaanzi mu mboongu yikaambu mëlyeelë. »
20Ezayi wutendulë yimunë bukanvi :
« Banë bëlëkaambu kun'toombaangë bëkum'monë, bo Nzaambi kutubilë,
yimonikënë banë bëkaambu kun'doombë tyosuku. »
21Kasi mu manë mën'talë Islayeelë, naandi wutubë :
« Kadë cilumbu miinu yitaambë myooko
kuke mboongu yikaambu kucikunë i yike bubaalu#10.21 v. 19: Det 32.21. – v. 20-21: Ezy 65.1.. »
Attualmente Selezionati:
Loomë 10: NTVIL
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2019, Wycliffe Bible Translators, Inc. and © Alliance Biblique du Congo. All rights reserved.
