रोमियों 14
14
अपणे भाई पर इल्जाम मत लगाओ
1जे मणू विश्वास बिच कमजोर हिन, तिन्हा जो अपणी संगती अन्दर लेई लेयो, पर तिन्हेरी तुसा का अलग राय होणे तांइ तिन्हा री बहस मत करो। 2इक्क जो विश्वास है कि सब किच्छ खाणा ठीक है, पर जे विश्वास बिच कमजोर है, से साग पात ही खांदा।
3मांस-मच्छी खाणे वाला मणू, साग-पात खाणे वाले मणू जो तुच्छ ना समजे, ते साग-पात खाणे वाला मणू, मांस-मच्छी खाणे वाले पर इल्जाम ना लाए, किजोकी परमेश्वर ने तिन्हा दोन्नां जो अपणाए रा है। 4तुसा कुसकी होर मणू रे नौक्कर पर इल्जाम लाणे वाले हुंदे कुण? तिसेरी कामयाबी या नाकामयाबी तिसेरे मालक रे ही हत्थां बिच है। ते तिसने कामयाब ही होणा किजोकी परमेश्वर तिन्हा जो कामयाब करी सकदे। 5कोई मणू ता इक्क दिन जो दूज्जे दिन का बधी करी मनदा, ते कोई मणू सबणी दिनां जो इक्क बराबर मनदा। इसी तरिक्के कने हर इक्क मणू जो अपणे मन अंदर इस गल्ल जो पक्का करी लैणा चाएदा कि जे से सोच्चेया करदा है, से ही किजो सही है। 6जे अगर कोई मणू कुसकी दिन जो मनदा, ता से प्रभु जो आदरमान दैणे तांइ मनदा। जे अगर कोई मणू मांस-मच्छी खांदा, ता से प्रभु जो आदरमान दैणे तांइ खांदा, किजोकी से परमेश्वर रा शुकर करदा, ते अगर कोई मणू साग पात खांदा, ता से भी प्रभु जो आदरमान दैणे तांइ खांदा, ते परमेश्वर रा शुकर करदा। 7-8असी सारे परमेश्वर रे हिन। इधेरे तांइ असा जो अपणे जीणे-मरणे बिच अप्पु जो नी, पर परमेश्वर जो खुस करणा चाएदा। 9किजोकी मसीह यीशु इधेरे तांइ ही मरे, अते मुर्देयां बिच का जिन्दे भी होई गे, ताकि से मरे रे ते जिन्दे, दोन्नां रे प्रभु ठैहरे। 10तां तू अपणे संगी विश्वासी पर इल्जाम किजो लांदा? या तू फिरी किजो अपणे संगी विश्वासी जो तुच्छ समजदा? असी सारे जणेया ने परमेश्वर री हिसाब-किताब री गद्दी रे सामणे खड़िणा। 11किजोकी पवित्रशास्त्र बिच,
“प्रभु बोलदे कि मैं अपणी जिन्दगी री कसम खाई करी बोलदा,
कि हर इक्क मणू ने मेरे सामणे अपणे गोड्डे टेकणे,
ते हर इक्क मणू ने अपणी जुबान कने मन्नी लैणा कि मैं परमेश्वर है।”
12इधेरे तांइ, असा बिच का हर इक्क मणू जो अपणे अपणे कम्मां रा हिसाब परमेश्वर जो दैणा पैणा।
प्रेम रा नियम
13इधेरे तांइ, अग्गे का असी इक्क-दूए पर इल्जाम ना लाण, पर तुसा ए पक्का सोच्ची लेयो कि कोई अपणे संगी विश्वासी तांइ पाप करणे री वजह ना बणे। 14मेरे जो पता है, ते प्रभु यीशु रे जरिये मेरे जो ए पक्का होई गे रा है, कि हर इक्क खाणे रे चीज सुच्ची है। पर जे तिसजो भिठ्ठा समजदा, तिस तांइ से भिठ्ठा है। 15जे अगर तू अपणे संगी विश्वासी जो अपणी रोट्टी री वजह कने दुखी करदा, तां तू मसीह रे प्यार री रीति पर नी चलदा। इधेरे तांइ से रोट्टी मत खाओ, किजोकी मसीह ने तिस मणू तांइ अपणी जान दित्ती थी। 16इधेरे तांइ, भले ही जे तुसा करेया करदे हिन तिसजो सही समजदे होण, पर जे अगर कोई तिसजो गलत समजदा हो, ता से कम्म मत करो। 17किजोकी परमेश्वर रे राज बिच खाणा-पीणा नी है, पर धार्मिकता, मेल जोल ते से सांती है, जे पवित्रात्मा कने हुन्दा। 18जे कोई इस तरिक्के कने मसीह यीशु री सेवा करदा, से परमेश्वर जो खुस करदा, ते मणू भी तिसेरा आदरमान करदे। 19इधेरे तांइ असा जो तिन्हा गल्लां जो करणे बिच लग्गी रैह्णा चाएदा, जिन्हा कने मणू मिली जुली करी रे, ते सारेयां रा विश्वास मजबूत हो। 20रोट्टी री वजह कने परमेश्वर रा कम्म मत बिगाड़ो, सब खाणे रे चीजां ता सुच्ची हिन, पर जे अगर तिस मणू रे विश्वास तांइ रुकावट री वजह बणदा, तां से रोट्टी खाणा सही नी है। 21भला ता ए है कि तुसा ना मांस-मच्छी खाओ, ना ही अंगूर रा रस्स पीयो, ते ना ही इदेया किच्छ करो, जिस कने तुसा रे संगी विश्वासी रे विश्वास बिच रुकावट बणे। 22तुसा ए विश्वास करदे होणे कि जे तुसा करदे से सही है, पर तिसजो अपणे ते परमेश्वर रे बिच रख्खो। धन्न है से जे अप्पु जो तिस गल्ल बिच मुजरिम नी ठैहरणा दिंदे जिस जो से सही समजदे। 23पर जे अगर तुसा रे मन बिच तिस रोट्टी रे बारे बिच कोई शक हुंदा, कि से तुसा जो खाणा चाएदा या नी, तां तुसा तिसजो खाई करी पाप करेया करदे हिन। जे किच्छ भी असी करदे, ते जे अगर से परमेश्वर बिच विश्वास कने नी हुंदा, तां से असा तांइ पाप है।
Attualmente Selezionati:
रोमियों 14: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
