रोमियों 13
13
राज्य तांइ फर्ज
1हर इक्क मणू अपणे शासन करणे वाले अधिकारियां रे अधीन रेयो, किजोकी हर इक्क हक परमेश्वर रे पास्से का हुंदा, ते से सारे हक परमेश्वर ने ठैहराए रे हिन। 2इधेरे तांइ जे अगर कोई मणू अपणे अधिकारियां रे शासन रे अधीन रैह्णे का मना करदा, तां से मणू परमेश्वर री विधि रा विरोध करदा, ते विरोध करणे वाले लोक्कां जो सजा मिलणी। 3किजोकी जे अगर कोई मणू खरा कम्म करेया करदा हो, तां तिज्जो अपणे अधिकारी का डरणे री जरुरत नी है। पर जे अगर कोई मणू गलत कम्म करेया करदा हो तां तिसजो अपणे अधिकारी का डरणे री जरुरत है। इधेरे तांइ ठीक कम्म कर तां तुसा रे अधिकारियां ने तुसा री तारिफ करणी। 4किजोकी अधिकारी मणू तुसा री मदद करणे तांइ परमेश्वर रे दास हिन, पर जे अगर तू गलत कम्म करे, तां तिन्हा का डरो। किजोकी से परमेश्वर रे दास हिन ते तिन्हा का परमेश्वर रे पास्से का तिन्हा लोक्कां पर सजा रे हुकम सुनाणे रा हक है, जे गलत कम्म करदे। 5इधेरे तांइ ना सिर्फ सजा का बचणे तांइ, पर अपणे विवेक जो साफ रखणे तांइ भी तुसा जो तिन्हेरे अधीन रैह्णा चाएदा। 6इधेरे तांइ चुंगी भी देया करो, किजोकी शासन करणे वाले परमेश्वर रे दास हिन ते हमेसा अपणी जिम्मदारियां जो निभाणे बिच लगे रैह्न्दे। 7इधेरे तांइ तुसा जो तिन्हा अधिकारियां जो से सारी चीजां दैणा चाएदी जे तिन्हेरा हक है। तुसा जो हर तरिक्के री चुंगी, आदर-सम्मान दैणा चाएदा।
इक्क-दूज्जे तांइ फर्ज
8प्यार जो छड्डी करी होर कुसकी चीज बिच कुसकी रे कर्जदार मत बणो। किजोकी जे दूज्जे कने प्यार रखदा, तिनिये मूसा रे कानून रे तिन्हा सारे हुकमां जो मन्नी लेया, जे परमेश्वर ने दित्ते री हिन। 9किजोकी मूसा रे कानून बिच इदेय मते सारे हुकम हिन, जिय्यां, “व्याभिचार नी करणा, खून नी करणा, चोरी नी करणी, लालच नी करणा, ते इन्हा हुकमां रे अलावा इन्हा सारे हुकमां रा निचोड़ इस हुकम बिच है, अपणे पड़ोसी कने अप्पु बराबर प्यार रख।” 10प्यार पड़ोसी री कोई बुराई नी करदा, इधेरे तांइ जे अगर असी प्यार करदे तां असी मूसा रे कानूनां जो पूरा करदे। 11तुसा बिच का हर इक्क जणे जो इक्क दूए कने प्यार करदे रैह्णा चाएदा, किजोकी से समय आई गे रा है जां परमेश्वर ने असा जो इस दुष्ट दुनिया का बचाई लैणा। असा रे मसीह बिच विश्वास करणे रे तिस बेल्ले का अवे ए छुटकारे रा समय अवे होर भी तौले पुजणे वाला, असा जो इस गल्ल जो समजी करी असा जो चुकन्ने ते होशियार रैह्णा जरुरी है। 12असा रा इस बुरी दुनिया बिच रैह्णे रा समय तिय्यां ही मुकणे वाला है जिय्यां कि रात मुकणे वाली हुंदी। मसीह यीशु रे हटणे रे समय बड़ा नेड़े है। इधेरे तांइ असा जो न्याहरे रे कम्मां जदेय तिन्हा बुरे कम्म करणा छड्डी दैणे चाएदे, जे कम्म इस दुनिया रे मणू करदे, ते असा जो रौसनी रे ठीक कम्मां जदेय हथियार बन्नी लैणे चाएदे। 13असा जो रौसनी बिच रैह्णे वाले लोक्कां सांई अपणे चालचलन जो खरा बणाई करी रखणा चाएदा। पर न्याहरे बिच रैह्णे वाले लोक्कां सांई मतवाल्ले, पियक्कड़, रंगरेलियां, व्यभिचारी करणे वाले, अश्लील, झगड़े करणे वाले ते हिर्स करणे वाले ना बणे। 14बल्कि प्रभु यीशु मसीह जो इक्क कवच सांई पाई लेयो, ते अपणी पाप रे स्वभाव कने जिन्दगी मत जियो।
Attualmente Selezionati:
रोमियों 13: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
