मरकुस 4

बीह् बाणे वाले मणूआं उदारण

1फिरी यीशु गलीली समुन्द्र रे कनारे उपदेस दैणे लग्गेया ते इदेयी इक्क बड्डी भीड़ उन्हेरे नेड़े इकठ्ठी होई गेई कि से समुन्द्र बिच इक्क किस्ती पर चढ़ी करी बेई गेया, ते सारी भीड़ जमीन पर समुन्द्र रे कनारे खड़ी रेई। 2ते से उन्हा जो उदारणा बिच मती सारी गल्लां सिखाणा लग्गेया, ते अपणे उपदेस बिच उन्हा जो बोल्लेया, 3“सुणो! इक्क किसान बीह् बोणे तांइ खेतरां जो गेया। 4ते बीह् बांदे बेल्ले थोड़े बीह् रस्ते रे कनारे पेया ते पखेरुआं ने आई करी उन्हा जो चुग्गी लित्तेया। 5थोड़ा पथरिली जमीन पर पेया जित्ते तिसजो जादा मिट्टी नी मिली ते डूग्गी मिट्टी ना मिलणे री वजह कने तौले उगी पेया, 6ते जां सूर्ज निकलेया तां फुक्की गेया, तां जड़ ना पकड़ने री वजह कने सुकी गेया। 7किच्‍छ झाड़ियां बिच पे ते झाड़ियां ने बदधी करी से बीह् दब्बी दित्ते, ते से बीह् फली नी सके। 8पर थोड़े बीह् खरी मिट्टी पर पे, ते से उग्गे ते बदधी करी फलदायक होए ते कोई तीह् गुणा, कोई साठ्ठ गुणा ते कोई सौ गुणा फल्ल लाए।” 9तां उन्हा ने बोल्लेया, “जे सुनणा चाए, से ध्यान कने सुणे!”

उदारण दसणे रा मकसद

10जां यीशु किल्ले थिये, तां उन्हेरे साथियां ने उन्हा बारां चेल्‍लेयां समेत तिन्हा का इन्हा उदारणा रे बारे बिच पूच्छेया। 11यीशु ने तिन्हा लोक्कां जो बोल्लेया, “तुसां जो तां परमेश्वर रे राज रे भेद री समझ दित्ती गेरी है, पर बाहर वालेयां ताइं सारी गल्लां उदारणां बिच ही हूदीं।” 12ताकि से वचन पूरा हो कि;

“से दिखदे होए भी ना दिख्खी सकण,

ते सूणदे होए भी ना समजे; इय्यां ना हो।

कि से पाप करणा छड्डी दैण ते परमेश्वर का हटी आण ते माफ कित्ते जाण।”

बीह् बाणे वाले उदारण रा समजाया जाणा

13फिरी यीशु ने तिन्हा लोक्कां जो बोल्लेया, “अगर तुसा इस उदारण रा मतलब नी समजी सकदे तां फिरी होर उदारणां जो किय्यां समजगे?” 14किसान रा बीह् बोणा लोक्कां जो परमेश्वर रा वचन सुनाणे जो दर्शांदा। 15जे भी रस्ते रे कनारे रे पे थिये से तिन्हा लोक्कां जो दर्शांदे जिन्हा ने वचन जो सूणेया पर शैतान ने तिस्सी बेल्ले तिस वचन जो चुराई लित्तेया। 16जे भी पथरिली जमीन पर पेय से तिन्हा लोक्कां जो दर्शांदे जिन्हा ने वचन सुणी करी तिस्सी बेल्ले तिसजो खुसी-खुसी अपणाई लित्तेया। 17पर गहरी जड़ ना पकड़ने री वजह कने से जादा वक्त नी टिकी सके। परमेश्वर रे वचन जो मनणे री वजह कने जिय्यां ही तिन्हा पर दुख ते मुसीबतां आंदी से तिय्यां ही से विश्वास का डिगी जांदे। 18जे भी झिल्लां बिच पेय ए से मणू हिन जिन्हा ने वचन सूणेया, 19ते दुनिया री फिकर, ते पैसे रा धोखा, ते होर चीजां रा लालच उन्हा बिच समाई करी वचन जो दब्बी दिंदा ते से फल्ल ली लाई पांदे। 20ते जे ठीक जमीन बिच बोए गे, ए से हिन जे वचन सुणी करी अपणाई लिदें ते फल्ल लादें : कोई तीह् गुणा, कोई साठ्ठ गुणा ते कोई सौ गुणा।

दीये रा उदारण

21यीशु ने तिन्हा लोक्कां जो बोल्लेया, “क्‍या दीये जो इस ताइं बालदे कि भांडे या मन्जे रे हेठ रख्खेया जाए? पर इस ताइं की दीवट पराले रख्खेया जाए ताकि घरे रौसनी रे। 22किजोकी हर चीज जे लुके री है, से सामणे लाई जाणी ते हर इक्क राज़ सामणे लाया जाणा।” 23जे सुनणा चाए, से ध्यान कने सुणे! 24फिर यीशु ने तिन्हा लोक्कां जो बोल्लेया, “होशियार रेयो कि तुसा कै सूणदे, किजोकी जिस नाप कने तुसा नापदे तिसी नाप कने तुसा ताइं भी नाप्पेया जाणा, ते तुसा जो जादा दित्तेया जाणा। 25किजोकी जिस का किच्‍छ है तिस मणू जो होर भी दित्तेया जाणा पर जिस का किच्‍छ भी नी है, उस का से भी लेई लित्तेया जाणा जे उस का है।”

उगणे वाले बीह् रा उदारण

26फिरी यीशु ने बोल्लेया, “परमेश्वर रा राज इदेया है जिय्यां कोई मणू जमीन अंदर बीह् बाए, 27ते से दिन-रात्त आमतौर पर जिन्दगी जिन्दा रेया ते से नी जाणदा थिया कि से भी किय्यां बद्देया। 28धरती अपणे आप ही फल्ल उगादिं, पैल्ले पोगंर, तां सिल्ले, ते सिल्ले बिच तैयार दाणा, 29पर जां दाणा पकी जादां, तां किसान तिस्सी बेल्ले दराटी लादां, किजोकी बाड्डी आई गई।”

राई रे दाणे रा उदारण

30फिरी यीशु ने बोल्लेया, “असी परमेश्वर रे राज री मशाल कुस कने दैण; ते कुस उदारण कने उसदा बखाण करण? 31से राई रे दाणे रे साइं है: जां जमीन बिच बोया जादां तां जमीन रे सारेयां दाणेया का छोटा हुंदा, 32पर से बीह् जां बोया गेया, तां से उग्गि करी अपणे इस्राएल बिच मते सारे साग पात का भी बड्डा होई जादां, ते उसेरी इदेइ बड्डी डालियां निकलदी ताकि आसमान रे पखेरु उसेरी छां बिच बसे रा करी सकदे।” 33से उन्हा जो इदेय मते उदारणा दस्सी-दस्सी करी उन्हेरी समझ रे हिसाब कने वचन सुणादां थिया, 34ते बगैर उदारण बोल्ले से उन्हा जो किच्‍छ भी नी बोलदा थिया पर किल्ले से अपणे खास चेल्‍लेयां जो सारी गल्लां रा मतलब दसदा थिया।

तूफान जो सान्त करणा

35तिस्सी दिन जां सांज्ज होई, तां यीशु ने चेल्‍लेयां जो बोल्लेया, “आओ असी समुन्द्र रे तिस पार चलदे।” 36ते से भीड़ जो छड्डी करी जदेया से थिया, तियां ही तिसजो किस्ती पर कन्ने लेई गे। ते तिन्हा कन्ने होर भी किस्तियां थी। 37तां बड्डा तूफान आया, ते लैह्ररां किस्ती पर इत्ते तिकर लग्गी कि से पाणी कने भरी थी। 38पर यीशु अप्पु किस्ती रे पिछले हिस्से बिच गद्दी पराले सुत्ते रे थिये। तां तिन्हा ने उन्हेरे जो जगाई करी उन्हा जो बोल्लेया, “ओ गुरु, कै तुसा जो फिकर नी कि असी डूबणे वाले हिन?” 39तां यीशु ने उठ्ठी करी तूफान झिड़केया, ते पाणी जो बोल्लेया, “शातं रेय, रुकी जा!” ते आंधी रुकी गेई ते बड्डा चैन होई गेया 40ते चेल्‍लेयां जो बोल्लेया, “तुसां किजो डरदे? कै तुसा जो हल्ले तिकर विश्वास नी? 41से बड़े जादा डरी गे ते आपस बिच बोलणा लगे, ए कुण है कि आधीं ते लैह्‍रां भी इन्हा गल्ल मनदे?”

Attualmente Selezionati:

मरकुस 4: CDHNT

Evidenzia

Copia

Confronta