मरकुस 3

सुके हत्थ वाले मणू जो ठीक करणा

1फिरी कुसकी होर विश्राम दिन पर यीशु सभास्थल जो गे, उत्ते इक्क मणू थिया जिसेरा हत्थ सुक्कि गे रा थिया, 2ते किच्‍छ फरीसी मणू यीशु पर इल्जाम लाणे ताइं तिन्हेरी भाल बिच बैठ्ठे रे थिये कि दिख्खण, से विश्राम दिन तिसजो ठीक करदा की नी? 3यीशु ने सुके हत्थ वाले मणू जो बोल्लेया, “बिच मझाटे खड़ा हो।” 4ते यीशु ने तिन्हा लोक्कां का पूच्छेया, “मूसा रे कानून रे हिसाब कने विश्राम दिन भलाई करणा ठीक है या बुराई करणा? जान बचाणा या मारणा?” पर से मणू चुप रे। 5यीशु ने तिन्हेरे मन री सख्ती का उदास होई करी, तिन्हा जो गुस्से कने चारो पास्से दिख्खेया, ते तिस मणू जो बोल्लेया, “अपणा हत्थ बधा।” ते तिनिये बधाया, ते उसेरा हत्थ खरा होई गेया। 6फिरी फरीसी तित्ते का बाह्रर जाई करी तिस्सी बेल्ले राजा हेरोदेस रे झुण्ड रे लोक्कां कने मिली करी यीशु रे खलाफ सलाह करणा लग्गे कि से किय्यां तिन्हा जो मारी सकदे।

भीड़ रा यीशु रे पीच्छे-पीच्छे चलणा

7यीशु लोक्कां का दुर अपणे चेल्‍लेयां कने गलीली समुन्द्र पास्से चली गे ते तित्ते इक्क बड्डी भीड़ गलील प्रदेश का तिन्हा रे पीच्छे चली पेई। 8ते यहूदियां जिले, ते यरुशलेम सहर, ते इदूमिया जिले, ते यरदन नदी रे पार, ते सूर अते सैदा रे सहर रे आस्से-पास्से का इक्क बड्डी भीड़ ए सुणी करी कि से कदेय अनौखे कम्म करदा, उन्हेरे का आई। 9यीशु ने अपणे चेल्‍लेयां जो बोल्लेया, “भीड़ री वजह कने इक्क छोटी किस्ती मेरे ताइं तैयार रे ताकि से मेरे जो दब्बी ना दैण।” 10किजोकी यीशु ने मते जणेया जो ठीक कित्तेया थिया, इधेरे ताइं जिन्ने मणू बिमार थिये, यीशु जो छुणे ताइं उन्हा पराल्ले पेई चले रे थिये। 11दुष्टात्मा रे सताये रे मणू भी, जां यीशु जो दिखदे थिये तां उन्हेरे सामणे पेई जादें थिये, ते दुष्टात्मा चिंड मारी करी बोलदी थी कि तू परमेश्वर रा पुत्तर है। 12पर यीशु ने तिन्हा दुष्टात्मां जो बड़ा बोल्लेया कि, “मैं जे है, तिस बारे बिच किच्‍छ प्रकट मत करो।”

बारा चेल्‍लेयां जो चुणेया जाणा

13फिरी यीशु पहाड़ पर चढ़ी गे, ते जिन्हा लोक्कां जो से अपणे का सदणा चाह्‍ंदे थिये तिन्हेरे जो अपणे नेड़े सद्देया ते से तिन्हेरे नेड़े आए। 14तां यीशु ने बारा प्रेरितां जो चुणेया कि से तिन्हेरे कने-कने रेह्, ते से तिन्हा जो भेज्जे कि से प्रचार करण। 15ते यीशु ने चेल्‍लेयां जो दुष्टात्मा कड्डणे रा अधिकार दित्तेया। 16से बारा चेल्‍ले ए हिन: शमौन जिसेरा नां उन्हा ने पतरस रख्खेया, 17ते जब्दी रा पुत्तर याकूब ते याकूब रा भाई यूहन्ना, जिन्हेरा नां उन्हा ने बूआनरगिस मतलब गर्जन रा पुत्तर रख्खेया, 18ते अन्द्रियास, ते फिलिप्पुस, ते बरतुल्मै, ते मत्ती, ते थोमा, हलफई रा पुत्तर याकूब ते तद्दै ते शमौन कनानी, 19यहूदा इस्करियोती जिन्निए यीशु जो पकड़वाई भी दित्तेया।

यीशु ते बालजबूल

20तां यीशु अपणे चेल्‍लेयां कने कुसकी रे घरे गे ते तित्ते इक्क इदेइ भीड़ कठ्ठी गई कि से रोट्टी भी नी खाई सके। 21जां उन्हेरे रिस्तेदारां ने ए सूणेया, ते से यीशु जो पकड़ने ताइं निकले किजोकी से बोलदे थिये कि उन्हेरा दमाग ठिकाणे नी है। 22शास्त्रि भी जे यरुशलेम सहर का आए रे थिये ए बोलदे थिये, “उसेरे बिच दुष्टात्मा है,” ते “ओ दुष्टात्मां रे सरदार री मदद कने लोक्कां बिच का दुष्टात्मा जो कडदा।” 23इस ताइं यीशु उन्हेरे जो नेड़े सद्दी करी उन्हेरे जो उदारणा बिच बोलणा लग्गेया, “शैतान किय्यां अपणी दुष्टात्मां जो कड्डी सकदा?” 24पर जे अगर कुसकी राज रे लोक्कां बिच फूट पेई जाओ, तां से राज किय्यां टिकी सकदा? 25ते जे अगर कुसकी घर रे लोक्कां बिच फूट पेई जाओ तां से घर किय्यां टिकी सकदा? 26इस ताइं अगर शैतान अपणा ही दुश्मण बणी करी अपणे बिच ही फूट पाए तां से किय्यां बणा रेई सकदा? उसेरा तां खातमा ही होई जादां। 27“पर कोई मणू कुसी बलवान मणू रे घरे घुसी करी उसेरा समान नी लुट्टी सकदा, जां तिकर से पैल्ले तिस बलवान जो बन्नी ना लै तां तिसेरे घर जो नी लुट्टी सकदा।” 28“मैं तुसा जो सच बोलदा कि मणूआं रे सारे पाप ते बेजती जे से करदे हिन, माफ कित्ती जाणी, 29पर जे कोई पवित्रात्मा रे खलाफ बुराई करे, से कदी भी माफ नी कित्तेया जाणा: पर से हमेसा रे पाप रा अपराधी होई जादां।” 30किजोकी से मणू ए बोलदे थिये कि उस बिच दुष्टात्मा है।

यीशु री मां ते भाई

31तां यीशु री माता ते छोटे भाई आए, ते बाह्र खड़े होई गे, ते उन्हा ने यीशु जो बाह्र सद्दणे तांइ कुसकी जो भेज्जेया। 32भीड़ यीशु रे नेड़े-तेड़े बैठ्ठी री थी, ते कुसकी मणू ने उन्हेरे जो बोल्लेया, “दिख्खो तुसा री माता ते भाई बाहर तुसा जो सददे हिन।” 33यीशु ने उन्हेरे जो जवाब दित्तेया, “मेरे माता ते मेरे भाई कुण हिन?” 34ते उन्हा लोक्कां पर जे तिन्हेरे नेड़े-तेड़े बैठ्ठे रे थिये, नजर फिराई करी बोल्लेया, “दिख्खो, मेरे माता ते मेरे भाई ए हिन। 35किजोकी जे कोई परमेश्वर री इच्छा पर चलदे सेह्ई मेरा भाई, ते भैण ते माता है।”

Attualmente Selezionati:

मरकुस 3: CDHNT

Evidenzia

Copia

Confronta