2 कुरुन्थियों 8
8
गरीब्बां तांइ दान
खुले दिल कने दान दैणा
1अवे ओ विश्वासी भाईयों, असी तुसा जो परमेश्वर रे तिस अनुग्रह रा बसेख दिदें जे मकिदुनिया प्रदेश रे विश्वासियां पर होए रा है। 2जां से बड़ी मुसीबतां बिच थिये, तां भी तिन्हा ने अपणे गरीब होणे रे बावजूद भी बड़ी खुसी कने दूज्जे विश्वासियां री मदद करणे तांइ बड़ी उदारता कने दान दित्ता। 3तिन्हेरे बारे बिच मेरी ए गवाई है, कि तिन्हा ने अपणी फिकर नी कित्ती, ते तिन्हा ने उन्ना दित्ता जिन्ना से देई सकदे थिये, बल्कि तिन्हा ने अपणी पोह्ंच का भी जादा खुले मन कने दान दित्ता। 4तिन्हा ने असा का बड़ी जादा बिनती कित्ती ताकि यरुशलेम सहर रे विश्वासियां तांइ दान दैणे ते सेवा करणे रे सौभाग्य बिच हिस्सेदार बणी सकण। 5ते तिन्हा ने असा री उम्मीद का जादा बधी करी कित्तेया, पैल्ले तिन्हा ने अप्पु जो परमेश्वर जो पसंद आणे वाली जिन्दगी जीणे तांइ समर्पित करी दित्तेया, ते फिरी तिन्हा ने प्रभु री इच्छा रे हिसाब कने अप्पु जो असा जो समर्पित करी दित्ता। 6इधेरे तांइ असा ने तीतुस जो समजाया कि जिय्यां तिनिये पैल्ले सुरु कित्तेया थिया तिय्यां ही इस दान रे कम्म जो तुसा रे बिच मझाटे पूरा भी करी लै। 7इधेरे तांइ जिय्यां तुसा हर गल्ल बिच, मतलब भरोस्से, शिक्षा, ज्ञान ते हर तरिक्के री मैहनत बिच, ते असा कने प्यार रखणे बिच होर भी जादा बदधे जांदे, तिय्यां ही गरीब विश्वासियां जो दान दैणे रे कम्म बिच भी बदधे जाओ। 8मैं तुसा जो हुकम नी है देया करदा, पर मैं तुसा रे प्यार री सच्चाई जो दूज्जेयां री गहरी इच्छा कने तुलना करी के परखणा चाह्ंदा। 9तुसा असा रे प्रभु यीशु मसीह रे अनुग्रह जो जाणदे कि से अमीर होई करी भी तुसा तांइ कगांल बणी गे, ताकि तिन्हेरे कगांल होई जाणे कने तुसा अमीर होई जाओ।#8:9 ए वचन आत्मिक तौर पर बोल्ले गे रा है। जिसेरा मतलब ए है कि मसीह यीशु ने स्वर्ग री सारी महिमा जो छड्डी करी असा सांई इक्क इन्सान रे रुप बिच जन्म लित्तेया ते से असा तांइ गरीब बणी गे ताकि असी आत्मिक रीति पर अमीर बणी जाण।
10इस गल्ल पर तुसा तांइ मेरी ए ही सलाह है कि ए ठीक गल्ल होणी कि जे तुसा इक्क साल पैल्ले सुरु कित्तेया थिया, तिस कम्म जो पूरा करो। पिछले साल तुसा पैल्ले मणू थिये जे दान दैणा चाह्ंदे थिये, ते तुसा मणू ही पैल्ले हिन जिन्हा ने दान दैणा सुरु भी कित्तेया थिया। 11अवे तुसा जो से कम्म पूरा करणा चाएदा जे तुसा सुरु कित्तेया थिया। सुरुआत बिच तुसा री गरीब विश्वासियां जो दान दैणे री इच्छा थी, से अब्बे तुसा रे दान दैणे कने दिसणी भी चाएदी। अपणी कमाई रे हिसाब कने दान देयो। 12किजोकी जे अगर तुसा अपणे पूरे मन कने दान दिंदे, तां से मंज़ूर भी हुंदा। ते जे किच्छ भी तुसा का है, तिसेरे हिसाब कने दान करो, ना कि जे तुसा का नी है। 13इय्यां नी है कि मैं ए चाह्ंदा कि दूज्जेयां री जिन्दगी सुखदी ते तुसा री जिन्दगी मुस्किल होई जाओ। मेरा सिर्फ ए ही मतलब है कि सारेयां बिच बराबरी होणा चाएदी। 14पर इस बेल्ले तुसा री तरक्की, तिन्हेरी कमी-घटी बिच कम्म आए, ताकि तिन्हेरी तरक्की होणा भी तुसा री कमी-घटी बिच कम्म आए। ते सारेयां बिच बराबरी होई जाए। 15जिय्यां कि पवित्रशास्त्र बिच लिख्खे रा है,
“जिनिये मता बटोरेया तिसेरा किच्छ जादा नी निकलेया,
ते जिनिये घट बटोरेया तिसजो किच्छ घट नी निकलेया।”
तीतुस अते उसेरे सहकर्मी
16परमेश्वर रा शुकर हो, जिन्हा ने तुसा तांइ से ही फिकर तीतुस रे मन बिच पाए री है, जे मेरे जो भी है। 17जां असी तिसका बिनती कित्ती कि से तुसा का आए, तां तिनिये बड़ी इज्जत कने असा री गल्ल मन्नी लित्ती, बल्कि बड्डा उत्साही होई करी, से अपणी मर्जी कने तुसा का गे रा है।
18असा ने तिस कने तिस विश्वासी भ्याल जो भी भेज्जे रा है, जिस जो सारी कलीसियां रे सारे संगी विश्वासी मसीह यीशु रे सुब बसेख रे प्रचारक होणे रे नात्ते जाणदे। 19ते इन्ना ही नी, पर से कलीसियां रे संगी विश्वासियां रे जरिए ठैहराया भी गे रा कि इस दान रे कम्म तांइ असा कने जाए। असी ए सेवा इधेरे करदे कि प्रभु री महिमा ते यरुशलेम रे विश्वासियां री मदद करणे तांइ असा रा उत्साह ज़ाहिर होई जाए। 20असी तीतुस कने इक्क होर विश्वासी भ्याल जो भेज्जी करी इस गल्ल री सावधानी बरतेया करदे हिन, कि इस उदारता रे कम्म रे बारे बिच जिसेरी सेवा असी करदे, कोई असा पर इल्जाम ना लाई सके। 21किजोकी असी तिन्हा गल्लां री फिकर करदे जे गल्लां सिर्फ प्रभु रे ही सामणे नी, पर लोक्कां रे सामणे भी भली हिन। 22असा ने तिन्हा कने अपणे तिस विश्वासी भ्याल जो भी भेज्जेया करदे हिन, जिस जो असा ने घड़ी-घड़ी परखी करी बड़ी गल्लां बिच हिम्मत वाला पाया, पर अवे तुसा पर तिसजो बड़ा विश्वास है, इस वजह कने से अवे होर भी जादा हिम्मत वाला है। 23जे कोई तीतुस रे बारे बिच पुच्छे, तां बोल्लेयो कि से मेरा साथी ते मेरे कने कम्म करणे वाला मेरा सहकर्मी है, ते जे असा रे विश्वासी भाईयां रे बारे बिच पुच्छे, तां दस्सेयों कि से कलीसिया रे दूत ते मसीह यीशु जो महिमा दैणे वाले मणू हिन। 24इधेरे तांइ तुसा तिन्हा पर अपणा प्यार ज़ाहिर करो ते तुसा पर असा रे गर्व जो कलीसिया रे सारे विश्वासियां रे सामणे सच्चा साबित करी देयो।
Attualmente Selezionati:
2 कुरुन्थियों 8: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.