2 कुरुन्थियों 7
7
1अते ओ प्यारे संगी विश्वासियों, जां परमेश्वर ने असा कने ए वादा कित्ते रा है कि तिन्हा ने असा जो अपणे बच्चेयां रे रुप बिच अपणाई लैणा, इधेरे तांइ, आओ असी हर तरिक्के री बुराई जो छड्डी दैण, ते इक्क पवित्र जिन्दगी जीणे री कोसीस करदे रैह्ण।
पौलुस रा आनन्द
2असा कने प्यार बणाई रख्खो, असी ना कुसकी कने नाईंसाफी कित्ती ते ना कुसकी रा किच्छ बिगाड़े रा है ते ना ही कुसकी जो ठग्गे रा है। 3मैं तुसा जो दोषी ठैहराणे तांइ ए नी बोलदा, किजोकी मैं पैल्ले ही बोल्ली चुक्के रा है कि असी तुसा जो इन्ना प्यार करदे कि असी तुसा कने जीणे-मरणे तांइ भी तैयार हिन। 4मैं तुसा कने बड़ी हिम्मत कने बोलदा कि मेरे जो तुसा पर बड़ा गर्व है, मैं बड़ा वरी उत्साहित है, अपणे सारे दुख बिच भी मैं खुसी कने भरी रैहन्दा। 5किजोकी जां असी त्रोआस सहर का निकली करी मकिदुनिया प्रदेश बिच आए थिये तां भी असा जो अराम नी मिल्लेया, पर असा जो चारो पास्से का मुसीबतां कने घिरे रे थिये, बाहर लड़ाईयां थी ते अन्दर ड्रौणी गल्लां थी। 6तां भी दुखी मणूआं जो तसल्ली दैणे वाले परमेश्वर ने तीतुस रे आणे कने असा जो तसल्ली दित्ती। 7ते तिसेरे आणे कने मेरे जो तिन्नी तसल्ली मेरे जो नी, जिन्नी तसल्ली मेरे जो तां मिल्ली जां तिनिये मेरे जो दस्सेया कि तुसा मेरे तांइ किन्ने फिकरमंद थिये ते तुसा जो मेरा बड़ा चाह होए रा थिया, ते तुसा जो असा री मुसीबतां रे बारे बिच जाणी करी किन्ना जादा दुख होया थिया। 8मेरे जो इस गल्ल रा कोई पछतावा नी है कि मैं तुसा जो गम्भीर चीठ्ठी लिख्खी, हालांकि तिस कने तुसा उदास होई गे। मेरे जो पैल्ले पछतावा होया थिया जां मैं दिख्खेया थिया कि तुसा तिस चीठ्ठी री वजह कने उदास होई गे। 9अवे मैं खुस है, पर इधेरे तांइ नी तुसा जो दुख होया, पर इधेरे तांइ की तुसा तिस दुख री वजह कने अपणे पाप्पां का तौबा कित्ती ते परमेश्वर रे रस्ते पर चलणा लगे, किजोकी ए दुख परमेश्वर रे पास्से का थिया ताकि असा पास्से का तुसा जो कोई नुक्सान ना हो। 10किजोकी परमेश्वर रे पास्से का मिलणे वाला दुख, पाप्पां का तौबा करणे री वजह बणदा, जिसेरा अंजाम छुटकारा है, तिस तरिक्के रे दुख कने पछतावा नी हुंदा, पर दुनियावी दुख हमेसा री मौत री वजह बणदा। 11ध्यान देयो कि परमेश्वर रे पास्से का मिल्ले रे दुख कने तुसा किन्ने गुणवान बणी गेरे हिन: तुसा बिच किन्नी जादा लगन, अपणी सफाई दैणे तांइ तुसा री उत्सुकता, नाइन्साफी रे खिलाफ तुसा रा गुस्सा, कुसकी खतरे तांइ तुसा रा चुकन्नापन, मेरे कने मिलणे तांइ तुसा री चाह्त, सेवा करणे तांइ तुसा रा लगाव, ते गलत कम्म करणे वाले जो सजा दैणे बिच तुसा री फुर्ती। इन्हा सारी चीजां कने तुसा ने ए साबित करी दित्तेया हर इक्क चीज ठीक तरिक्के कने करणे बिच तुसा ने कोई कसर नी छड्डी। 12फिरी मैं पैल्ले जे से गम्भीर चीठ्ठी तुसा जो लिख्खी थी, से ना तां तिसेरे वजह कने लिख्खेया जिन्निए नाइन्साफी कित्ती, ते ना तिसेरे वजह कने जिस कने नाइन्साफी होई, पर इस तांइ की तुसा रा जे जोस असा तांइ है से परमेश्वर रे सामणे तुसा रे सामणे आई जाए। 13इस तांइ असा जो तसल्ली मिली, असा री इस तसल्ली ते तीतुस री खुसी री वजह कने, असा जो होर भी जादा खुसी होई, किजोकी तिसेरा मन तुसा री वजह कने होर भी जादा खुस होई गे रा है। 14किजोकी अगर मैं तिसेरे सामणे तुसा रे बारे बिच किच्छ गर्व दिखाया भी, तां मैं शर्मिदां नी होया, पर जिय्यां असी सारी गल्लां तुसा रे सामणे सच-सच बोल्ली दित्ती थी तिय्यां ही असा रा गर्व करणा तीतुस रे सामणे सच निकलेया। 15ते जां से याद करदा कि तुसा सारे तिसेरी सारी गल्लां मनदे थिये, ते तिस कने हमेसा डर ते इज्जत कने मिलदे थिये, तां तुसा तांइ तिसेरा प्यार होर भी बधी जांदा। 16मैं खुस है, किजोकी मेरे जो हर गल्ल बिच तुसा पर भरोसा है।
Attualmente Selezionati:
2 कुरुन्थियों 7: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.