1 कुरुन्थियों 12
12
आत्मिक वरदान
1ओ संगी विश्वासियों, तुसा रे आत्मिक खुबियां रे बारे सवाल रे बारे बिच मैं चाह्ंदा की तुसा ध्यान कने समझो। 2तुसा जाणदे कि तुसा रे मसीह यीशु बिच विश्वास करणा का पैल्ले तुसा मूर्ति पूजा करणे तांइ मते तरिक्के कने भटकाए गे थिये। 3इधेरे तांइ मैं चाह्ंदा कि तुसा समझो कि जे कोई परमेश्वर रे आत्मा रे कहे मुताबिक बोलदा से कदी ए नी बोलदा यीशु लाणती है, ते बगैर पवित्रात्मा रे कहे मुताबिक कोई ए भी नी बोल्ली सकदा कि यीशु प्रभु हिन। 4-6खुबियां तां मते तरिक्के रे हिन, पर से सारे पवित्रात्मा का ही मिलदे। सेवा करणे रे भी मते तरिक्के हिन पर मणू इक्क ही प्रभु री सेवा करदे। सेवा करणे तांइ भी मते खूबी हिन पर से इक्क ही परमेश्वर हिन जे सारे जणेया जो से सारे खूबी तिन्हेरे खास कम्म जो करणे तांइ दिंदे। जे सारेयां बिच हर तरिक्के रा असर पैदा करदे। 7परमेश्वर हर इक्क जणे जो पवित्रात्मा रे अनुभव रा सबूत दिंदा ताकि से सारे विश्वासियां री मदद तांइ इस्तेमाल होई सके। 8पवित्रात्मा इक्क जणे जो तिन्हेरे बसेख रे बारे बोलणे री खूबी दिंदे जे कि ज्ञान कने भरपूर हुंदी, ते से ही आत्मा दूए मणू जो तिन्हेरा बसेख बोलणे री खूबी दिंदे जे समझ कने भरपूर हुंदा। 9से आत्मा इक्क जणे जो मसीह यीशु बिच बड़ा जादा विश्वास करणे री खूबी दिंदा, ते से ही आत्मा दूए मणू जो लोक्कां री बिमारियां ठीक करणे री खूबी दिंदे। 10पवित्रात्मा इक्क जणे जो बड्डे-बड्डे चिन्ह-चमत्कार री खूबी दिंदे, ते से ही आत्मा दूए मणू जो परमेश्वर रा बसेख सुनाणे री खूबी दिंदे, ते से ही आत्मा कुसकी होर मणू जो तिन्हेरे वरदान बिच फरक करणे री खूबी दिंदे कि से पवित्रात्मा रे पास्से का है या नी। ते कुसकी होर मणू जो बखरी-बखरी भाषा बोलणे री खूबी दिंदे। ते कुसकी होर जणे जो से तिस बखरी-बखरी भाषा रा मतलब दसणे री खूबी दिंदे। 11पर इन्हा सारी खुबियां रा जरिया सिर्फ पवित्रात्मा है ते से ही हिन जे अपणी मर्जी रे हिसाब कने सारेयां बिच से खुबियां बंडदे।
सरीर इक्क: अंग मते
12किजोकी जिय्यां असा रे इक्क जिस्म रे मते सारे अंग हिन, तिय्यां ही असी विश्वासी मणू मिली करी मसीह यीशु रे जिस्म रा हिस्सा बणी गेरे हिन, ते असी आपस बिच इक्क-दूए कने जुड़े रे हिन। 13तिय्यां ही असी सारे जणे चाए यहूदी या गैर यहूदी, चाए गुलाम हो या अजाद, असी सारेयां रा इक्क ही सरीर बिच इक्क बणी जाणे तांइ तिस ही आत्मा रे जरिये बपतिस्मा होए रा है ते असी सारेयां ने इक्क ही आत्मा पाए रा है। 14किजोकी इक्क सरीर बिच सिर्फ इक्क ही अंग नी पर मते सारे अंग हिन। 15जे अगर पैर बोल्ले कि मैं हत्थ नी है ते इधेरे तांइ मैं सरीर रा हिस्सा नी है, तां कै तिसेरे इय्यां बोलणे कने से सरीर रा हिस्सा नी रेया? 16जे अगर कान्न बोल्ले कि मैं हाख्खी नी है इधेरे तांइ मैं सरीर रा हिस्सा नी है, तां कै तिसेरे इय्यां बोलणे री वजह कने से सरीर रा हिस्सा नी है? 17जे सारा सरीर हाख्खी ही हुंदी तां सुनणा कुते का हुंदा? जे सारा सरीर कान्न ही हुंदी तां सुघंणा कुते का हुंदा? 18पर हकीकत बिच परमेश्वर ने असा रे सरीर रे सारे अंगा जो इक्क-इक्क करी के तिन्हेरी सही जगाह् पर असा रे सरीर बिच रख्खेया। 19जे अगर सिर्फ इक्क ही अंग हुंदा तां कोई सरीर ही नी होणा थिया। 20हालांकि सरीर रे अंग ता मते हिन पर सरीर इक्क ही है। 21हाख्खी हत्थ जो नी बोल्ली सकदी, “मेरे जो तेरी जरुरत नी है,” ते ना सिर पैर जो बोल्ली सकदा, “मेरे जो तेरी जरुरत नी है।” 22जिय्यां सरीर रे से अगं जे बाकि अंगा का कमजोर हिन, बड़े जादा जरुरी हिन। 23-24ते सरीर रे से अंग जिन्हेरा कुसकी रे दिख्खी लैणा बड़ी अशोभनीय ते शर्म री गल्ल है, असी तिन्हा जो ढकी करी रखणे तांइ जादा ध्यान दिंदे। इस तरिक्के कने असी तिन्हा जो बड़े ध्यान कने संभालदे। जदकी से अंग जिन्हा जो असी बड़ा छैल समजदे तिन्हा पर इन्ना ध्यान दैणे री जरुरत नी पैंदी। इधेरे तांइ परमेश्वर ने सरीर री संरचना इस तरिक्के कने कित्ते री है कि तिन्हा घट शोभा दैणे वाले अंगा जो जादा आदर ते ध्यान मिल्ले। 25ताकि सरीर बिच फूट ना पये, पर इक्क अंग दूए अंग री बराबर फिकर करे। 26इस तांइ जे अगर इक्क अंग बिच कमजोरी हुंदी तां सारा सरीर तकलीफ बिच हुंदा। ते तिय्यां ही जां असा रे सरीर रे इक्क अंग री बड़ी बदिया दिख्ख-रिख्ख हुंदी 27इस तरिक्के तुसा बिच का हर इक्क मिली करी मसीह यीशु रा सरीर हिन, ते तुसा बिच का हर इक्क तिन्हेरे बखरे-बखरे अंग हिन। 28मसीह रे इस सरीर बिच परमेश्वर ने असा जो अलग-अलग तरिक्के रा कम्म करणे तांइ दित्ते रा है, पैल्ले तिन्हा ने किच्छ मणूआं जो प्रेरित बणने तांइ चुणेया, किच्छ मणूआं जो तिन्हेरी गल्लां दसणे तांइ भविष्यवाणी करणे तांइ चुणेया, ते किच्छ जणेया जो तिन्हा ने लोक्कां जो वचन री शिक्षा दैणे तांइ चुणेया, इसका बाद किच्छ जणेया जो तिन्हा ने चिन्ह-चमत्कार करणे रा हक दित्ते रा है, ते किच्छ जणेया जो लोक्कां री बीमारी ठीक करणे रा हक, ते किच्छ जणेया जो दूज्जेयां री मदद करणे रा हक दित्ते रा है, ते किच्छ जणेया जो तिन्हा ने अगुवे बणने तांइ चुणे रा है, ते किच्छ जणेया जो तिन्हा ने पवित्रात्मा रे जरिये बखरी-बखरी भाषा बिच गल्ल करणे री खूबी दित्ते री है। 29सारे प्रेरित नी हिन, सारे भविष्यद्वक्ता नी हिन, सारे वचन री शिक्षा दैणे वाले नी हिन, सारे चिन्ह-चमत्कार करणे वाले नी हिन। 30सारेयां जो लोक्कां री बीमारी ठीक करणे रा खूबी नी मिल्ले री है, सारे बखरी-बखरी भाषा नी बोलदे, सारे बखरी-बखरी भाषा रा मतलब नी दसदे। 31तुसा बड्डी का बड्डी खूबी जो पाणे री धुन बिच रेयो, पर अवे मैं तुसा जो सारेयां का बदिया रस्ता दसदा।
Attualmente Selezionati:
1 कुरुन्थियों 12: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.