Va le Roma 8
8
A ku hanya hi tlhelo ga Moya.
1Hikwalaho a ku na kukoniwa ka lava va nga ka Kristu Jesu. Gal. 5:16
2Hakuva a nayo wa Moya wa kuhanya loku ka Kristu Jesu wu nzi tlhatlhisile nayweni wa kuonha ni wa kufa. Joh. 8:36; 1 Kor. 15:45; Gal. 2:19
3Hakuva lezi a nayo wu nga tsanzeka ha zona, hilezi wu nga hi ni gome hi kota ya nyama, Nungungulu i zi tirile hi ku rumela a Nʼwana wakwe hi xiyimo xa nyama ya kuonha, lezaku a kona a kuonha le nyameni. Maheb. 7:18
4A ku kasi a kululama ka nayo ku fela ku tatiseka ka hina lava hi nga fambiko hi ka nyama, kanilezi hi famba hi ka moya.
5Hakuva lava va hanyako hi ka nyama va chela kota hi zilo za nyama, kanilezi lava va hanyako hi ka moya va chela kota hi zilo za moya. Gal. 5:22
6Hakuva a maalakanyo ya nyama hi kufa, kanilezi a maalakanyo ya Moya hi kuhanya ni kurula.
7Hakuva a maalakanyo ya nyama wulala ka Nungungulu; hakuva a ma ingisi a nayo wa Nungungulu, futsi a ma zi koti.
8Lava va hanyako hi ka nyama a va zi koti ku xalalisa Nungungulu.
9Kanilezi nwina a mu hanyi hi ka nyama, mu hanya hi ka moya, loku a Moya wa Nungungulu wu kari wu tshama nzeni ka nwina. Kanilezi loku munhu a nga hi na Moya wa Kristu, a hi wakwe. Joh. 3:34; 1 Kor. 3:16
10Loku Kristu a hi ka nwina, hambu a miri wu file hi kota ya kuonha, kanilezi a moya wa hanya hi kota ya kululama.
11Zonake loku a Moya wa loyi a nga vuxa Jesu hi ka vafileko wu tshama ka nwina, yena loyi a nga vuxa Kristu Jesu hi ka vafileko i ta hanyisa ni mimiri ya nwina ya kufa hi Moya wakwe lowu wu tshamako ka nwina. Xip. 6:4, 5; 1 Kor. 6:14; Efe. 2:5
12Hilezoke vamakabye, a hi na nanzu a ka nyama, lezaku hi hanya hi ka nyama;
13hakuva loku mu hanya hi ka nyama mu tafa; kanilezi loku mu daya a mitiro ya miri hi moya mu ta hanya. Gal. 6:8
14Hakuva vontlhe lava va rangelwako hi Moya wa Nungungulu, lava hi vana va Nungungulu.
15Hakuva a mu amukelangi a moya wa wukhumbi lezaku mu tlhela mu chava; kanilezi nwina mu lo amukela a moya wa wunʼwana, lowu hi vitanako ha wona, hiku: Abba! Dadani! Isa. 56:5; 2 Tim. 1:7; Maheb. 2:15
16Ni wona Moya wutsumbu wu kustumunya zinwe ni moya wa hina lezaku hi vana va Nungungulu. 2 Kor. 1:22; Efe. 1:13
17Zonake loku hi hi vana, hi zigatshomba; a zigatshomba za Nungungulu, a zigatshomba zinwe na Kristu, loku hi kari hi xaniseka zinwe naye, kasi hi fela ku kuliswa zinwe naye. Miti. 26:18
18Hakuva nza alakanya nziku, a kuxaniseka ka lexi xikhati a ku na ku ringaniswa ni kungangamela loku ku ta nga wonekeliswa ka hina. 2 Kor. 4:17; 1 Ped. 1:6, 7
19Hakuva zontlhe zivangwa zi cuwukela hi kunavelisisa ka hombe a kuvululelwa ka vana va Nungungulu. 2 Ped. 3:13; 1 Joh. 3:2
20Hakuva zivangwa zi vekilwe lahasi ka zi nga nyawuliko, na ku nga hi kuranza ka zona, kanilezi hi kota ya yena loyi a nga zi veka hasi; Gen. 3:19
21kanilezi ku kona kutsumba lezaku a zivangwa zi ta tirulwa wukhumbini ga kubola zi enghena kutlhatlhekeni ka kungangamela ka vana va Nungungulu.
22Hakuva ha zi tiva lezaku a zivangwa zontlhe za keta ni ku xaniseka hi kulunwa kala makunu. Jer. 12:11
23Na ku nga hi lezo ntsena, kanilezi na hinawu, lava hi nga ni mbhanzu wo ranga wa Moya, hina kambe ha keta moyeni na hi kari hi rinzela a ku mahiwa vana, lezo hiku ngalo, a kutirulwa ka miri wa hina. Lu. 20:36; 2 Kor. 5:5
24Hakuva hi hanyiswa hi kutsumba loku; kanilezi a kutsumba loku ku wonekako a ka ha hi kutsumba; hakuva himani a tsumbako loku ku nga hi yena loyi a tsumbako lezi zi nga woniwiko ke? Maheb. 11:1
25Kanilezi loku hi tsumba lezi hi nga zi woniko, zonake ha zi lavelela hi kuhonisela.
26Hizalezo kambe a Moya wa hi vunetela a gomeni ga hina; hakuva hina a hi zi tivi a ku khongela kota lezi zi hi faneleko; kanilezi wona Moya wutsumbu wa hi khongotelela hi miketo leyi yi nga wulawulekiko. Mat. 20:22; Efe. 6:18; Zak. 12:10
27Loyi a hlolako timbilu wa ma tiva a maalakanyo ya Moya, hakuva wu khongotelela a vobasa khwatsi hi kuranza ka Nungungulu. 1 Tes. 2:4; Kuv. 2:23
28Hina ha zi tiva lezaku zontlhe zi tlhangana zi tira zinwe a kusaseka a ka vona lava va ranzako Nungungulu, lava va vitanilweko hi khungo gakwe. Gen. 50:20; Mav. 12:21; 2 Tim. 1:9
29Hakuva vona lava a nga va tiva hi kale, valava i lo va yimisa hi kale a ku ecana ni xiyimo xa Nʼwana wakwe, lezaku a fela ku maha matewula xikari ka vamakabye vanyingi. Ekso. 33:12; Joh. 17:22; Efe. 1:5; Kol. 1:18
30Lava a nga va yimisa hi kale, valava i lo va vitana, ni lava a va vitanileko i lo tlhela a va hlayela kululama; ni lava a nga va hlayela kululama i lo engeta a va kulisa. 1 Kor. 1:24; 6:11; Efe. 4:4
31Makunu hi taku yini hi lezi zilo ke? Loku Nungungulu a hi zinwe na hina; himani loyi a nga hi vukelako ke?
32Yena loyi a nga kala ku ala ni Nʼwana wakwe, kanilezi a mu nyikela hi kota ya hina hontlhe, xana a nga ta hi nyika zilo zontlhe zinwe naye ke?
33Himani a ta nga kecara a vahlawulilweko va Nungungulu ke? Hi Nungungulu a va hlayelako kululama. Isa. 50:8
34Himani loyi a ta nga va kona ke? Kristu Jesu loyi a ngafa a tlhela a vuka hi ka vafileko, loyi a nga canjeni ga xinene ga Nungungulu, hi yena loyi a hi khongelelako. Maheb. 7:23
35Himani a ta nga zi kota ku hi hambanyisa ni liranzo la Kristu ke? Ku ta ngha ku hi kukarateka, kutani hlomulo, kutani kuxanisiwa, kutani i ndlala, kutani wuna, kutani timhango, kutani supado ke?
36Khwatsi hi lezi ku tsalilweko ku ngalo:
Ha dawa hi kota ya wena gontlhelele siku;
Hi wuliwa lezaku hi tiyivu to tlhabyiwa. Tis. 44:22
37Kanilezi ka zontlhe lezi zilo ha hlula ni ku hlula ha yena loyi a nga hi ranza. 1 Joh. 5:4
38Hakuva nza kholwa nguvu lezaku hambu ku hi kufa, hambu wutomi, hambu ni tingelosi, hambu ni vafumeli va mimoya, hambu ni zilo zi nga kona, kutani zilo zi ta ngata, Kol. 1:16; 1 Ped. 3:22
39hambu ni mintamu ya le hehla, hambu ya lomu kueteni, kutani xinwani xilo xi vangilweko, zi nga ta zi kota ku hi hambanyisa ni liranzo la Nungungulu, leli li nga kona ka Kristu Jesu a Hosi ya hina. Joh. 10:28; Kol. 3:3
Attualmente Selezionati:
Va le Roma 8: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.
