Matayo 4
4
1Nkwaho Yesu aotolama la Bolimo ena sengelenge lacina amekame la Satana. 2Koko eneki’nd’okilaka toma beco la biane ntuk’inei, ena mbus’eho aoka njala. 3Ko bomeki aoya oyolokwela, ate, Yombo oyali Bon’ona Yakomba, sumola baufe bane bahalingwa bekonga bena mata. 4Koko ende aokutola, ate, Yoi limotengama, Bot’ola afaike la mata kei: aika la baoyi bahatu banafola en’onyua bona Yakomba. 5Koko Satana amotola en’onyanga bon’oeka; ko amambya ena liko lin’otumba bona Yakomba, nk’ena nsoli; 6ko amosumola, ate, Yombo oyali Bon’ona Yakomba, oyofuse eamene en’ase; lacina yoi limotengama,
Ende angotoma bikima binande lacin’ene,
Ko bangokotola en’akas’aniyo,
Lacina likaka line litofomana la lufe.
7Yesu amoutodya, ate, Yoi likina limotengama, Tamekake Yawe Yakomba ene. 8Lakina Satana amotola ena lingonji lina litale mene, ko amotuma bafoka bahatu bana benyanga behetu, ko la lokumo lona bafok’aho; 9ko amosumola, ate, Yomb’ombosamel’emi, ko onkumya, nongokofa toma tone tohatotu. 10Yesu amolokwela, ate, Uma, Satana; lacina yoi limotengama, Kumya Yawe Yakomba ene, ko okambele nk’ende kei. 11Ko Satana amocika; ko lenda, bikima bina loola baoya oyokambya.
12Eneki Yesu ookak’oka Yoane amolundama, aumaki, ko aocoa ena Ngalilaya. 13Ko auma ena Nazaleta, ko aoya oyokisase ena Kapalanauma ena mbolimboli la lose, en’enyanga bena Zebulona la Napatali; 14lacina yoi linaliki Yesaya, bosumoli, otendaka yilame, ate,
15Bonyanga bona Zebulona, l’onyanga bona Napatali,
Bonyanga bon’oli la lose, bili bona Yoladane,
Naglilaya ena Befenda;
16Bato banakisak’ase ena luucu
Baenaki fololo en’okolo;
Ko fololo efetaki eneyal’iyo
Banakisak’ase en’ili ko l’ena lilila lin’ewedi.
17En’esik’eho Yesu aomatsa osumol’ato bosimo, ate,
Bumbela baoyi’owe, lacina lifoka lina loola yoolama.
18Ko enema Yesu oeta en’oseleka bona lose lona Ngalilaya, aena Simona onotangama Petelo la Andelo on’otwa l’ende en’ecimo, bayafuse lisangi ena lose, lacin’oka iyo bayaaki bakembi bana nse. 19Ko amasumola, ate, Bonkil’emi, ko nongokiil’ino boyalame bakembi ban’ato. 20Isasanga baumbela basangi, ko bamokila. 21Ko enem’end’ocoa, aena bamoi bafe, nko Yakobo, bon’ona Zebedayo, la Yoane on’otwaki l’ende, bayaaki en’atu la Zebedayo bafango’oniyo, bayatele basangi’aniyo; ko amaelela. 22Isasanga baocika boatu l’afango’oniyo, ko bamokila.
23Ko Yesu aocoa ena bicimo bina Ngalilaya bihitu nselasela, ayalake ena basunagoga baniyo, ko ayasekodya bosimo bon’olotsi bona lifoka, ko ayaiky’ato nkangi ko la tongitongi bekotua l’ekotua. 24Ko lokumo lonande lolinda en’onyanga bona Sulia bohotu; ko baoyelaki bato bahatu banayaaki la nkangi la bifafo bekotua l’ekotua, ko l’iy’anayaaki la bademona ko l’esinga, ko la nkangi ena nkenyenyala; ko amaikya. 25Ko bik’ike bon’ato bamokila: bato bana Ngalilaya, l’ana Dekapoli, la Yelusalema, la Yudea, ko la bili bona Yoladane.
Attualmente Selezionati:
Matayo 4: BBY62
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Bokanda Bona Yakomba Bon’ototo © Alliance Biblique de la R. D. Congo, 1962