ܡܓܰܠܝܘܢ ܕܝܘܚܢܢ 10
10
ܡܰܬ̥ܠܳܐ ܕܽܗ̄ܘ ܪܳܥܝܳܐ
1”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕܠܳܐ ܡܽܗ̄ܘ ܬܰܪܥܳܐ ܥܳܒ݄ܪ ܠܺܗ̄ܝ ܛܝܳܪܳܐ ܕܰܥܘܳܢ̈ܶܐ، ܐܶܠܳܐ ܟܣܳܠ݄ܩ ܡܶܢ̱ ܕܽܘܟܬ̥ܳܐ ܚܪܶܬܳܐ، ܗܰܘܳܐ ܓܰܢܳܒ̥ܳܐ ܝܳܐ ܘܡܰܫ݄ܠܚܳܢܳܐ. 2ܘܗܰܘܳܐ ܕܥܳܒ݄ܪ ܡܽܗ̄ܘ ܬܰܪܥܳܐ ܪܳܥܝܳܐ ܕܰܥܘܳܢ̈ܶܐ ܝܳܐ. 3ܘܠܰܗ̄ܢܳܐ، ܗ̄ܽܘ ܢܳܛܽܘܪܳܐ ܕܽܗ̄ܘ ܬܰܪܥܳܐ ܟܦܳܬܰܚ ܠܶܗ ܗ̄ܽܘ ܬܰܪܥܳܐ، ܘܰܥ̈ܘܳܢܶܐ ܟܫ݄ܡܥܺܝ ܩܳܠܶܗ، ܘ݄ܟܩܳܪܶܐ ܗ̄ܰܦّܰܪ̈ܰܝܕ̥ܶܗ، ܟܽܘܠ ܚܰܕ̱ ܒ݄ܐܫܡܶܗ ܘ݄ܟܡܳܘܦܰܩّܶܗ. 4ܘܡ݄ܐ ܕܡܰܘܦܰܩ ܠܶܗ ܗ̄ܰܥ̈ܘܳܢܰܝܕ̥ܶܗ، ܩܽܘܕ̱ܡܰܝّܶܗ ܟ݄ܐܙّܶܗ، ܘܰܦّܰܪ̈ܰܝܕ̥ܶܗ ܟ݄ܐܙّ݄ܢ ܒ݄ܬ̥ܪܶܗ ܥܰܠ ܕܟܳܐܕ̥ܥܺܝ ܩܳܠܶܗ. 5ܘܒ݄ܬ̥ܪܶܗ ܕܚܰܕ̱ ܢܽܘܟ̥ܪܳܝܳܐ، ܗ̄ܰܥ̈ܘܳܢܶܐ ܠ݄ܐ ܟ݄ܐܙّ݄ܢ، ܐܶܠܳܐ ܟܥ݄ܪܩܺܝ ܡܶܢܶܗ، ܥܰܠ ܕܠ݄ܐ ܟ݄ܐܕ̥ܥܺܝ ܩܳܠܶܗ ܕܽܗ̄ܘ ܢܽܘܟ̥ܪܳܝܳܐ.“ 6ܗ̄ܽܘ ܡܰܬ̥ܠܰܢܳܐ ܝܶܫܽܘܥ ܐܡ݄ܪ ܠܰܗ ܠّܶܗ، ܘܗ݄ܢّܶܝ ܠܰܐ ܐܕ̥ܺܝܥܺܝ ܡ݄ܢ ܫܓ̥ܺܝܠ ܐܰܥܡܰܝّܶܗ.
ܗ̄ܽܘ ܪܳܥܝܳܐ ܛܳܒ̥ܳܐ
7ܘܕܰܥ݄ܪ ܝܶܫܽܘܥ ܐܡ݄ܪ ܠܰܗ ܠّܶܗ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܐܳܢܳܐ ܐ̱ܢܳܐ ܗ̄ܽܘ ܬܰܪܥܳܐ ܕܰܥܘܳܢ̈ܶܐ. 8ܘܟܽܘܠّܶܗ ܗܰܢܺܝ ܕܰܐܬ̥݄ܢ ܓܰܢܳܒ̥̈ܶܐ ܢܶܝ ܘܡܰܫ݄ܠܚܳܢ̈ܶܐ، ܐܶܠܳܐ ܗ̄ܰܥ̈ܘܳܢܶܐ ܠܳܐ ܫܰܡܺܝܥ݄ܢّܶܗ. 9ܐܳܢܳܐ ܐ̱ܢܳܐ ܗ̄ܽܘ ܬܰܪܥܳܐ، ܐܶܢ ܢܳܫܳܐ ܕܥܳܒ݄ܪ ܐܶܒܺܝ ܓܚܳܝܶܐ: ܟܥܳܒ݄ܪ ܘܢܳܦ݄ܩ ܘܚܳܙܶܐ ܕܽܘܟܬ̥ܳܐ ܕܪܳܥܶܐ (ܡܰܪܥܺܝܬ̥ܳܐ). 10ܗ̄ܽܘ ܓܰܢܳܒ̥ܳܐ ܠ݄ܐ ܟܳܐܬ̥ܶܐ ܐܶܠܳܐ ܕܓܳܢܽܒ̥ ܘܩܳܛ݄ܠ ܘ݄ܡܣܰܟ݄ܪ، ܐܶܠܳܐ ܐܳܢܳܐ ܐܰܬ̥ܺܝ ܐ̱ܢܳܐ ܠܰܫܰܢ ܚܰܝ̈ܶܐ ܗܳܘܰܠّܶܗ، ܘܡܶܕܶܐ ܛܰܒ̥ ܓܕܳܗ̄ܘܰܠّܶܗ. 11ܐܳܢܳܐ ܐ̱ܢܳܐ ܗ̄ܽܘ ܪܳܥܝܳܐ ܛܳܒ̥ܳܐ! ܘܽܗ̄ܘ ܪܳܥܝܳܐ ܛܳܒ̥ܳܐ ܢܰܦܫܶܗ ܟܡܰܚ݄ܬ ܡܶܢ̱ ܚܠܳܦ ܗ̄ܰܥ̈ܘܳܢܰܝܕ̥ܶܗ. 12ܘܽܗ̄ܘ ܐܰܓ̥ܺܝܪܳܐ ܕܠܰܝ̱ܬ ܝܳܐ ܗ̄ܽܘ ܪܳܥܝܳܐ ܘ݄ܕܠܰܝ̱ܬ ܢܶܝ ܕܺܝܕ̥ܶܗ ܗ̄ܰܥّܶܪ̈ܒܶܐ، ܡ݄ܐ ܕ݄ܚܙܶܐ ܠܶܗ ܗ̄ܽܘ ܕܶܒ̥ܳܐ ܐܰܬ̥ܳܝܳܐ ܠܰܐܦ ܐܶܠܶܗ، ܟܛܳܪܶܐ ܗ̄ܰܥܘܳܢ̈ܶܐ ܘ݄ܟܥܳܪ݄ܩ. ܘܟܳܐܬ̥ܶܐ ܗ̄ܽܘ ܕܶܒ̥ܳܐ ܟܢܳܬ݄ܫ ܗ̄ܰܥܘܳܢ̈ܶܐ ܘܟ݄ܡܒܰܪܒܰܙّܶܗ. 13ܘܽܗ̄ܘ ܐܰܓ̥ܺܝܪܳܐ ܟܥܳܪ݄ܩ، ܥܰܠ ܕܟ݄ܬ ܝܳܐ ܐܰܓ̥ܺܝܪܳܐ ܘܠܳܐ ܚܰܪܽܒ̥ ܠܶܗ ܡܰܢ̱ ܥ̈ܘܳܢܶܐ. 14ܐܳܢܳܐ ܐ̱ܢܳܐ ܗ̄ܽܘ ܪܳܥܝܳܐ ܛܳܒ̥ܳܐ! ܟܳܐܕ̥ܰܥ ܐ̱ܢܳܐ ܗܰܢܺܝ ܕܟ݄ܬܢܶܝ ܐܶܠܺܝ، ܘܗ݄ܢّܶܝ ܟ݄ܐܕ̥ܥܺܝ ܠܺܝ، 15ܐܟ̥ ܕܟܳܐܕ̥ܰܥ ܠܺܝ ܗ̄ܽܘ ܐܰܒܰܝܕ̥ܺܝ ܐܳܢܳܐ ܣܬܶܝ ܟܳܐܕ̥ܰܥܢܶܗ. ܘܢܰܦܫܺܝ ܟܡܰܚ݄ܬ ܐ̱ܢܳܐ ܡܶܢ̱ ܚܠܳܦ ܗ̄ܰܥܘܳܢ̈ܶܐ. 16ܘܟ݄ܬ ܠܺܝ ܣܬܶܝ ܥܶܪ̈ܒܶܐ ܚܪ̈ܶܢܶܐ ܕܠܰܝ̱ܬ ܢܶܝ ܡܽܗ̄ܘ ܛܝܳܪܰܢܳܐ، ܘܰܐܠّܶܗ ܣܬܶܝ ܟܳܐܒܰܥ ܕܡܰܝܬܶܐ ܐ̱ܢܳܐ، ܘܓ݄ܕܫܳܡܥܺܝ ܩܳܠܺܝ، ܘܰܥܘܳܢ̈ܶܐ ܟܽܘܠّܶܗ ܓܕܳܗ̄ܘ݄ܢ ܚܕ̥ܳܐ (ܡܰܪܥܺܝܬ̥ܳܐ) ܘܚܰܕ̱ ܪܳܥܝܳܐ. 17ܡܰܗ̄ܘܟ̥ܰܐ ܗ̄ܽܘ ܐܰܒܰܝܕ̥ܺܝ ܟܪܳܚܰܡ ܠܺܝ ܥܰܠ ܕ݄ܟܡܰܚ݄ܬ ܐ̱ܢܳܐ ܢܰܦܫܺܝ ܠܰܫܰܢ ܕܢܰܩܠܐ ܚܪܶܬܳܐ ܡܳܝܰܕܢܰܗ. 18ܠܰܝܬ ܢܳܫܳܐ ܕܫܳܩܶܠ ܠܰܗ ܡܶܢܺܝ، ܐܶܠܳܐ ܐܳܢܳܐ ܡܽܗ̄ܘ ܨܶܒܝܳܢܰܝܕ̥ܺܝ ܟܡܰܚ݄ܬܢܰܗ، ܡܺܐܝܕ̥ܶܗ ܕܟ݄ܬ ܠܺܝ ܫܽܘܠܛܳܢܳܐ ܟܡܰܚ݄ܬܢܰܗ ܘܫܽܘܠܛܳܢܳܐ ܕܢܰܩܠܐ ܚܪܶܬܳܐ ܐ̱ܢܳܐ ܡܳܝܰܕܢܰܗ. ܗ̄ܽܘ ܦܽܘܩܕܳܢܰܢܳܐ ܡܰܩܒܶܠ ܠܺܝ ܡܽܗ̄ܘ ܐܰܒܰܝܕ̥ܺܝ.“ 19ܘܢܰܩܠܐ ܚܪܶܬܳܐ ܗܰܘܺܝ ܦܠܺܝܓ̥ܽܘܬ̥ܳܐ ܒܰܝܢ ܗ̄ܰܝّܽܘܕ̥̈ܳܝܶܐ ܥܰܠ ܗ̄ܰܡّܰܐܡܪ̈ܰܢܺܝ. 20ܘܓ̥ܰܠܰܒܶܐ ܡ݄ܢّܶܗ ܐ݄ܡّܺܪ̱ܝ ܗ̄ܘܰܘ̱: ”ܕܰܝܘܳܐ ܟܺܝܬ ܐܶܒܶܗ، ܘ݄ܡܕܰܝܘܰܢ ܠܶܗ، ܩܰܝ ܟܫ݄ܡܥܺܝܬܽܘ ܠܶܗ؟“ 21ܘܗ݄ܢ ܡ݄ܢّܶܗ ܐ݄ܡّܺܪ̱ܝ ܗ̄ܘܰܘ̱: ”ܗ̄ܽܘ ܡܰܐܡܪܰܢܳܐ ܠܰܝ̱ܬ ܝܳܐ ܕܚܰܕ̱ ܕܰܝܘܳܢܳܐ، ܩܰܝ ܗ̄ܽܘ ܕܰܝܘܳܐ ܟܺܝܒܶܗ ܦܳܬ݄ܚ ܥܰܝܢ̈ܶܐ ܕܽܗ̄ܘ ܣܰܡܝܳܐ؟“
ܠܳܐ ܗܰܝܡܳܢܽܘܬ̥ܳܐ ܕܰܝّܽܘܕ̥̈ܳܝܶܐ
22ܘܗܰܘܺܝ ܗ̄ܘܰܐ ܗ̄ܽܘ ܥܶܐܕ̥ܳܐ ܕܽܗ̄ܘ ܚܽܘܕܳܬ̥ܳܐ ܒܽܐܘܪܶܫܠܶܡ، ܘܣܰܬ̥ܘܳܐ ܗ̄ܘܰܐ. 23ܘ݄ܡܗܰܠܰܟ̥ ܗ̄ܘܰܐ ܝܶܫܽܘܥ ܒܽܗ̄ܘ ܗܰܝܟܠܳܐ ܬܰܚܬ ܗ̄ܰܩܛܳܪ̈ܶܐ ܕ݄ܫܠܶܝܡܳܘܢ. 24ܘܰܐܬ̥݄ܢ ܗ̄ܰܝّܽܘܕ̥̈ܳܝܶܐ ܚܶܕ̥ܳܪܶܗ ܘܐܡ݄ܪّܰܗ ܠܶܗ: ”ܗܳܠ ܠܶܐܡܰܐ ܟܫ݄ܩܠܰܬ ܪܽܘܚܰܢ؟ ܐܶܢ ܗܰܬ ܗ̄ܰܬ ܡܫܺܝܚܳܐ ܐܡܰܪ ܠܰܢ ܒܓܰܠܝܳܐ.“ 25ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܐܡ݄ܪ ܠܺܝ ܠܟ̥ܽܘ ܘܠ݄ܐ ܟ݄ܡܗܰܝܡܢܺܝܬܽܘ. ܘܰܥܒܳܕ̥̈ܶܐ ܕܳܐܢܳܐ ܟܣܳܝܰܡ ܐ̱ܢܳܐ ܒ݄ܐܫܡܶܗ ܕܽܗ̄ܘ ܐܰܒܰܝܕ̥ܺܝ ܗ݄ܢّܶܝ ܟܣܳܗܕܺܝ ܐܰܥܠܺܝ. 26ܐܶܠܳܐ ܗܰܬܽܘ ܠ݄ܐ ܟ݄ܡܗܰܝܡܢܺܝܬܽܘ ܥܰܠ ܕܠܰܝ̱ܬ ܗ̄ܰܬܽܘ ܡܰܢ̱ ܦّܰܪ̈ܰܝܕ̥ܺܝ. ܐܟ̥ ܕܐܡ݄ܪ ܠܺܝ ܠܟ̥ܽܘ: 27ܗ̄ܰܥّܰܪ̈ܒܰܝܕ̥ܺܝ ܟܫܳܡܥܺܝ ܩܳܠܺܝ، ܘܳܐܢܳܐ ܟܳܐܕ̥ܰܥܢܰܢّܶܗ، ܘܗ݄ܢّܶܝ ܟܳܐܬ̥݄ܢ ܒ݄ܬ̥ܪܺܝ. 28ܘܳܐܢܳܐ ܟܳܗ̄ܒܶܢܰܢّܶܗ ܚܰܝ̈ܶܐ ܕ݄ܠܥܳܠܰܡ، ܘ݄ܠܥܳܠܰܡ ܠ݄ܐ ܓܡܺܝܣܰܟܪܺܝ، ܘܠܳܐ ܢܳܫܳܐ ܓܢܳܬܰܫّܶܗ ܡܶܢ̱ ܐܺܝܕ̥̈ܳܬ̥ܺܝ. 29”ܡܺܐܝܕ̥ܶܗ ܕܽܗ̄ܘ ܐܰܒܰܝܕ̥ܺܝ ܕܗܽܒ̥ ܠܶܗ ܠܺܝ ܪܰܒ ܝܳܐ ܡܶܢ̱ ܟܘܿܠ، ܘܠܳܐ ܢܳܫܳܐ ܟܺܝܒܶܗ ܢܳܬܰܫّܶܗ ܡܶܢ̱ ܐܺܝܕ̥ܶܗ ܕܽܗ̄ܘ ܐܰܒܰܝܕ̥ܺܝ. 30ܐܳܢܳܐ ܘܒܰܒܺܝ ܚܰܕ̱ ܢܰܐ.“
ܗ̄ܰܝّܽܘܕ̥̈ܳܝܶܐ ܟ݄ܐܒܥܺܝ ܕܪ݄ܓ̥ܡܺܝ ܠܶܗ
31ܘܰܝّܽܘܕ̥̈ܳܝܶܐ ܫܩ݄ܠّܶܗ ܟܶܐܦ̈ܶܐ ܕܪ݄ܓ̥ܡܺܝ ܠܶܗ.
32ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܓ̥ܰܠܰܒܶܐ ܥܒܳܕ̥̈ܶܐ ܫܰܦܺܝܪ̈ܶܐ ܡܶܢ̱ ܓܰܒ ܗ̄ܽܘ ܐܰܒܰܝܕ̥ܺܝ ܡܰܚܘܶܐ ܠܺܝ ܠܟ̥ܽܘ، ܠܰܫܰܢ ܐܰܝܢܰܐ ܥܒ̥ܳܕ̥ܳܐ ܡ݄ܢّܶܗ ܟܪ݄ܓ̥ܡܺܝܬܽܘ ܠܺܝ؟“ 33ܗ̄ܰܝّܽܘܕ̥̈ܳܝܶܐ ܐܡ݄ܪّܰܗ ܠܶܗ: ”ܠܳܐ ܠܰܫܰܢ ܥܒ̥ܳܕ̥ܳܐ ܫܰܦܺܝܪܳܐ ܟܪ݄ܓ̥ܡܺܝܢܰܐ ܠܳܟ̥، ܐܶܠܳܐ ܥܰܠ ܕܟܳܟ݄ܦܪܰܬ: ܗ̄ܰܬ ܢܳܫܳܐ ܗܰܬ ܘ݄ܟܣܰܝܡܰܬ ܪܽܘܚܳܟ̥ ܐܰܠܳܗܳܐ.“ 34ܝܶܫܽܘܥ ܐܡ݄ܪ ܠܰܗ ܠّܶܗ: ”ܩܰܝ ܠܳܐ ܗܰܘܟ̥ܰܐ ܟܬ̥ܺܝܒ̥ܳܐ ܝܳܐ ܒܽܗ̄ܘ ܢܳܡܽܘܣܰܬ̥ܟ̥ܽܘ: ’ܐܳܢܳܐ ܐܡ݄ܪ ܠܺܝ ܕܰܐܠܳܗ̈ܶܐ ܗܰܬܽܘ؟‘ 35ܐܶܢ ܠܰܗ̄ܢ݄ܟ ܐܡ݄ܪ ܠܶܗ (ܐܰܥܠܰܝّܶܗ) ܐܰܠܳܗ̈ܶܐ ܥܰܠ ܕܰܐܠّܶܗ ܗܰܘܝܳܐ ܗ̄ܺܝ ܡܶܠܬ̥ܳܐ ܕܰܐܠܳܗܳܐ. ܘܽܗ̄ܘ ܟܬ̥ܳܒ̥ܳܐ ܠ݄ܐ ܟܳܗ̄ܘܶܐ ܕܡ݄ܫܪܶܐ (ܘܒܳܛ݄ܠ). 36ܠܰܗ̄ܘܳܐ ܕܽܗ̄ܘ ܐܰܒܳܐ ܡܩܰܕܰܫ ܠܶܗ ܘ݄ܡܫܰܕܰܪ ܠܶܗ ܠܽܗ̄ܘ ܥܳܠܡܳܐ، ܗܰܬܽܘ ܟ݄ܐܡّܺܪ̱ܝܬܽܘ: ’ܟܟܳܦ݄ܪ،‘ ܥܰܠ ܕܐܡ݄ܪ ܠܺܝ ܠܟ̥ܽܘ ܕܽܗ̄ܘ ܐܰܒܪܳܐ ܕܰܐܠܳܗܳܐ ܐ̱ܢܳܐ؟ 37ܐܶܢ ܕܠܳܐ ܣܳܝܰܡ ܐ̱ܢܳܐ ܗ̄ܰܥܒܳܕ̥̈ܶܐ ܕܽܗ̄ܘ ܐܰܒܰܝܕ̥ܺܝ، ܠܳܐ ܡܗܰܝܡܢܺܝܬܽܘ ܠܺܝ! 38ܘܶܐܢ ܣܳܝܰܡ ܐ̱ܢܳܐ (ܗ̄ܰܥܒܳܕ̥̈ܶܐ ܕܽܗ̄ܘ ܐܰܒܰܝܕ̥ܺܝ)، ܘܶܐܢ ܕܶܐܠܺܝ ܠܳܐ ܡܗܰܝܡܢܺܝܬܽܘ، ܡܗܰܝܡܶܢܽܘ ܠܰܥܒܳܕ̥̈ܶܐ، ܠܰܫܰܢ ܕ݄ܐܕ̥ܥܺܝܬܽܘ ܘ݄ܡܗܰܝܡܢܺܝܬܽܘ ܕܽܗ̄ܘ ܐܰܒܰܝܕ̥ܺܝ ܐܶܒܺܝ ܝܳܐ ܘܳܐܢܳܐ ܒܽܗ̄ܘ ܐܰܒܰܝܕ̥ܺܝ ܐ̱ܢܳܐ.“
ܗ̄ܺܝ ܣܳܗܕܽܘܬ̥ܳܐ ܕܝܽܘܚܰܢܳܢ ܫܪܳܪܳܐ ܝܳܐ
39ܘܢܰܩܠܐ ܚܪܶܬܳܐ ܐܰܒܺܝܥܺܝ ܕܙܳܒܛܺܝ ܠܶܗ، ܘܢܰܦ݄ܩ ܡܶܢ̱ ܒܰܝܢܳܬ̥ܰܝّܶܗ. 40ܘܰܐܙّܶܗ ܠܽܗ̄ܘ ܓܰܒܳܐ ܚܪܶܢܳܐ ܡܽܗ̄ܘ ܢܰܗܪܳܐ ܕܝܽܘܪܕܢܳܢ ܠܕܽܘܟܬ̥ܳܐ ܕܡܰܥܡܰܕ̥ ܗ̄ܘܰܐ ܐܶܒܰܗ ܝܽܘܚܰܢܳܢ ܡܶܢ̱ ܡܶܩ݄ܕ̱ܡ، ܘܦܰܝ݄ܫ ܬܰܡܳܐ. 41ܘܓ̥ܰܠܰܒܶܐ ܢܳܫ̈ܶܐ ܐܰܬ̥݄ܢ ܠܓܰܒܶܗ ܘ݄ܐܡّܺܪ̱ܝ ܗ̄ܘܰܘ̱: ”ܝܽܘܚܰܢܳܢ ܠܳܐ ܣ݄ܡ ܠܶܗ ܘܠܳܐ ܚܕ̥ܳܐ ܐܳܬ̥ܳܐ، ܘܟܽܘܠ ܡܶܕܶܐ ܕܐܡ݄ܪ ܠܶܗ ܥܰܠ ܗ̄ܽܘ ܓܰܒ̥ܪܰܢܳܐ ܫܪܳܪܳܐ ܝܳܐ.“ 42ܘܓ̥ܰܠܰܒܶܐ ܡܗܰܝܡܰܢّܶܗ ܐܶܒܶܗ.
Valið núna:
ܡܓܰܠܝܘܢ ܕܝܘܚܢܢ 10: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation