ܡܓܰܠܝܘܢ ܕܝܘܚܢܢ 11
11
ܗ̄ܽܘ ܡܰܘܬܳܐ ܕܠܳܥܳܙܰܪ
1ܘܟ݄ܬ ܗ̄ܘܰܐ ܚܰܕ̱ ܟܰܐܺܝܒ̥ܳܐ، ܠܳܥܳܙܰܪ، ܡܺܗ̄ܝ ܩܪܺܝܬ̥ܳܐ ܕܒܶܝܬ̥ ܥܰܢܝܳܐ، ܗ̄ܽܘ ܐܰܚܽܘܢܳܐ ܕܡܰܪܝܰܡ ܘ݄ܕܡܳܪܬܳܐ. 2ܘܡܰܪܝܰܡ ܗܰܬ̥ܶܐ ܝܳܐ ܕ݄ܡܫ݄ܚ ܠܰܗ ܗ̄ܰܪّܰܓ̥̈ܠܳܬ̥ܶܗ ܕܝܶܫܽܘܥ ܒܽܗ̄ܘ ܒܰܣܡܳܐ، ܘ݄ܡܟܰܦܪܺܝ ܠܰܗ ܒܣܰܥܪܰܗ. ܠܳܥܳܙܰܪ ܗ̄ܽܘ ܟܰܐܺܝܒ̥ܳܐ ܗ̄ܽܘ ܐܰܚܽܘܢܰܝܕ̥ܰܗ ܗ̄ܘܰܐ. 3ܘܰܬّܰܪܬܶܝ ܐܰܚ̈ܘܳܬ̥ܳܐ ܡܫܰܕܰܪّܶܗ ܒ݄ܬ̥ܪܶܗ ܕܝܶܫܽܘܥ ܘܐܡ݄ܪّܶܗ: ”ܡܳܪܰܢ، ܟܰܐܠܶܗ ܗܰܘܳܐ ܕܟܳܪܳܚܡܰܬ ܠܶܗ ܟܰܐܺܝܒ̥ܳܐ ܝܳܐ.“ 4ܘܐܡ݄ܪ ܠܶܗ ܝܶܫܽܘܥ: ”ܗ̄ܽܘ ܟܶܐܒ̥ܰܢܳܐ ܠܰܝ̱ܬ ܝܳܐ ܕܽܗ̄ܘ ܡܰܘܬܳܐ، ܐܶܠܳܐ ܠܺܗ̄ܝ ܬܶܫܒܽܘܚܬܳܐ ܕܰܐܠܳܗܳܐ، ܘܶܐܒܶܗ ܓܡܺܝܫܰܒ݄ܚ ܗ̄ܽܘ ܐܰܒܪܳܐ ܕܰܐܠܳܗܳܐ.“ 5ܘܝܶܫܽܘܥ ܪܳܚܰܡ ܗ̄ܘܰܐ ܡܳܪܬܳܐ ܘܡܰܪܝܰܡ ܘܠܳܥܳܙܰܪ. 6ܘܺܗ̄ܝ ܢܰܩܠܐ ܕܫܰܡ݄ܥ ܕܟܰܐܺܝܒ̥ܳܐ ܝܳܐ، ܦܰܝ݄ܫ ܒܺܗ̄ܝ ܕܽܘܟܬ̥ܳܐ ܕܟ݄ܬ ܗ̄ܘܰܐ ܬܪܶܝ ܝܰܘܡ̈ܶܐ. 7ܘܒ݄ܬ̥݄ܪܟܶܐ ܐܡ݄ܪ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ: ”ܬܳܟ̥ܽܘ ܕ݄ܐܙّܰܢ ܢܰܩܠܐ ܚܪܶܬܳܐ ܠܺܝܗܽܘܕ̥. 8ܗ̄ܰܬّܰܠܡܺܝܕ̥̈ܰܝܕ̥ܶܗ ܐܡ݄ܪّܰܗ ܠܶܗ: ܡܰܠܦܳܢܳܐ، ܐܳܥܕܳܐ ܗ̄ܰܝّܽܘܕ̥̈ܳܝܶܐ ܐ݄ܒܥܺܝ ܗ̄ܘܰܘ̱ ܕܪ݄ܓ̥ܡܺܝ ܠܳܟ̥، ܘܗܶܫ ܟ݄ܐܙّܳܟ̥ ܠܬܰܡܳܐ؟“ 9ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܠܳܐ ܬܪܰܥܣܰܪ ܫܳܥ̈ܶܐ ܟܺܝܬ ܒܽܗ̄ܘ ܝܰܘܡܳܐ؟ ܘܶܐܢ ܢܳܫܳܐ ܕ݄ܡܗܰܠ݄ܟ̥ ܒܺܐܝܡܳܡܳܐ ܠ݄ܐ ܟܡܺܝܛܰܪܒ݄ܠ ܥܰܠ ܕ݄ܟܚܳܙܶܐ ܗ̄ܽܘ ܢܽܘܗܪܳܐ ܕܽܗ̄ܘ ܥܳܠܡܰܢܳܐ. 10ܘܶܐܢ ܢܳܫܳܐ ܒܠܰܠܝܳܐ ܟ݄ܡܗܰܠ݄ܟ̥ ܟܡܺܝܛܰܪܒ݄ܠ ܡܺܐܝܕ̥ܶܗ ܕܒܰܗܪܳܐ ܠܰܝܬ ܐܶܒܶܗ.“ 11ܘܗܰܢܺܝ ܐܡ݄ܪ ܠܶܗ ܝܶܫܽܘܥ ܘܒ݄ܬ̥݄ܪܟܶܐ ܐܡ݄ܪ ܠܰܗ ܠّܶܗ: ”ܠܳܥܳܙܰܪ ܗ̄ܽܘ ܚܰܒ̥ܪܰܝܕ̥ܰܢ ܕܰܡ݄ܟ̥، ܐܶܠܳܐ ܐܳܢܳܐ ܐܰܙܳܠܳܐ ܕܡܰܩ݄ܡܢܶܗ.“ 12ܐܡ݄ܪّܰܗ ܠܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ: ”ܡܳܪܰܢ، ܐܶܢ ܕܰܡ݄ܟ̥ ܓܢܳܝܰܚ ܠܶܗ.“ 13ܘܝܶܫܽܘܥ ܐܳܡܰܪ ܗ̄ܘܰܐ ܥܰܠ ܗ̄ܽܘ ܡܰܘܬܰܝܕ̥ܶܗ، ܘܗ݄ܢّܶܝ ܚܫܽܒّ̥ܶܗ ܥܰܠ ܗ̄ܽܘ ܕܡܳܟ̥ܳܐ ܕܺܗ̄ܝ ܫܰܢܬ̥ܳܐ ܐܡ݄ܪ ܠܶܗ. 14ܗ̄ܺܝ ܢܰܩܠܝܳܐ، ܝܶܫܽܘܥ ܐܡ݄ܪ ܠܰܗ ܠّܶܗ ܓܰܠܝܳܐ: ”ܠܳܥܳܙܰܪ ܡܰܝ݄ܬ̥! 15ܘ݄ܟܡ݄ܦܨܰܚ ܐ̱ܢܳܐ ܕܠܰܝܬ ܗ̄ܘܺܝ ܐ̱ܢܳܐ ܬܰܡܳܐ ܠܰܫܰܢܰܝܟ̥ܽܘ ܠܰܫܰܢ ܕ݄ܡܗܰܝܡܢܺܝܬܽܘ. ܘܳܐܥܕܳܐ، ܡܗܰܠܶܟ̥ܽܘ ܠܬܰܡܳܐ.“ 16ܘܬܳܐܘܡܰܐ، ܕܟ݄ܐܡّܺܪ̱ܝ ܠܶܗ ܬܳܐܡܳܐ، ܐܡ݄ܪ ܠܶܗ ܠܰܚّܰܒ̥ܪ̈ܳܢܰܝܕ̥ܶܗ ܗ̄ܰܬّܰܠܡܺܝܕ̥̈ܶܐ: ”ܛܪܳܐ ܐܰܚܢܰܐ ܣܬܶܝ ܐ݄ܙّܰܢ ܡܰܝܬ̥ܺܝܢܰܐ ܐܰܥܡܶܗ!“ 17ܘܰܐܬ̥ܺܝ ܝܶܫܽܘܥ ܠܒܶܝܬ̥ ܥܰܢܝܳܐ، ܘ݄ܚܙܶܐ ܠܶܗ ܕܰܐܪܒܥܳܐ ܝܰܘܡ̈ܶܐ ܗܰܘܺܝ ܗ̄ܘܰܝ ܠܶܗ ܒܽܗ̄ܘ ܩܰܒ̥ܪܳܐ. 18ܘܒܶܝܬ̥ ܥܰܢܝܳܐ ܥܰܠ ܗ̄ܽܘ ܓܰܒܳܐ ܕܽܐܘܪܶܫܠܶܡ ܗ̄ܘܰܐ، ܟܪܳܚܩܳܐ ܡܶܢܰܗ ܬܪܶܝ ܡܺܝ̈ܠܶܐ. 19ܘܓ̥ܰܠܰܒܶܐ ܡܰܢ̱ ܝّܽܘܕ̥̈ܳܝܶܐ ܐܰܬ̥݄ܢ ܗ̄ܘܰܘ̱ ܠܓܰܒ ܡܳܪܬܳܐ ܘܡܰܪܝܰܡ ܕܳܗ̄ܒ݄ܢ ܪܺܝܫܳܐ ܒܰܣܺܝܡܳܐ ܠܰܫܰܢ ܗ̄ܽܘ ܐܰܚܽܘܢܰܬّ̥ܶܗ.
ܝܶܫܽܘܥ ܝܳܐ ܗ̄ܺܝ ܩܝܰܡܬܳܐ ܘܰܚّܰܝ̈ܶܐ
20ܘܡܳܪܬܳܐ، ܗ̄ܺܝ ܢܰܩܠܐ ܕܫܰܡܺܝܥܳܐ ܕܰܐܬ̥ܺܝ ܝܶܫܽܘܥ ܢܰܦܺܝܩܳܐ ܠܩܰܕ̱ܡܽܘܬ̥ܶܗ، ܘܡܰܪܝܰܡ ܝܰܬܽܒ̥ܬܳܐ ܗ̄ܘܰܐ ܒܽܗ̄ܘ ܒܰܝܬܳܐ. 21ܘܐܡ݄ܪ ܠܰܗ ܡܳܪܬܳܐ ܠܝܶܫܽܘܥ: ”ܡܳܪܝ، ܕܳܗ̄ܘܰܬ ܗ̄ܘܰܐ ܗܰܪܟܶܐ، ܠܳܐ ܡܳܝܰܬ̥ ܗ̄ܘܰܐ ܐܰܚܽܘܢܺܝ! 22ܘܗܶܫ ܟ݄ܐܕ̥ܥܳܐ ܐ̱ܢܳܐ ܣܬܶܝ ܕܽܗ̄ܘ ܡܶܕܶܐ ܕ݄ܡܫܰܐܺܠܰܬ ܡܰܢ̱ ܐܠܳܗܳܐ ܟܳܗ̄ܒܶܐ ܠܳܟ̥.“ 23ܘܝܶܫܽܘܥ ܐܡ݄ܪ ܠܶܗ ܠܰܗ: ”ܐܰܚܽܘܢܰܟ̥ ܓ݄ܕܩܳܝ݄ܡ.“ 24ܡܳܪܬܳܐ ܐܡ݄ܪ ܠܰܗ ܠܶܗ: ”ܟ݄ܐܕ̥ܥܳܐ ܐ̱ܢܳܐ ܕܓ݄ܕܩܳܝ݄ܡ ܒܺܗ̄ܝ ܩܝܰܡܬܳܐ، ܒܽܗ̄ܘ ܝܰܘܡܳܐ ܚܰܪܳܝܳܐ.“ 25ܝܶܫܽܘܥ ܐܡ݄ܪ ܠܶܗ ܠܰܗ: ”ܐܳܢܳܐ ܐ̱ܢܳܐ ܗ̄ܺܝ ܩܝܰܡܬܳܐ ܘܰܚّܰܝ̈ܶܐ، ܡܰܢ ܕ݄ܡܗܰܝܡ݄ܢ ܐܶܒܺܝ ܘܶܐܢ ܡܳܝ݄ܬ̥ ܓ݄ܕܚܳܝܶܐ.“ 26ܘܟܽܘܠ ܚܰܕ̱ ܕܟ݄ܬ ܝܳܐ ܚܰܝܳܐ ܘ݄ܡܗܰܝܡ݄ܢ ܐܶܒܺܝ ܠܥܳܠܰܡ ܠ݄ܐ ܟܡܳܝ݄ܬ̥. ܟ݄ܡܗܰܝܡܢܰܬ ܒܰܗ̄ܬ̥ܶܐ؟ 27ܐܡ݄ܪ ܠܰܗ: ”ܐܺܝܢ ܡܳܪܝ، ܐܳܢܳܐ ܟܳܡܗܰܝܡܢܳܐ ܐ̱ܢܳܐ ܕܗܰܬ ܗ̄ܰܬ ܡܫܺܝܚܳܐ، ܗ̄ܽܘ ܐܰܒܪܳܐ ܕܰܐܠܳܗܳܐ ܕܳܐܬ̥ܶܐ ܠܽܗ̄ܘ ܥܳܠܡܳܐ.“
ܝܶܫܽܘܥ ܟܡܰܪܦܶܐ ܕ̈ܰܡܥܶܐ
28ܘܺܗ̄ܝ ܢܰܩܠܐ ܕܐܡ݄ܪ ܠܰܗ ܗܰܢܺܝ، ܐܰܙّܰܗ ܩܪܶܐ ܠܰܗ ܠܡܰܪܝܰܡ ܗ̄ܺܝ ܚܳܬ̥ܳܐ ܥܰܠ ܡܟܰܣܝܳܐ، ܘܐܡ݄ܪ ܠܰܗ ܠܰܗ: ”ܐܰܬ̥ܺܝ ܗ̄ܽܘ ܡܰܠܦܳܢܳܐ، ܘܟܳܩܳܪܶܐ ܠܰܟ̥.“ 29ܘܡܰܪܝܰܡ، ܗ̄ܺܝ ܢܰܩܠܐ ܕܫܰܡܺܝܥܳܐ، ܡܰܠ݄ܙ ܠܰܗ ܘܩܰܝܺܝܡܳܐ ܐܰܬ̥ܝܳܐ ܠܓܰܒܶܗ. 30ܘܝܶܫܽܘܥ ܗܶܫ ܠܳܐ ܥܰܒ݄ܪ ܗ̄ܘܰܐ ܠܺܗ̄ܝ ܩܪܺܝܬ̥ܳܐ، ܐܶܠܳܐ ܠܰܪܒ̥ܰܠ ܒܺܗ̄ܝ ܕܽܘܟܬ̥ܳܐ ܕܢܰܦܺܝܩܳܐ ܩܰܕ̱ܡܽܘܬ̥ܶܗ ܡܳܪܬܳܐ. 31ܘܗܰܢ݄ܟ ܣܬܶܝ ܗ̄ܰܝّܽܘܕ̥̈ܳܝܶܐ ܕܟ݄ܬ ܗ̄ܘܰܝܢܶܝ ܐܰܥܡܰܗ ܒܽܗ̄ܘ ܒܰܝܬܳܐ، ܕܰܐܬ̥݄ܢ ܗ̄ܘܰܘ̱ ܠܽܗ̄ܘ ܒܽܘܣܳܡܳܐ ܕܽܗ̄ܘ ܪܺܝܫܳܐ، ܡ݄ܐ ܕ݄ܚܙܰܠّܶܗ ܡܰܪܝܰܡ ܩܰܝܺܝܡܳܐ ܡܰܠ݄ܙܬܳܐ ܘܢܰܦܺܝܩܳܐ، ܐܰܙّ݄ܢ ܒ݄ܬ̥ܪܰܗ، ܥܰܠ ܕ݄ܚܫܽܒّ̥ܶܗ ܕܰܐܙܳܠܬܳܐ ܝܳܐ ܠܽܗ̄ܘ ܩܰܒ̥ܪܳܐ ܕܒܳܟ̥ܝܳܐ. 32ܘܗܺܝّܰܗ ܡܰܪܝܰܡ، ܗ̄ܺܝ ܢܰܩܠܐ ܕܰܐܬ̥ܝܳܐ ܠܺܗ̄ܝ ܕܽܘܟܬ̥ܳܐ ܕܟ݄ܬ ܗ̄ܘܰܐ ܐܶܒܰܗ ܝܶܫܽܘܥ ܘ݄ܚܙܶܐ ܠܰܗ، ܢܰܦܺܝܠܳܐ ܥܰܠ ܪ̈ܰܓ̥ܠܳܬ̥ܶܗ ܘܐܡ݄ܪ ܠܰܗ ܠܶܗ: ”ܡܳܪܝ! ܕܳܗ̄ܘܰܬ ܗ̄ܘܰܐ ܗܰܪܟܶܐ، ܐܰܚܽܘܢܺܝ ܠܳܐ ܡܳܝܰܬ̥ ܗ̄ܘܰܐ.“ 33ܘܝܶܫܽܘܥ، ܗ̄ܺܝ ܢܰܩܠܐ ܕܚܳܙܝܳܐ ܠܶܗ ܕܟܳܒܳܟ̥ܝܳܐ، ܘܰܐܥܡܰܗ ܣܬܶܝ ܗ̄ܰܝّܽܘܕ̥̈ܳܝܶܐ ܕܰܐܬ̥݄ܢ ܒ݄ܬ̥ܪܰܗ ܟܒܳܟ̥݄ܢ، ܟܰܝܽܒ̥ ܠܶܒܶܗ ܘܟܰܪܝܳܐ ܠܶܗ. 34ܘܐܡ݄ܪ ܠܶܗ: ”ܐܰܝܟܳܐ ܡܰܚ݄ܬܟ̥ܽܘ؟“ ܐܡ݄ܪّܰܗ ܠܶܗ: ”ܡܳܪܰܢ، ܬܳܟ̥ ܚܙܰܝ.“ 35ܘܢܳܚܬܺܝ ܗ̄ܘܰܘ̱ ܗ̄ܰܕّܰܡܥ̈ܶܐ ܕܝܶܫܽܘܥ. 36ܘܰܝّܽܘܕ̥̈ܳܝܶܐ ܐ݄ܡّܺܪ̱ܝ ܗ̄ܘܰܘ̱: ”ܚܙܰܝܽܘ ܡ݄ܩܰܐ ܪܳܚܰܡ ܗ̄ܘܰܝ ܠܶܗ.“ 37ܘܗ݄ܢ ܡ݄ܢّܶܗ ܐܡ݄ܪّܶܗ: ”ܗܰܢܳܐ ܕ݄ܦܬ݄ܚ ܠܶܗ ܥܰܝܢ̈ܶܐ ܕܽܗ̄ܘ ܣܰܡܝܰܘܳܐ، ܩܰܝ ܠ݄ܐ ܩܳܕܰܪ ܗ̄ܘܰܐ ܕܛܳܪܶܐ ܠܰܗ̄ܢܳܐ ܣܬܶܝ ܕܠܳܐ ܡܳܝ݄ܬ̥؟“
ܝܶܫܽܘܥ ܟܡܰܩ݄ܡ ܠܳܥܳܙܰܪ
38ܘܝܶܫܽܘܥ، ܘܗܺܝّܶܗ ܡܰܥܺܝܩܳܐ ܒܰܝܢ ܐܶܠܶܗ ܠܪܽܘܚܶܗ، ܐܰܬ̥ܺܝ ܠܰܩّܰܒ̥ܪ̈ܶܐ، ܘܽܗ̄ܘ ܩܰܒ̥ܪܳܐ ܡܥܰܪܬ̥ܳܐ ܗ̄ܘܰܐ، ܘܟܶܐܦܳܐ ܡܰܚܰܬܬܳܐ ܗ̄ܘܰܐ ܥܰܠ ܗ̄ܽܘ ܬܰܪܥܳܐ.
39ܘܝܶܫܽܘܥ ܐܡ݄ܪ ܠܶܗ: ”ܫܩܰܠܽܘ ܗ̄ܺܝ ܟܶܐܦܰܬ̥ܶܐ.“ ܐܡ݄ܪ ܠܰܗ ܠܶܗ ܡܳܪܬܳܐ، ܗ̄ܺܝ ܚܳܬ̥ܳܐ ܕܽܗ̄ܘ ܡܺܝܬ̥ܳܐ: ”ܡܳܪܝ̱، ܠܳܐܘܥܕܳܐ ܟܺܝܬܝܳܐ ܕܣܰܪܺܝ، ܐܰܪܒܥܳܐ ܝܰܘܡ̈ܶܐ ܗܰܘܺܝ ܠܶܗ!“ 40ܝܶܫܽܘܥ ܐܡ݄ܪ ܠܶܗ ܠܰܗ: ”ܠܳܐ ܐܡ݄ܪ ܠܺܝ ܠܰܟ̥ ܕ݄ܡܗܰܝܡܢܰܬ ܓܚ݄ܙܝܰܬ ܗ̄ܽܘ ܫܽܘܒܚܳܐ ܕܰܐܠܳܗܳܐ.“ 41ܘܡ݄ܕّܶܗ ܗ̄ܺܝ ܟܶܐܦܰܝܳܐ، ܘܗܺܝّܶܗ ܝܶܫܽܘܥ ܡܰܥܠܶܐ ܠܶܗ ܥܰܝܢ̈ܳܬ̥ܶܗ ܠܰܠܥ݄ܠ ܘܐܡ݄ܪ ܠܶܗ: ”ܐܰܒܳܐ، ܡܰܘܕܶܐ ܐ̱ܢܳܐ ܠܳܟ̥ ܕܫܰܡܺܝܥܰܬ ܠܺܝ. 42ܘܳܐܢܳܐ ܟܳܐܕ̥ܰܥ ܐ̱ܢܳܐ ܕܟܽܘܠ ܢܰܩܠܐ ܟܫ݄ܡܥܰܬ ܠܺܝ. ܐܶܠܳܐ ܠܰܫܰܢ ܗ̄ܰܢ ܢܳܫ̈ܰܢܺܝ ܕܟܳܩܰܝܡܺܝ ܗܰܪܟܶܐ ܟܳܐܡܰܪ ܐ̱ܢܳܐ ܗܰܢܺܝ ܕ݄ܡܗܰܝܡܢܺܝ ܕܗܰܬ ܡܫܰܕܰܪ ܠܳܟ̥ ܠܺܝ.“ 43ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܡܰܙܥܰܩ ܠܶܗ ܒܩܳܠܳܐ ܥܶܠܳܝܳܐ: ”ܠܳܥܳܙܰܪ! ܬܳܟ̥ ܠܰܪܒ̥ܰܠ!“ 44ܘܢܰܦ݄ܩ ܗ̄ܽܘ ܡܺܝܬ̥ܳܐ، ܘܺܐܝܕ̥̈ܳܬ̥ܶܗ ܘܪ̈ܰܓ̥ܠܳܬ̥ܶܗ ܡܰܐܣܪ̈ܶܐ ܒܟܰܢܦܰܠܝ̈ܳܬ̥ܳܐ، ܘܦܳܬ̥ܶܗ ܡܰܐܣ݄ܪܬܳܐ ܒܦܰܣܬܳܐ. ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܫܪܰܝܽܘ ܠܶܗ ܘ݄ܛܪܰܝܽܘ ܠܶܗ ܕ݄ܐܙّܶܗ.“
ܗ̄ܺܝ ܩܝܰܡܬܳܐ ܕܠܳܥܳܙܰܪ ܟ݄ܡܒܰܠܒ݄ܠܳܐ ܗ̄ܰܝّܽܘܕ̥̈ܳܝܶܐ
45ܘܓ̥ܰܠܰܒܶܐ ܡܰܢ̱ ܝّܽܘܕ̥̈ܳܝܶܐ ܕܰܐܬ̥݄ܢ ܓܰܒ ܡܰܪܝܰܡ ܗ̄ܺܝ ܢܰܩܠܐ ܕ݄ܚܙܰܠّܶܗ ܗ̄ܽܘ ܡܶܕܶܐ ܕܣ݄ܡ ܠܶܗ ܝܶܫܽܘܥ ܡܗܰܝܡܰܢّܶܗ ܐܶܒܶܗ. 46ܘܗ݄ܢ ܡ݄ܢّܶܗ ܐܰܙّ݄ܢ ܓܰܒ ܗ̄ܰܦܪ̈ܺܝܫܶܐ ܘܐܡ݄ܪّܰܢّܶܗ ܗ̄ܽܘ ܡܶܕܶܐ ܕܣ݄ܡ ܠܶܗ ܝܶܫܽܘܥ.
47ܘܰܪّܰܒ̈ܶܐ ܕܰܟّܳܗ̈ܢܶܐ ܘܰܦܪ̈ܺܝܫܶܐ ܡܟܰܢܫܺܝ، ܘ݄ܐܡّܺܪ̱ܝ ܗ̄ܘܰܘ̱: ”ܡ݄ܢ ܓܣܰܝܡܺܝܢܰܐ؟ ܗ̄ܽܘ ܓܰܒ̥ܪܰܢܳܐ ܟܣܳܝ݄ܡ ܓ̥ܰܠܰܒܶܐ ܐܳܬ̥ܘ̈ܳܬ̥ܳܐ. 48ܘ݄ܕܛܳܪܺܝܢܰܐ ܠܶܗ ܗܰܘܟ̥ܰܐ، ܗ̄ܰܢ ܢܳܫ̈ܶܐ ܟܽܘܠّܶܗ ܓ݄ܡܗܰܝܡܢܺܝ ܐܶܒܶܗ، ܘܰܪّܽܘܡܳܝ̈ܶܐ ܓܕܳܐܬ̥݄ܢ ܡܰܝܕܺܝ ܗ̄ܽܘ ܐܰܬ̥ܪܰܝܕ̥ܰܢ ܘܽܗ̄ܘ ܥܰܡܰܝܕ̥ܰܢ.“ 49ܘܚܰܕ̱ ܡ݄ܢّܶܗ ܕ݄ܐܫܡܶܗ ܩܰܝܳܦܳܐ، ܪܰܒܳܐ ܕܰܟّܳܗ̈ܢܶܐ ܗ̄ܘܰܐ ܕܺܗ̄ܝ ܫܰܢ̱ܬܰܝܳܐ، ܐܡ݄ܪ ܠܰܗ ܠّܶܗ: ”ܗܰܬܽܘ ܠ݄ܐ ܟ݄ܐܕ̥ܥܺܝܬܽܘ ܡܶܕܶܐ، 50ܘܠ݄ܐ ܟܚ݄ܫܒ̥ܺܝܬܽܘ ܕܛܰܒ̥ ܝܳܐ ܐܶܠܰܢ ܕܚܰܕ̱ ܓܰܒ̥ܪܳܐ ܡܳܝ݄ܬ̥ ܡܶܢ̱ ܚܠܳܦ ܕܽܗ̄ܘ ܥܰܡܳܐ، ܘܠܳܐ ܗ̄ܽܘ ܥܰܡܳܐ ܟܽܘܠܶܗ ܕܡܺܝܣܰܟ݄ܪ.“ 51ܘܗܰܬ̥ܶܐ، ܠܳܐ ܡܶܢ̱ ܩ݄ܕ̱ܡ ܪܽܘܚܶܗ ܐܡܺܝܪܳܐ ܠܶܗ، ܐܶܠܳܐ ܡܺܐܝܕ̥ܶܗ ܕܟ݄ܬ ܗ̄ܘܰܐ ܪܰܒܳܐ ܕܰܟّܳܗ̈ܢܶܐ ܕܺܗ̄ܝ ܫܰܢ̱ܬܰܝܳܐ، ܡ݄ܬ̥ܢܰܒܶܐ ܠܶܗ: ܕܝܶܫܽܘܥ ܓ݄ܕܡܳܝ݄ܬ̥ ܡܶܢ̱ ܚܠܳܦ ܕܽܗ̄ܘ ܥܰܡܳܐ. 52ܘܠܳܐ ܒܶܠܚܽܘܕ̥ܶܗ ܡܶܢ̱ ܚܠܳܦ ܕܽܗ̄ܘ ܥܰܡܳܐ، ܐܶܠܳܐ ܠܰܫܰܢ ܕܡܰܠܬ݄ܡ ܗ̄ܰܢ ܐܰܒܢ̈ܶܐ ܕܰܐܠܳܗܳܐ ܗ̄ܰܡܒܰܪ̈ܒܙܶܐ ܠ݄ܚܕ̥ܳܐ (ܡܰܪܥܺܝܬ̥ܳܐ). 53ܘܡܽܗ̄ܘ ܝܰܘܡܰܘܳܐ، ܡܰܚ݄ܬّܶܗ ܒܗܰܘ̈ܢܰܝّܶܗ ܕܩܳܛܠܺܝ ܠܶܗ. 54ܘܝܶܫܽܘܥ ܠܳܐ ܡܗܰܠܰܟ̥ ܗ̄ܘܰܐ ܒܓܰܠܝܳܐ ܒܰܝܢ ܗ̄ܰܝّܽܘܕ̥̈ܳܝܶܐ، ܐܶܠܳܐ ܐܰܙّܶܗ ܡܶܢ̱ ܬܰܡܳܐ ܠܕܽܘܟܬ̥ܳܐ ܩܰܪܽܒ̥ܬܳܐ ܡܽܗ̄ܘ ܡܰܕ̥ܒܪܳܐ، ܠܰܐܬ̥ܪܳܐ ܕ݄ܟܡ݄ܩܪܶܐ ܐܰܦܪܶܝܡ. ܘܬܰܡܳܐ ܐ݄ܙّܶܗ ܗ̄ܘܰܐ ܘܳܐܬ̥ܶܐ ܗ̄ܘܰܐ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܶܗ. 55ܘ݄ܡܩܰܪܰܒ̥ ܗ̄ܘܰܝ ܠܶܗ ܗ̄ܽܘ ܥܶܐܕ̥ܳܐ ܕܽܗ̄ܘ ܦܶܨܚܳܐ ܕܰܝّܽܘܕ̥̈ܳܝܶܐ، ܓ̥ܰܠܰܒܶܐ ܢܳܫ̈ܶܐ ܡܰܢ̱ ܩّ݄ܪ̈ܝܰܘܳܬ̥ܳܐ ܣܰܠܺܝܩܺܝ ܠܽܐܘܪܶܫܠܶܡ ܡܶܩ݄ܕ̱ܡ ܝܰܘܡܶܗ ܕܽܗ̄ܘ ܥܶܐܕ̥ܳܐ ܠܰܫܰܢ ܕ݄ܡܕܰܟ݄ܢ ܪܽܘܚܰܝّܶܗ (ܐܟ̥ ܕܽܗ̄ܘ ܢܳܡܽܘܣܳܐ). 56ܘܟܳܪܟ̥ܺܝ ܗ̄ܘܰܘ̱ ܥܰܠ ܝܶܫܽܘܥ، ܘ݄ܡܫܰܐܺܠܺܝ ܗ̄ܘܰܘ̱ ܡܶܢ̱ ܚܕ̥ܳܕ̥̈ܶܐ ܒܽܗ̄ܘ ܗܰܝܟܠܳܐ: ”ܡ݄ܢ ܟ݄ܐܡّܺܪ̱ܝܬܽܘ؟ ܠ݄ܐ ܟܳܐܬ̥ܶܐ ܠܽܗ̄ܘ ܥܶܐܕ̥ܳܐ؟“ 57ܘܰܪّܰܒ̈ܶܐ ܕܰܟّܳܗ̈ܢܶܐ ܘܰܦܪ̈ܺܝܫܶܐ ܗܽܒّ̥ܶܗ ܦܽܘܩܕܳܢܳܐ ܕܶܐܢ ܢܳܫܳܐ ܐܳܕ̥݄ܥ ܐܰܝܟܳܐ ܝܳܐ، ܛܪܳܐ ܡܰܚܘܶܐ ܠܶܗ ܐܰܠّܶܗ ܠܰܫܰܢ ܕܙܳܒܛܺܝ ܠܶܗ.
Valið núna:
ܡܓܰܠܝܘܢ ܕܝܘܚܢܢ 11: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation