انجیلِ یوحنا 18
18
گرفتار وابی‌یَنِ عیسی
1عیسی بعدَ گُتَنِ ای گَپَل، بِی شاگردَلِش رَت وَ اولَتِ دَرِۀ قِدرون. وُچِه باغی بی، وِ عیسی وِ شاگردَلِش رَتِن مِنِه باغ. 2امّا یهودا، کسی که تسلیمِش کِه، وَ او جا باخَوَر بی، سی‌یِکِه عیسی وِ شاگردَلِش چندین دَفَه وُچِه جَم وابی‌یَه بییِن. 3پَ یهودا عِدِه‌ای وَ سربازَل وِ هَم مأمورَلِ کاهِنَلِ گَپو وِ عالِمَلِ فرقه فَریسی نَه وَگِرُت، اومَه وُچو. اونگَل بِی چراغ وِ مشعل وِ اسلَحَه رَسییِن وُچو. 4عیسی، بِی یِکِه دونِس چه ایا وَ سَرِش، رَت جِلو وُ وَشون گُت: «کی نَه ایجوریت؟» 5جواب دان: «عیسِی ناصری نَه.» گُت: «مِنُم.» یهودا، کسی که تسلیمِش کِه هَم باشون وِیسایَه بی. 6وختی عیسی گُت: «مِنُم،» اونگَل پَساپَس رَتِن وِ اُفتان وَ زمین. 7پَ یِه دَف‌دَه وَشون پُرسی: «کی نَه ایجوریت؟» گُتِن: «عیسِی ناصری نَه.» 8جواب دا: «وَ ایشا گُتُم که خِمُم. پَ اَر مِنَه ایخِیت، بِلیت اینگَل بِرَن.» 9یِنَه گُت تا اوچیئی که نَهاتَر گُتَه بی وَ حقیقت بِرَسِه که: «هیچ کویَکی وَ اونگَلَی نَه که وَم بَخشی‌ای، وَ دَس نَدام.»
10اوسِه شمعون پطرس شُمشیری نَه که داشت، کَشی وِ ضربتی وَ خادم کاهن اعظم زَه وِ گوشِ راسِشَه بِری. نومِ او خادم مالخوس بی. 11عیسی وَ پطرس گُت: «شُمشیرِ خِتَه غلاف کُ! مَه نبایِس پیاله‌ای نَه که بُو وَم دایِه، بنوشُم؟»
بازجویی وَ عیسی در برابر گَپویَلِ یهود وِ حاشا کِردنِ پِطرُس
12اوسِه سربازَل، بِی فَرمُندۀ خِشون وِ مأمورَلِ یَهودی‌یَل عیسی نَه گِرُتِن. اونگَل دَسَلِشَه بَسِن. 13وِ اَوَل بُردِن طِی حَنّا که نِهِی قیافا کاهنِ اعظم بی. حَنّا خَسی قیافا، کاهن اعظمِ او زمون بی. 14قیافا هَمو کسی بی که وَ یَهودی‌یَل سفارش کِه بِختَرِه یِه نفر سی تَمومِ قومِ یهود بِمیرِه.
15شمعونِ پطرس وِ یِه شاگِردِ دَ هَم وَ دینِ عیسی رونَه وابی‌یِن. وَ وُچِه که او شاگرد وَ آشنایَلِ کاهن اعظم بی، پَ بِی عیسی رَت مِنِه سِرِی حونۀ کاهن اعظم. 16امّا پطرس وِیسا پَسِ در. اوسِه او شاگردِ دَ که وَ آشنایَلِ کاهن اعظم بی، رَت وَدَر وِ بِی کَنیزی که دربون بی، صُبَت کِه وِ پطرسَ بُرد داخل. 17اوسِه او کنیزِ دربون وَ پطرس پُرسی: «مَه تِ هَم نَه وَ شاگردَلِ او مِردی؟» پطرس جواب دا: «نَه، نیسُم.»
18هوا سرد بی. خادِمَل وِ مأمورَل تَشی بِی زغال بُر کِردَه بییِن وِ دورِش وِیسایَه بییِن وِ خِشونَه گرم ایکِردِن. پطرس هم بِی اونگَل وِیسایَه بی وِ خِشَه گرم ایکِه.
19کاهن اعظم وَ عیسی درموردِ شاگردَل وِ تعلیمَلِش پُرسی. 20عیسی جواب دا: «مِ بِی دنیا آشکارا گَپ زَمِه وِ همیشَه مِنِه کَنیسَه وِ مِنِه معبد که جِی جَم وابی‌یَنِ تَمومِ یَهودی‌یَلِه، تعلیم دامِه وِ چیئی مِنِه خَفا نَگُتِمِه. 21سیچِه وَ مِ ایپُرسی؟ وَ اونگَل بِپُرس که گَپَلِ مِنَه اِشنُفتِنِه! اونگَل خوب دونِن وَشون چه گُتِمِه.» 22وختی یِنَه گُت، یکی وَ ناتورَل که وُچِه وِیسایَه بی، تَلَنگوشی وَش زَه وِ گُت: «ایطو وَ کاهن اعظم جواب ایئی؟» 23عیسی جواب دا: «اَر خلاف گُتُم، خلافِمَه ثابت کُ؛ امّا اَر راس گُتُم، سیچِه مِنَه ایزَنی؟» 24اوسِه حَنّا وِّ نَه دَس بَسَه بِسی کِه طِی قیافا، کاهن اعظم.
25مِنِه هَمو حال که شمعونِ پطرس وِیسایَه بی وِ خِشَه گرم ایکِه، یِه‌پاره‌ای وَش پُرسییِن: «مَه نَه تِ هَم یکی وَ شاگردَلِ وِّنی؟» وِّ حاشا کِه وِ گُت: «نَه! نَه وَ اونگَلُم.» 26یکی وَ خادمَلِ کاهن اعظم که وَ خیشَلِ او کسی بی که پطرس گوشِشَه بِرییَه بی، گَت: «مَه مِ خُوم، تِنَه باش مِنِه او باغ نَدییُم؟» 27پطرس اُمبِلا حاشا کِه. هَمو دَقَه قِروسی بُنگ دا.
محاکمۀ عیسی مِنِه حضور پیلاتُس
28عیسی نَه وَ طِی قیافا بُردِن وَ کاخِ فرمُندار. گَکون بی. اونگَل خِشون نَرَتِن مِنِه کاخ تا نجس وانَبون وِ بِتَرِن شومِ عیدِ پِسَحَ بِخَرِن. 29اوسِه پیلاتس اومَه وَدَر طِیشون وِ پُرسی: «ای مِردَ وَ چه جرمی متهم ایکِنیت؟» 30جواب دان، گُتِن: «اَر مجرم نَبی وَت تسلیمِش نیکِردیم.» 31پیلاتُس وَشون گُت: «ایشا خِتون وِّ نَه بُویَریت وِ بنا وَ شریعت خِتون محاکِمَه کِنیت.» یَهودی‌یَل گُتِن: «ایما اجازۀ اعدامِ کسی نَه نَیاریم.» 32وَ ای ترتیب گَپِ عیسی که گُتَه بی بِی چطو مَرگی بایِس بِمیرِه، اَنجوم وابی.
33پَ پیلاتس وَرگَشت وَ کاخ وِ عیسی نَه خواس، وَش گَت: «مَ تِ پادشاه یَهودی‌یَلی؟» 34عیسی جواب دا: «یِنَه تِ خِت ایگِی، یا بَقیَه درموردِ مِ وَت گُتِنِه؟» 35پیلاتُس جواب دا: «مَه مِ یهودییَم؟ ملتِ خُوت وِ کاهنلِ گَپو تِنَه وَم تسلیم کِردِنِه؛ چه کِردی‌یِی؟» 36عیسی جواب دا: «پادشایی مِ نَه وَ ای دنیا یَه. اَر پادشایی مِ وَ ای دنیا بی، خادِمَلُم ایجنگییِن تا وَ دَسِ یَهودی‌یَل اسیر نَوابوم. امّا پادشایی مِ نَه وَ ای دنیا یَه.» 37پیلاتُس وَش پُرسی: «پَ تِ پادشایی؟» عیسی جواب دا: «تِ خِت ایگِی که مِ یِه پادشایَم. سی‌یِکِه مِ سی یِه وَ دنیا اومَمِه وِ سی یِه وَ ای دنیا پا نَهامِه تا وَ حقیقت شهادَت بییُم. پَ هر کس که این حقیقتِه، وَ گَپَلِ مِ گوش اییِه.» 38پیلاتُس پُرسی: «حقیقت چِنِه؟»
وختی یِنَه گُت، اُمبِلا رَت وَدَر طِی یَهودی‌یَل وُ وَشون گُت: «مِ هیچ دلیلی سی محکوم کِردَنِ وِّ نَجُسُم. 39امّا ایشا رسمی داریت که مِنِه عیدِ پِسَح یِه زندانی نَه سیتون آزاد کِنُم؛ مَه ایخِیت پادشاهِ یَهودی‌یَلَه آزاد کِنُم؟» 40اونگَل مِنِه جواب قیرَه زَن: «وِّ نَه نَه، بلکم باراباسَ آزاد کُ!» وِ باراباس یِه رازَن بی.
Valið núna:
انجیلِ یوحنا 18: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company