انجیلِ یوحنا 17
17
دِعِی عیسی سی خُوش
1بعدَ ای گَپَل، عیسی سیلَ آسمون کِه وِ گُت: «بُو، ساعَتِش رَسییِه. کِرِتَه جلال بییِه تا کِرِت هَم تِنَه جلال بییِه. 2سی‌یِکِه تِ اقتدارِ تَمومِ آیَمَلَه وَش دائی‌یِی تا وَ تَمومِ اونگَلی که وَ دَسِش دائی‌یِی، حیاتِ ابدی بُویَخشِه. 3وِ یِنِه حیاتِ ابدی، که تِنَه، تِنا خدِیِ حقیقی، وِ عیسی مسیحَ که بِسی کِردی‌یِی، بِشناسِن. 4مِ کاری نَه که وَ دَسِ مِ دِی، وَ آخِر رَسُندُم، وِ ایطو تِنَه وَ ری زمین جلال دام. 5پَ ایسِه ای بُو، تِ هَم مِنَه مِنِه حضورِ خُوت جلال بییِه، وَ هَمو جلالی که نِهِی شروع دنیا طِی تِ داشتُم.»
6«مِ نومِ تِنَه وَ مردِمی که وَ دنیا وَ مِ دِی، آشکار کِردُم. این تِ بییِن وِ تِ اونگَلَه وَ مِ دِی، وِ کلامِتَه نِگَه کِردِن. 7ایسِه فَمِسِنِه که هر چیئی که وَ مِ بَخشی‌یِی، وَراسی وَ طرفِ تِنِه. 8سی‌یِکِه کلامی نَه که وَ مِ دِی، وَشون دام، وِ اونگَل وِه نَه قبول کِردِن وِ خاطرجَم وابی‌یِن که وَ طِی تِ اومَمِه، وِ باوَر کِردِن که تِ مِنَه بِسی کِردی‌یِی. 9دِعِی مِ سی اونگَلِه؛ مِ نَه سی دنیا بلکم سی اونگَلی دعا ایکِنُم که تِ وَم بَخشی‌یِی، سی‌یِکِه این تِنِن. 10هر چیئی که این مِنِه، این تِنِه وِ هر چیئی که این تِنِه، این مِنِه؛ وِ مِنِه اونگَل جلال جُسِمِه. 11بیشتَرَ یِه مِنِه دنیا نیوِیسُم، امّا اونگَل هَنی مِنِه دنیایَن؛ مِ ایام طِیت. ای بُو قدّوس، اونگَلی نَه که وَم بَخشی‌یِی وَ قدرتِ نومِ خُوت حفظ کُ، تا یَک بون، هَمیطو که ایما یَکیم. 12مِ اونگَلَه تا زمونی که باشون بییُم، حفظ کِردُم، وُ وَ اونگَل وَ قدرتِ نومِ تو که وَ مِ بَخشی‌یِی، محافظت کِردُم. هیچ کویَکی وَ اونگَل هلاک نَوابی، غیرَ کِرِ هلاکت، تا نوشتۀ مقدّس اَنجوم وابو. 13امّا ایسِه ایام طِیت، وِ ای گَپَلَه زمونی ایگُم که هَنی مِنِه دنیایَم، تا وَ شاییِ مِ سَرریز وابون. 14مِ کلامِ تِنَه وَشون دام، امّا دنیا وَشون نفرت داشت، سی‌یِکِه نَه این دنیایَن، هَمیطو که مِ نَه این دنیایَم. 15مِ نیخوام که اونگَلَه وَ ای دنیا بُویَری، بلکم ایخوام وَ او شریر حِفظِشون کِنی. 16اونگَل نَه این دنیایَن، هَمیطو که مِ نَه این دنیایَم. 17اونگَلَه وقفِ حقیقت کُ؛ کلامِ تِ حقیقَتِه. 18هَموطو که تِ مِنَه بِسی کِردی وَ دنیا، مِ هَم اونگَلَه بِسی ایکِنُم وَ دنیا. 19مِ خِمَه وَ خاطرِ اونگَل وقف ایکِنُم، تا اونگَل هم وقفِ حقیقت بون.»
20«درخواسِ مِ تِنا نَه سی اونگَلِه، بلکم هَمیطو سی کَسَلی یَه که وَ واسطۀ کلامِ اونگَل وَ مِ ایمون ایارِن، 21تا هَمَه یَک بون، هَموطو که تِ ای بُو مِنِمی وِ مو مِنِه تو. طوری کُ که اونگَل هَم مِنِه ایما بون، تا دنیا باوَر کِنِه که تِ مِنَه بِسی کِردی‌یِی. 22وِ مِ جلالی نَه که وَ مِ بَخشی‌ای، وَشون بَخشییُم تا یَک وابون، هَموطو که ایما یَکیم. 23مو مِنِه اونگَل وِ تو مِنِه مو. طوری کُ که اونگَل هم وَ بُن یَک وابون تا دنیا بِیونِه که تِ مِنَه بِسی کِردی‌یِی، وِ اونگَلَه هَموطو دوس داشتی که مِنَه دوس داشتی. 24ای بُو، ایخوام اونگَلی که وَ مِ بَخشی‌یِی بِی مِ بون، هَموچِه که مِ هِسُم، تا جلالِ مِنَه بِوینِن، جلالی که تِ وَم بَخشی‌یِی؛ سی‌یِکِه نِهِی شروعِ دنیا مِنَه دوس داشتی.»
25«ای بُو عادل، دنیا تِنَه نیشناسِه، امّا مِ تِنَه ایشناسُم، وِ اینگَل فَمِسِنِه که تِ مِنَه بِسی کِردی‌یِی. 26مِ نومِ تِنَه وَشون شِناسُندُم وِ ایشناسونُم، تا محبتی که تِ وَم داشتی‌یِی، مِنِه اونگَل هَم بو وِ مِ هَم مِنِه اونگَل بوم.»
Valið núna:
انجیلِ یوحنا 17: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company