انجیلِ یوحنا 11

مُردَنِ ایلعازَر

1مِردی وَ نومِ ایلعازَر مَریض بی. وُّ وَ مردِمونِ بِیت‌عَنیا، دهاتِ مریم وُ دَیَش مارتا بی. 2مریم هَمو زنی بی که ری پایَلِ خداوند روغنِ خَشبو رِت وِ بِی پَلَلِش پایَلِ وِّ نَه خشک کِه. ایسِه کَکاش ایلعازَر مریض بی. 3پَ دَدِیَلِ ایلعازَر سی عیسی پِیوم بِسی کِردِن، گُتِن: «ای خداوند، دوسِ عزیزت مریضِه.» 4عیسی وختی ای خَوَرَ اِشنُفت، گُت: «ای مریضی باعثِ مُردن نیابو، بلکم سی جلالِه خدایَه، تا کِرِ خدا وَ واسطۀ وِه جلال بِجورِه.» 5عیسی، مارتا وِ دَیَش وِ ایلعازَرَ دوس داشت. 6پَ وختی اِشنُفت که ایلعازَر مریضِه، دِ رو دَ هَم وِیسا وَ جِیئی که بی.

7اوسِه وَ شاگردلِش گُت: «بی‌یِیت اُمبِلا بِرِیم وَ یهودیَه.» 8شاگردلِش گُتِن: «استاد، چیئی وَش نَرَتِه که یَهودی‌یَل ایخواسِن سنگسارت کِنِن، وِ تِ اُمبِلا ایخِی بِرِی وُچو؟» 9عیسی جواب دا: «مَه روز، نَه دُوازَه ساعتِه؟ آیَمی کِه مِنِه روز رَه بِرَه، نیسُرِه، سی‌یِکِه نورِ ای دنیا نَه ایبینِه. 10امّا اَر کسی مِنِه شُو رَه بِرَه، ایسُرِه، سی‌یِکِه نور مِنِه "شُو" نی.» 11بعدَ ای گَپَل وَشون گُت: «رَفیقِمون ایلعازَر خُسییِه، امّا مِ ایرَم تا دیارِش کِنُم.» 12شاگردل وَش گُتِن: «آقا، اَر خُسییِه، خوب ایابو.» 13امّا عیسی وَ مُردنِ وِّ گَپ ایزَه، در حالی که شاگردل گَمون ایکِردِن منظورِ عیسی یِنِه که ایلعازَر خُوسییِه وِ استراحت ایکِنِه. 14اوسِه عیسی رُک وَشون گُت: «ایلعازَر مُردِه. 15وُ وَ خاطرِ ایشا شایَمونُم که وُچِه نَبییُم، تا ایمون بیاریت. امّا ایسِه بِرِیم طِیش.» 16توما، که معروف بی وَ جِمِلو، وَ شاگردَلِ دَ گُت: «بی‌یِیت ایما هم بِرِیم تا باش بِمیریم.»

مِ قیامت وِ حیاتُم

17وختی عیسی رَسی وُچو، فَمِس که چار روزِه که ایلعازَرَ نَهانِه مِنِه قبر. 18بِیت‌عَنیا نیم فرسخ بِی اورشلیم فاصلَه داشت. 19یَهودی‌یَلِ زیادی اومَیَه بییِن طِی مریم وُ مارتا تا اونگَلَه سی مُردَنِ کَکاشون دِلداری بییِن. 20وختی مارتا اِشنُفت که عیسی ایا وُچو رَت وَ رَش، امّا مریم مِنِه حونَه وِیسا. 21مارتا وَ عیسی گُت: «ای خداوند، اَر وِیچِه بیئی کَکام نیمُرد. 22امّا دونُم که هَمیسِه هَم هر چه وَ خدا بِخِی، خدا وَت اییِه.» 23عیسی وَش گُت: «کَکات زِندَه ایابو.» 24مارتا وَش گُت: «دونُم که مِنِه روز قیامت زندَه ایابو.» 25عیسی گُت: «قیامت وِ حیات مِنُم. وِه که وَم ایمون بیارِه، حتی اَر بِمیرِه، اُمبِلا زندَه ایابو. 26وِ هرکه زندَه یَه وِ وَم ایمون دارِه، وَتَه نیمیرِه؛ مَه یِنَه باوَر ایکِنی؟» 27مارتا گُت: «بَلِه آقا، مِ ایمون آوُردِمِه که تِ مسیحِ موعودی، کِرِ خدا، هَموِه که بایِس اییومَه وَ دنیا.»

28یِنَه گُت وِ رَت، وِ دَیَش مریمَ صیا کِه، مِنِه خلفت وَش گُت: «استاد وِیچِنِه وِ تِنَه صیا ایکِنِه.» 29مریم وختی یِنَه اِشنُفت، زی وَریسا وِ جِکِس طِی عیسی. 30عیسی هَنی نَرَتَه بی مِنِه دهات، بلکم هَم وُچِه بی که مارتا رَتَه بی وَ دییَنِش. 31یَهودی‌یَلی که بی مریم مِنِه حونَه بییِن وُ وِّ نَه دِلداری ایدان، وختی دییِن مریم هولَکی وَریسا وِ رَت وَدَر، وَ دینِش رُونَه وابی‌یِن. گمون ایکِردِن ایرَه سرِ قبر تا وُچِه شیوَن کِنِه. 32وختی مریم رَسی وُچِه که عیسی بی وُ وِّ نَه دی، اُفتا وَ پایَلِش وِ گُت: «آقا، اَر وِیچِه بیئی کَکام نیمُرد.» 33وختی عیسی شیونِ مریم وِ یَهودی‌یَلِ باشَه دی، حِناسه‌ای وَ دل کَشی وِ سخت پریشون وابی. 34پُرسی: «وِّ نَه نِهِیتِه کوچو؟» اونگَل وَش گُتِن: «آقا، بیو وِ سیل کُ.» 35عیسی گِریوِس. 36اوسِه یَهودی‌یَل گُتِن: «سِی کِنیت چِقَه وِّ نَه دوس داشتِه!» 37امّا یِه‌پاره‌ای گُتِن: «مَه کسی که تییَلِ او مِردِ کورَ واز کِه، نیتَرِس جِلو مُردنِ ایلعازَرَ بِگِرِه؟»

زندَه وابی‌یَنِ ایلعازَر

38اوسِه عیسی، دِبارَه مِنِه حالی که حِناسه‌ای کَشی، اومَه سرِ قبر. قبر، اِشکَفتی بی که وَ دَهَنَش بَردی نَهایَه بییِن. 39عیسی گُت: «بَردَ وَگِریت.» مارتا دَیِی مُردَه گُت: «آقا، ایسِه دَ بو کِردِه، سی‌یِکِه چار رو وَش رَتِه.» 40عیسی وَش گُت: «مَه وَ تِ نَگُتُم که اَر ایمون داشتَه بِی، جلالِ خدا نَه ایبینی؟» 41پَ بَردَ وَگِرُتِن. اوسِه عیسی سیل وَ بالا کِه وِ گُت: «بُو، تِنَه شکر ایکِنُم که مِنَه اِشنُفتی. 42مِ دونِسُم که همیشَه مِنَه ایشنِفی. امّا یِنَه وَ خاطرِ کَسَلی گُتُم که وِیچِه حاضِرِن، تا باوَر کِنِن که تِ مِنَه بِسی کِردی‌یِی.» 43یِنَه گُت وِ اوسِه وَ صییِی بِلَند قیرَه زَه: «ایلعازَر، بیو وَدَر!» 44پَ او مُردَه، دَر حالی که دَسِ پاش مِنِه کفن بَسَه بی وِ دسمالی دورِ سَرِصورَتِش پیچِسَه بی، اومَه وَدَر. عیسی وَشون گُت: «وِّ نَه واز کِنیت وِ بِلیت بِرَه.»

نَخشۀ کُشتَنِ عیسی

45اوسِه یِکِلی وَ یَهودی‌یَلی که اومَیَه بییِن سی دییَنِ مریم وِ کارِ عیسی نَه دییَه بییِن، وَش ایمون آوُردِن. 46امّا یِه‌پاره‌ای وَ اونگَل رَتِن طِی عالِمَلِ فرقۀ فَریسی وِ اونگَلَه وَ اوچیئی که عیسی کِردَه بی، باخَوَر کِردِن. 47پَ کاهنلِ گَپو وِ عالِمَلِ فرقۀ فَریسی نِشَسِن وَ شُور، گُتِن: «چه کِنیم؟ ای مِرد یِکِلی نِشونه‌یَل وِ معجزه‌یَل اَنجوم اییِه. 48اَر بِلیم هَمیطو بِرَه جِلو، همه وَش ایمون ایارِن، وِ رومی‌یَل ایان، ای جا وِ ای مِلَتَه وَ دَسِمون ایسونِن.» 49امّا یکی وَ اونگَل، وَ نومِ قیافا، که مِنِه او سال کاهن اعظم بی، وَ بَقیَه گُت: «ایشا هیچ نُونیت 50وِ فکر نیکِنیت که صَلاتون مِنِه یِنِه که یِه نفر سی قوم بمیرِه، تا یِکِه تَمومِ ملت نابود وابون.» 51امّا ای گَپ وَ خُوش نَبی، بلکم سی‌یِکِه مِنِه او سال کاهن اعظم بی، ایطو نبوّت کِه، که عیسی سی ملت ایمیرِه، 52وِ نَه تِنا سی ملت، بلکم سی جَم کِردَن وِ یِکی کِردَنِ اولادَلِ خدا که پَخشِ‌پَلایَن. 53اوسِه، وَ هَمو روز نخشَه کَشییِن تا وِّ نَه بِکِشِن.

54سی هَمیو عیسی دَ آشکارا مِنِه یَهودی‌یَل اومدِ رفت نیکه، بلکم رَت وَ شهری وَ نومِ اِفرایِم مِنِه منطقه‌ای نِزِنگِ بیابون وِ بی شاگردلِش وُچِه وِیسا.

55وختی عیدِ پِسَحِ یَهودی‌یَل نِزِنگ وابی، عِدۀ زیادی وَ منطقه‌یَلِ جورواجور رَتِن وَ اورشلیم تا آداب پاکیِ نِهِی عیدِ پِسَحَه وَجا بیارِن. 56اونگَل وَ دینِ عیسی بییِن وِ مِنِه هَمو حال که مِنِه صحن معبد وِیسایَه بییِن، وَ یَک ایگُتِن: «چه گمون ایکِنیت؟ مَه وَتَه سی عید نیایِه؟» 57امّا کاهنلِ گَپو وِ عالِمَلِ فرقۀ فَریسی دستور دایَه بییِن که هر وخت کسی بِفَمِه عیسی کوچِنِه، خَوَر بییِه تا بِگِرِنِش.

Valið núna:

انجیلِ یوحنا 11: SLB

Áherslumerki

Deildu

Afrita

Want to have your highlights saved across all your devices? Sign up or sign in

@ 2024 Korpu Company

Lærðu meira um کتاب مقدس به زبان لری جنوبی

انجیلِ یوحنا 11

Popular Bible Verses from
انجیلِ یوحنا 11

Biblía:

Luri, Southern

Útgáfa: کتاب مقدس به زبان لری جنوبی - SLB