انجیلِ یوحنا 10
10
چِپونِ خوب
1«وراسی، وَ ایشا ایگُم، وِّ که وَ در نَرَه مِنِه آغِلِ میشَل، بلکم وَ رَیی دَ بِرَه بالا، دُز وِ رازَنِه. 2امّا وِّ که وَ دَر بیا داخل، چِپونِ میشَلِه. 3دَربون، دَرَ وَ ریش واز ایکِنِه وِ میشَل وَ صیاش گوش اییِن؛ وِّ میشَلِ خِشَه وَ نوم صیا ایکِنِه، وِ اونگَلَه ایبَرِه وَدَر. 4وختی تَمومِ میشلِ خِشَه بُرد وَدَر، نِهِی اونگَل قَیَم اییَگِرِه وِ میشل وَ دینِش ایرَن، سی‌یِکِه صیاشَه ایشناسِن. 5امّا وَتَه وَ دینِ غریبَه نیرَن، بلکم وَش ایدَرَن، سی‌یِکِه صییِی غریبه‌یَلَه نیشناسِن.»
6عیسی ای مَثَلَه سیشون گُت، امّا اونگَل نَفَمِسِن چه وَشون ایگُ.
7پَ یِه دَف‌دَه وَشون گُت: «وراسی، وَ ایشا ایگُم، مِ سی میشَل "درُم"؛ 8اونگَل که نِهِی مِ اومَن، هَمَشون دُز وِ رازَنِن، امّا میشَل وَشون گوش نَدان. 9مِ "درُم"؛ هرکه وَ مِ داخل وابو نجات ایجورِه، وِ بِی آزادی ایا داخل وِ ایرَه وَدَر وِ چراگا ایجورِه. 10دُز نیایِه غیرَ یِکِه بِدِزِه وِ بِکِشِه وِ نابود کِنِه؛ مِ اومَمِه تا اونگَل حیات داشتَه بون وُ وَ ای حیات مهلی نصیب بُویَرِن.
11«مِ چِپونِ خوبی یَم. چِپونِ خوب جونِشَه اینِه مِنِه رَه میشَل. 12کسی که سی پیل کار ایکِنِه، نَه مِی چِپونِه وِ میشَل نَه این وِّنِن، هر وخت بِوینِه گرگ ایایِه، میشَلَه اینِه وِ ایدَرَه وِ گرگ وَشون حملَه ایکِنِه وِ اونگَلَه پَخشِ‌پَلا ایکِنِه. 13وِّ که سی پیل کار ایکِنِه ایدَرَه، سی‌یِکِه دارِه سی پیل کار ایکِنِه وِ نَه مِنِه قیدِ میشَلِه. 14مِ چِپونِ خوبُم. مِ میشَلِ خِمَه ایشناسُم وِ میشَلُم مِنَه ایشناسِن، 15هَموطو که بُو مِنَه ایشناسِه وِ مِ بُو نَه ایشناسُم. مِ جونِمَه اینُم وَ رَه میشَل. 16میشَلی دَ هَم دارُم که نَه وَ ای آغِلِن. اونگَلَه هم بایِس بیارُم وِ اونگَل هَم وَ صییِی مِ گوش اییِن. اوسِه یِه گَلَه ایابون بِی یِه چِپون. 17بُو، مِنَه سی یِه دوس دارِه که مِ جونِمَه اینُم تا وِه نَه اُمبِلا بِسونُم واپَس. 18هیشکَه وِه نَه وَ مِ نیسونِه، بلکم مِ وَ میلِ خُوم وِه نَه اییُم. اقتدار دارُم وِه نَه بییُم وِ اقتدار دارُم وِه نَه بِسونُم واپَس. ای حکمَه وَ بُو خُوم گِرُتِمِه.»
19وَ خاطرِ ای گَپَل، یِه دَف‌دَه مابینِ یَهودی‌یَل دِ دَسَه‌ای اُفتا. 20یِکِلی‌شون گُتِن: «وِّ دیوزَیَه وِ کَلویَه؛ سیچِه وَش گوش ایکِنیت؟ 21امّا بقیَه گُتِن: «اینگَل گَپَلِ یِه دیوزَیَه نی. مَه دیو ایتَرِه تییَلِ کورَ واز کِنِه؟»
مِ وِ بُو یِکی یِیم
22موقِی جشنِ عیدِ وقف مِنِه اورشلیم رَسییَه بی، که روزِ تقدیسِ معبد بی. زمِسون بی 23وِ عیسی مِنِه صحنِ معبد، مِنِه اِیوونِ سِلِیمون رَه ایرَت. 24یَهودی‌یَل دورِ وِّ جَم وابی‌یِن وِ گُتِن: «تا وَ کِی ایخِی ایما نَه مِنِه شک نِگه کِنی؟ اَر مسیحِ موعودی، آشکارا وَمون بِگُ.» 25عیسی جواب دا: «وَ ایشا گُتُم، امّا باوَر نیکِنیت. کارَلی که مِ وَ نومِ بُوم ایکِنُم، وَ مِ شهادَت اییِن. 26امّا ایشا ایمون نیاریت، سی‌یِکِه نَه وَ میشَلِ مِنیت. 27میشَلِ مِ وَ صییِی مِ گوش اییِن؛ مِ اونگَلَه ایشناسُم وِ اونگَل وَ دینِ مِ ایان. 28مِ وَشون حیات ابدی اییُم، وُ وَتَه هلاک نیابون. کسی نیتَرِه اونگَلَه وَ دَسِ مِ دَرارِه. 29بُوم که اونگَلَه وَم دایِه وَ همَه گَوتَرِه، وِ هیشکَه نیتَرِه اونگَلَه وَ دسِ بُوم دَرارِه. 30مِ وِ بُو یِکی یِیم.»
31اوسِه یِه دَف‌دَه یَهودی‌یَل بَرد وَگِرُتِن تا سنگسارش کِنِن. 32عیسی وَشون گُت: «کارَل خوبِ زیادی وَ طرفِ بُوم وَ ایشا نِشون دامِه. سی کویَکیشون ایخِیت سنگسارُم کِنیت؟» 33جواب دان: «سی کارِ خوب سنگسارِت نیکِنیم، بلکم سی‌یِکِه کُفر ایگِی، سی‌یِکِه انسانی وِ خِتَه خدا دونی.» 34عیسی وَشون جواب دا: «مَه مِنِه توراتِ ایشا نَیومَیِه که "مِ گُتُم، ایشا خدایَلیت" 35اَر اونگَل که کلامِ خدا وَشون رَسی، "خدایَل" خوندَه وابی‌یِنِه - وِ هیچ جِیی وَ نوشتۀ مقدّس وَ اعتبار نییُفتِه - 36چطو ایتَریت وَ کسی که بُو آسمونی وقف کِردِه وِ بِسی کِردِه وَ دنیا، بِگِیت "کفر ایگِی،" تِنا سی‌یِکِه گُتُم کِرِ خِدایَم؟ 37اَر کارَلِ بُومَه وَجا نیارُم، کلامِ مِنَه باوَر نَکِنیت. 38امّا اَر اونگَلَه وَجا ایارُم، حتی اَر کلامِ مِنَه باوَر نیکِنیت، لااَقَل وَ او کارَل ایمون بیاریت تا بِیونیت وِ باوَر داشتَه بِیت که بُو مِنِمِه وِ مو مِنِه بُو.» 39اوسِه یِه دَف‌دَه خواسِن بِگِرِنِش، امّا وَ دَسِشون دَرَت.
40اوسِه اُمبِلا رَت وَ اولَتِ رو اردن، وُچِه که یحیی نَهاتَر تعمید ایدا، وِ وُچِه وِیسا. 41خیلی‌یَل اومَن طِیش. اونگَل ایگُتِن: «هَرچَن یحیی هیچ نِشونَه وِ معجزَه‌ای نَکِه، امّا هر چیئی که درموردِ ای آیَم گُت، راس بی.» 42وِ خیلی‌یَل وُچِه وَ عیسی ایمون آوُردِن.
Valið núna:
انجیلِ یوحنا 10: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company