Yohane 20
20
Yesu kotsilihuka
(Mat 28:1-8; Malk 16:1-8; Luk 24:1-12)
1Nemitondotondo litsuwa lya mwanduso lya juma, kung'ali na ichisi, Mariya Magidalena kaghenda kuna likaburi, kona libwe liseghetsighwa kulawa hana ghumlango ghwa likaburi . 2Baho katsuma kaghenda kwa Simoni Petiri na imwanafunzi yungi, ayula iyakundighwe na Yesu, kawalongela, “Walusola ilukuli lwa Imtwatsa kuna likaburi, na ng'atumanyile baye kwawamwikile!”
3Baho Petiri, na imwanafunzi yungi ayula, woka waghenda kuna likaburi. 4Wose weli watsuma, lekeni ayula imwanafunzi yungi katsuma himahima kumbita Petiri, kandusa yeye kupfika kuna likaburi. 5Kenama kasungulila mghati, kona isanda ya ichitani, lekeni ng'engile baye mghati. 6Kuya naye Simoni Petiri, iyakalile kuchughu kwake, kapfika na kengila mghati mwa likaburi; na kayona isanda ya ichitani pfaikalile, 7na ichitambala ichohighwe mwitwi mwa Yesu, ng'achikalile hamwe ne isandabaye, ila chipfingilisighwa na chikala hanu hake chiliyeka. 8Baho imwanafunzi yungi ayula, iyanduse kupfika kuna likaburi, pfipfila kengila mghati, kona na katoghola. 9Mbaka aho tsawang'ali ng'ana wamanye baye Ghamaandiko ighalongile kuwa Yesu kobamighwa yatsihiluke. 10Kuya iwanafunzi awo woka ukaye yawo.
Yesu komlawila Mariya Magidalena
(Mat 28:9-10; Malk 16:9-11)
11Lekeni Mariya tsakema hanze habehi na likaburi kolila. Hayang'ali yolila, kenama kasungulila mghati mwa likaburi; 12kawona malaika weli iwapfalile magwanda ighomeletsuka, wakala hasi ahala halukalile luwasitsighwa ilukuli lwa Yesu, yumwe ubali wa litwi, na yungi ubali wa ghamaghulu. 13Nawo wamghutsa, “Mamo, ulilila choni?”
Mariya kawedika, “Wamsola Imtwatsa wangu, na simanyile baye kwawamwikile!”
14Kuya Mariya kahunduka kuchughu, kamwona Yesu kema, lekeni ng'amanyile baye kama ayo tsa Yesu. 15Yesu kamghutsa, “Mamo, angu chaulila choni? Umbama nani?”
Mariya kafikitsa kolonga na iyololesa ibostani, apfo kamlongela, “Ghwemtwatsa, ana umsolile ghweghwe nongele umwikile kwani, nighende nikamsole.”
16Yesu kamwidika, “Mariya!”
Mariya kahunduka, kalonga kwa Chieburaniya “Rabboni!” Mana yake “Mlangulitsi wangu.”
17Yesu kamlongela, “Leka kunikinda, kwaapfila sina nguluke baye kughenda kuchanya kwa Baba. Lekeni ghenda kwa ndughu tsangu ukawalongele, Nene noghuluka kughenda kuchanya kwa Aba wangu iyali Aba wenu, kwa Imlungu wangu iyali Imlungu wenu.”
18Afo Mariya Magidalena kaghenda kawalongela iwanafunzi kama kamwona Imtwatsa, kawalongela na achila chayamlongele.
Yesu kowalawila iwanafunzi wake
(Mat 28:16-20; Malk 16:14-18; Luk 24:36-49)
19Haipfikie hamihe, mna litsuwa alila lya kwanza lya juma, iwanafunzi wetingana hamwe akuno imilango ihindighwa kwa ukuwapfuka iwakulu wa Wayahudi. Baho Yesu katsa, kema haghatighati hawo, kawalongela, “Mkale tseghamba.” 20Hayamalitse ukulonga apfo, Yesu kawalangusa ghamoko ghake na ilubapfu lwake. Iwanafunzi wadeng'elela ng'ani hawamwonile Imtwatsa. 21Yesu kawalongela keli, “Mkale tseghamba. Kama Baba pfayanitumile nene, na nene nomtumani mwemwe.” 22Kuya kawapfilila, kawalongela, “Bokeleni Iloho Yelile. 23Wo wose wamwaleghusila tsinzambi, iwanu awo woleghusighwa; na wo wose yamleka kuwaleghusila tsinzambi, awo ng'awoleghusighwa baye.”
Yesu komlawila Tomasi
24Lekeni yumwe mna iwanafunzi wake kumi na weli, Tomasi, iyakemighwe Didimasi, mana yake Basa, ng'akalile baho baye hayatsile Yesu. 25Apfo wanafunzi wayaghe wamlongela, “Tumwona Imtwatsa!”
Lekeni Tomasi kawalongela, “Nene bila kutsona tsing'opfu tsa imisumari mna ghamoko ghake, na kwika ichidole changu mna tsing'opfu atso, na kwika ghumoko ghwangu mlubapfu lwake, hata chidogho ghendo sitoghola baye.”
26Haghabitile matsuwa manane, iwanafunzi wake wetingana hamwe keli mng'anda, naye Tomasi tsakakala baho.Yesu katsa, akuno imilango ihindighwa, kema haghatighati hawo, kawalongela, “Mkale tseghamba.” 27Kuya kamlongela Tomasi, “Utse wike ichidole chako ahano, ughalole ghamoko ghangu, kuya ugholose ghumoko ghwako ughwingitse mlubapfu lwangu; uleka kuwa munu iyolema kutoghola, ila utoghole!”
28Tomasi kamwidika, kalonga, “Mtwatsa wangu na Mlungu wangu!”
29Yesu kamghutsa, “Kwotoghola kwaapfila kumbona? Wabweda awala ing'awonile lekeni wotoghola!”
Hebari chandikighwe ichitabu achino
30Yesu tsakatenda pfihulo pfingi hambele ha iwanafunzi wake, ing'apfandikighwe baye mna ichitabu achino. 31Lekeni apfino pfandikighwa ili mdahe kutoghola Yesu yuyo Kiristu, Imwana wa Imlungu, na kwa ukutoghola akwo muwe na ugima mghati mwa litaghwa lyake.
Pilihan Saat Ini:
Yohane 20: LBV
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Pioneer Bible Translators and The Word For The World
Pelajari Selebihnya Tentang Laghano Lya Sambi Kwe Iwanu Wose
