Mateus 2
2
Ovanongo wokoutjilo
1Iya Jesus hiaa yumukilwa moBetlehem moJudea potembu yohamba Herodes, ovanongo wokoutjilo#2:1 ovanongo wokoutjilo: Ovanongo wodhonyothi mbava dha koutjilo, hava landula onyothi ndjaa yulika mpapa yumukilwa Jesus. ve ya koJerusalem, 2hava tyaa: “Ohamba yOvajuda ndjaa yumukwa napano i li pi? Onyothi ye twe i mono hiya tumbu koutjilo, twe ya okuliyongamena kuye.”
3Ohamba Herodes hiee tji tee, wa li aa tila, nOvajerusalema wo avehe va li ava tila. 4Wa ongedha ovayambethi ovanene avehe novalongiveta, he ve pula okutya Messias ma ka yumukilwa pi.
5Iya ve mu heela hava tyaa: “Ma yumukilwa moBetlehem motjilongo tjaJudea ngahi tja sonekwa komuprofeti, hikwa tiwaa:
6‘Naove wo Betlehem motjilongo tjaJuda
haove otjinunu mokati kovatumini womoJuda,
mena lyokutya mwoove mamu dhi omutumini
nguma ka litha ovantu vandje Ovaisraeli.’ ”#Mika 5:2
7Iya Herodes wa ithana ovanongo meholamo, he ve pula nawanawa okutya onyothi ndjoka ye ya potembu patji. 8Iya we ve tuma koBetlehem, ha tyaa: “Enden̯i mu ka taendhe ondele, iya andaa mwe mu mono, indjen̯i mu ntjeele, naame wo ndji ye, ndji ke liyongamene kuye.”
9Ovanongo wokoutjilo hiva tee odhondaka ndhoka dhohamba Herodes, va ya. Onyothi ndjoka ndjiva mona koutjilo, ye ve kambulila komeho katee ye thiki kombanda yonganda moka mumwa li ondele, tjau hai kulama. 10Iya hiva mono onyothi, va li ave hulukwa unene nodhonkono. 11Va ya monganda, hava mono mo ondele naina Maria. Va twika odhongolo, have liyongamene kondele. Va itha mo ovimbundu vyawo, have mu pa otjingoldo novidhimba oviwa nomira.
12Kalunga hiee ve londola mondjodhi okutya ahamava tjuna uke kuHerodes, va ya nondjila imo yokuya kotjilongo tjawo.
Jesus ma twalwa koEgipiti
13Ovanongo wokoutjilo#2:13 ovanongo wokoutjilo: Ovanongo wodhonyothi mbava dha koutjilo, hava landula onyothi ndjaa yulika mpapa yumukilwa Jesus. hiva i, omweengeli waMuhona we liholololela Josef mondjodhi, ha tyaa: “Kulama, itha ondele naina, u ka inkolele koEgipiti, u ka kale hoka katee me ke ku heela, mena lyokutya Herodes u li po ama soko okutaendha ondele, e mu dhipae.”
14Josef wa kulama, ha itha ondele naina out̯iku, ha i koEgipiti. 15Oko a kala katee ket̯o lyaHerodes, opo odhondaka dhi hwithilwe po, Muhona ndhaa popya okupitila motjinyo tjomuprofeti hima tyaa: “Omunwandje mbe mu ithana moEgipiti.”#Hos. 11:1
Odhondele ovadhantu mava dhipawa
16 Herodes hiaa mono okutya ovanongo ve mu henuka, wa li aa yumana navi. Wa tuma koBetlehem nomoulongo watjo auhe, ha dhipaetha odhondele ovadhantu avehe okudha kodhombula mbali okutjuna pohi, ngahi a yeleka omatango hengenya ngaa pulile ovanongo. 17Iya odhondaka dhomuprofeti Jeremia dha hwithilwa po, hiaa popya ha tyaa:
18“Ondaka mai teeka moRama,
otjililo otjinene tjomukoti.
Rakel ma lili odhondele dhe,
ye kaa hala okunyimithwa,
mena lyokutya odhondele dhe
kave po uke.”#Jer. 31:15
Jesus ma dhi koEgipiti
19Iya Herodes hiaa t̯i, omweengeli waMuhona we liholololela Josef mondjodhi moEgipiti, 20ha tyaa: “Kulama, itha ondele naina, enda kotjilongo tjaIsrael, mena lyokutya mbenya mbava li amava hala omwenyo wondele, va t̯a.” 21Iya wa kulama, ha itha ondele naina, ha i kotjilongo tjaIsrael.
22Iya Josef hiaa tee okutya Arkelaus oye a vyaala Judea poluvedhe lwaihe Herodes, wa li ama tila okuya ko. Wa ya kotjilongo tjaGalilea ngahi a londolwa kuKalunga mondjodhi. 23We ya okukala mondolopa ndjii tiwa oNasaret, hitja popiwa kovaprofeti tji hwithilwe po, hiva popya hava tyaa: “Ye ma ka ithanwa Omunasareta.”#Mark. 1:24; Luk. 2:39; Joh. 1:45
Pilihan Saat Ini:
Mateus 2: DBNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Dhimba New Testament © Bible Society in Namibia, 2010.