Joani 3
3
Jesu na Nekudema
1Cwale ku Mafalisi kokali unkosi gwe zina lya Nikodema, uju kaali jumwinya gwa mu nkuta jo Majuda. 2Amasiku kale akeza kwa Jesu ku mubuza buti, “Muzigi, tuli zekelele buti uli muzigi uju azwa kwa Nyambe, ko kuti takuli uju agola uku tenda byebi ibisupo utenda, uku Nyambe takele neje.”
3Jesu kale amutaba buti, “Niconse nasa kulugwila wawa, takuli uju agola kubona u Mubuso gwa Nyambe, uku tala bonigwa lya bili.”
4Nikodema kale etaba buti, “Buti abotele unkosi uju sa kulite kuzaligwa kame? Mi tagoli uku bogwela lya bili mwi vumo lya nyina buti akazaligwe.”
5Jesu kale emwi taba buti, “Nicote wawa nasa kulugwila, takuli uju agoli uku ngina mu Mubuso gwa Nyambe ati tala zaligwi ko menzi no Moya. 6Ici naca zaligwa ku muntu ni muntu ukuti ici naca zaligwa ku Moya ni moya. 7Uleke ku komokwa aani ku lugwila buti uli botele uku zaligwa kame. 8Inkuli jasa uunga ubuji shakila. Igwe ula shugwa umulumo gwe nkuli ji uunga, kono ta gwizi uku jizwa noku jija, bobo ku kalile no muntu gense uju naga zaligwa ko Moya.”
9Nikodema kale abuza Jesu buti, “Buti bibotele kukalila?”
10Jesu kale ga mutaba buti, “Igwe uli muzigi go bantu ba Isilaele, mi toshugwisisi zezi zintu.” 11Nicote nasa kulugwila wawa, twasa gamba ibi tuzekelele mi twasa paka kwebi natwa bona, kono neshunu ano abantu tabazumini ubumpaki bwetu. 12Ta muzumini aa ni mi gambaguza ibintu bya aano ansi, cwale buti mubotele uku zumina muzumini ati nani gamba ibintu bya kwigulu? 13Takuli umuntu saja kwigulu bwita Mwana Muntu genke uju sazwa kwigulu.
14Sinagwe ni Mushe ubu naga nanwina ijoka mu mangusu, cwale no Mwana Muntu ali jelele uku nanunigwa, 15ukuti umuntu gense uju a zumina kwakwe nagwane bumi tabumani. 16Ukuti Nyambe naga shaka lwini longa mane naga liwa Mwane genke, ukuti gense uju azumina kwakwe taana nafwe kono nagwane ubumi ta bumani. 17Nyambe taa naga tuma Mwane mwilonga keza kuba umuatuli, kono kuba umujojesi gwe longa.
18Umuntu gense uju azumina kwakwe taa na atulwe, kono uju akana uku zumina kuti na atuligwe, ukuti taa na zumina mwi zina lya Mwana Nyambe. 19Mi iji ne nkatulo, ituba nalya keza Mwilonga, kono abantu naba shaka ififi kuita Ituba, ukuti imisebezi jabo kajili mimangoju. 20Umuntu gense uju atenda bumangoju ali zimbite iseli, mi takezi mwi tuba ukuti ali jogete ibitendantu byakwe bimangoju buti mane bibonaale. 21Kono gense uju ajoja ko jonse gasa keza mwi tuba ukuti ku bonaale buti ibi natenda nabya tendigwa mu mensho ga Nyambe.
Jesu na Joani
22Mwishule lya byebi, Jesu neba zigigwa bakwe kale baja mu cilalanda ca Judeya, mi kale ga sigala nabo na kolobeza. 23Mi Joani naje ka kwesi uku kolobeza mwa Enoni, afuwi no Salimi, ukuti amenzi kagali mangi momo mu cibaka, abantu kaba keza no ku kolobezigwa. 24Ao Joani kasini ku shuminigwa ku tuligwa mu ntolongo.
25Cwale kale kwaba nenkani mukati ko bazigigwa ba Joani no Mujuda jumwinya kuja ko cizo co ku licenisa. 26Kale ba keza kwa Joani no kumu buza buti, “Muzigi, umuntu uju kakele negwe mwi silya lyo lwizi lwa Jodani, uju nagwa paka byakwe, ngolole kame akwesi uku kolobeza, mi abantu bonse kwakwe bakwesi kuja.
27Joani kale abe taba buti, “Takuli umuntu uju agola kutambula cimwinya bwita ici awegwa cizwa kwigulu.” 28Nenwe muli bampaki bangu, ku koza aa na natyo buti, “Tali nime Mesiya,” kono Ime bulyo nana tumigwa buti ni litangize kwakwe. 29Mi mwini musesigwa musesi, kono umusele go musesi uju azimene afuwi mi ala mushugwa asa jangala aa shugwa ijwi lyo musesi, ukuti ku jangala kwangu kunene. 30Ije ali botele ukuba munene, ime nibe umunini.
Jesu nije azwa kwigulu
31Uju azwa kwi gulu alaita abantu bonse, kono uju azwa ansi asa gambagula ibintu bya ansi. Cwale jojo azwa kwigulu egulu lyabo akele. 32Asa gamba ibi naga bona no ku shugwa, kono takuli uju azumina ubumpaki bwakwe. 33Uju azumina ibi agamba, gasa nyatela buti Nyambe gwa cote. 34Uju naa tumigwa kwa Nyambe gasa gamba majwi ga Nyambe, kono Nyambe gasa muwa Moya ugu tagu kwesi amamaninino. 35Tata naga shaka umwana no ku muwa ibintu byonse mu nguzu jakwe. 36Umuntu gense uju a zumina kwa Mwana Nyambe kuti nagwane ubumi tabumani, kono uju akana Mwana tana bone ubumi, mi ubukali bwa Nyambe kuti nabu kale kwakwe.
Pilihan Saat Ini:
Joani 3: TBTP
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
The Word For The World International
