Riwayat Rasul-Rasul Isa 7
7
Stefanus bela diri pang angkang Dewan Pengadilan Agama
1Imam Ade Paling Rea bakatoan lako Stefanus, "Tutu ke nan luk?"
2Karing nyamung Stefanus, "Bapak-bapak ke sanak-sanak salaki, ngaro sia sanenge! Alatala Ade Mulia kamo sangita diri lako Nabi Ibrahim balo tolotu dunung, muntu diri masi tedu pang daera Mesopotamia, sanopoka diri tedu pang kota Haran 3Alatala bafirman lako Nabi Ibrahim, 'Bilin mo negerimu ke keluargamu, ke lalo mo lako tana ade ya Kusangita lako kau.'
4Teris lis mo Nabi Ibrahim kalis negeri tau Kasdim,#7:4 negeri tau Kasdim: Kasdim yanansi singin lin umin daera Mesopotamia. ke tedu pang kota Haran. Beru kamo mate bapak, Alatala yasuru Nabi Ibrahim rapina kalis Haran ko tana Israil pang tutedu to ta. 5Pang waya nan Alatala nongka yabeang apa-apa kalis tana nan lako Nabi Ibrahim, mana sajengkal tana. Konang Alatala bajangi ya beang tana nan lako Nabi Ibrahim ke rowe beka mudi, manaling pang waya nan diri nopoda anak.
6Ta Firman Alatala lako Nabi Ibrahim, 'Rowe bekamu ya dadi tau asing pang negeri tau lin,#7:6 negeri tau lin yanansi negeri tau Mesir. ke taunan yasanadi budak ke yasasakit benar saleʼ empat ratis tin. 7Konang bangsa ade sanadi taunan budak ya Kuhukum, ke kasuda nan tau Yahudi ya lis kalis negeri nan ke nyemba lako Aku pang negeri ta ade ka Kujangi lako nene.' 8Teris Alatala yasatego jangi nan ke Nabi Ibrahim kewa yasuru sunat sarea tau salaki pang dalam keluarga dadi tanda jangi nan. Nan bua muntu Nabi Ibrahim dapat anak yanansi Ishak, Ishak yasunat pang umir balu ano. Nan si luk Ishak yasunat Yakub anak nya, ke Yakub yasunat sadua olas anak nya ade dadi sadua olas balo tolotu.
9Balo tolotu iri ate ko Yusuf adiʼ taunan, nan bua yajual Yusuf lako negeri Mesir dadi ulin#7:9 Kalis sadua olas anak salaki Yakub, Yusuf anak ade paling yasayang, nya anak rea kalis Rahel sala sopo sawai Yakub ade paling yasayang. Luk ta ade pina iri ate sanak-sanak salaki Yusuf. Kesimpulan ade yasanapat ling Stefanus ada pang ayat 9-16 yaete kalis Kitab Kejadian 38-50, luk Yusuf yajual ling sanak salaki dadi ulin lako tau Mesir jangka Yusuf yaangkat dadi gubernur pang negeri tau Mesir nan.. Konang Alatala ada barema-rema ke Yusuf. 10Alatala yalepas Yusuf kalis sarea susa ier. Diri yabeang berka ke yapina Yusuf dadi bijaksana pang angkang Firaun, raja Mesir nan. Nan bua Firaun yasanadi Yusuf gubernur pang negeri Mesir ke bakawasa pang sasir istana Firaun. 11Karing dadi mo sopo masa pacakelik ade rea benar pang negeri Mesir ke pang negeri Kanaan, nan bua tau-tau dadi kasakit benar jangka balo tolotu no bauʼ tumpan me aiʼ. 12Konang muntu Yakub menong luk ada gandum pang Mesir, yasuru mo balo tolotu nan lalo lako ana. Nan kamula taunan lalo ko Mesir. 13Pang waya taunan lalo ade kadua kali, nan po Yusuf ramada luk nya sanak salaki taunan. Pang waya nan po Firaun yato luk keluarga Yusuf. 14Karing Yusuf yasuru lalo ete Yakub, bapak nya, ke sarea keluarga malowe pitu pulu lima tau. 15Karing rapina mo Yakub ko Mesir. Pang nan Yakub ke sarea balo tolotu mate. 16Mayit taunan yabawa ramalik ko Sikhem ke yakubir pang kubir ade ka yabeli ling Nabi Ibrahim kalis anak-anak Hemor pang Sikhem ke pida-pida pipis perak.
17Muntu waya Alatala yaroa mo satunas jangi ade ka yabeang lako Nabi Ibrahim#7:17 jangi ade ka yabeang lako Nabi Ibrahim yanansi umin yabawa sarea rowe beka lis kalis negeri Mesir ke yabeang Tana Kanaan lako taunan. nan sanarang parak, sanarang peno mo lowe balo tolotu pang negeri Mesir, 18jangka dapat waya sopo raja lin marinta pang negeri Mesir, ade no to rua Yusuf. 19Raja nan yatipu daya bangsatu ke yasasakit balo tolotu. Nya yasuru balo tolotu bolang tode-tode ade beru ka yaparanak mabau taunan no telas.#7:19 raja Mesir yanansi raja Mesir katakit lamin tau-tau Yahudi dadi sanarang peno ke dadi kuat, nan bua nya yaparinta bidan-bidan umin bolang sarea anak salaki tau Yahudi ade beru ka yaparanak pang berang Nil. Riwayat ta ada pang Kitab Keluaran 1: 8-12. Pang masa nan tau Yahudi yapina ulin pang negeri Mesir. 20Pang waya nan Nabi Musa yaparanak ke diri gera pang angkang Alatala. Telu bulan le diri yajampang ling inaʼ bapak kewa basio-sio'. 21Teris diri yabolang, konang anak sawai Firaun yaete Nabi Musa ke yajampang dadi anak nya diri. 22Sarea ilmu bangsa Mesir yaajar lako Nabi Musa, ke diri dadi tau ade bakawasa pang dalam pangkeling ke sarea ade yaboat.
23Muntu Nabi Musa barumir empat pulu tin, tumung mo niat pang dalam ate umin lalo jango sanak sawai salaki diri yanansi tau-tau Yahudi. 24Waya nan Nabi Musa yagita sala sopo kalis tau Yahudi yasasakit ling sopo tau Mesir, teris diri yabela tau nan ke yasamate tau Mesir nan. 25Nabi Musa sampina luk sanak sawai salaki diri, yanansi tau-tau Yahudi, yato tegas luk ola diri mo Alatala ya salamat taunan kalis ka yapina ulin ling tau Mesir. Konang taunan no to tegas. 26Marang nawar yagita ampo ling diri dua tau Yahudi basengal, teris diri sakekeʼ sadame taunan ke beling, 'Nene ta basanak salaki, kakuda bua nene basengal?' 27Konang tau ade ka pukil dengan nan yasurung Nabi Musa ko sisi ke beling, 'Ba sai ka angkat kau dadi pemimpin ke hakim kami? 28Ba sate musamateku ampo mara ka musamate tau Mesir nan saperap?' 29Muntu Nabi Musa menong pangkeling tau nan, barari mo diri kalis Mesir ke tedu pang negeri Midian dadi tau asing. Pang ana diri dapat dua anak salaki.
30Kasuda empat pulu tin, sopo malaikat satangkela diri lako Nabi Musa pang dalam amir api ade lis kalis sopo puin ode pang padang gurun#7:30 padang gurun: Padang gurun pang Olat Sinai siong gersik bae konang ada si pida-pida tumung puin kayu ke ada si rebu sakedi ampo, pasang ke tana pang Poto Tano pang waya balit. Olat Sinai. 31Nabi Musa manang gaok lako sarea ade yagita nan, ke muntu yaparak umin yagita, beling mo Alatala lako diri, 32'Aku ta Tuhan balo tolomu, yanansi Tuhan Ibrahim, Ishak ke Yakub.' Teris Musa bagegar ke no tengan ngingo lako puin ode nan. 33Karing Alatala bafirman ampo, 'Lepas mo sendal kalis nemu, apaling tana pang mumanang nan yanansi tana ade suci. 34Kamo Kugita kewa tutu-tutu umat-Ku yasasakit ling tau Mesir pang negeri Mesir, ke Kumenong ngare ngareong taunan, ke kamo Kuturin umin salepas taunan. To ta, ma mo, ya Kuutus kau ko negeri Mesir.'
35Dadi Alatala yautus Nabi Musa lako tau Yahudi, mana ling dunung pang Mesir taunan kamo yatolak diri kewa beling, "Sai ka angkat kau dadi pemimpin ke hakim kami?' Musa ta ka yautus ling Alatala umin dadi pemimpin ke tau ade sabebas tau Yahudi ola panulung malaikat ade ka sangita diri lako Nabi Musa pang puin ode nan. 36Musa ta mo ade bawa tau Yahudi lis kalis Tana Mesir ke sangada mujizat-mujizat ke tanda-tanda ajaib pang Mesir, pang Lit Mira ke pang padang gurun saleʼ empat pulu tin. 37Ke Nabi Musa ta ade beling lako tau Yahudi, 'Alatala ya utus sopo nabi tawa nene kalis bangsa nene diri, mara Diri utus aku.'#7:37 Kalimat ta yaete kalis Kitab Ulangan 8:15 38Nabi Musa ada pang tenga-tenga tau Yahudi muntu taunan batompok pang padang gurun, ke Nabi Musa dadi ola antara malaikat ade bakarante lako diri pang Olat Sinai ke balo tolotu. Diri ade ka tarima kalis Alatala firman-firman umin yasanapat lako kita me luk telas pang angkang Alatala. 39Konang balo tolotu nongka roa matiʼ lako Nabi Musa mala taunan tolak diri. Pang dalam ate taunan sate ramalik ko negeri Mesir. 40Taunan beling lako Harun#7:40 Harun yanansi kakak Nabi Musa, Alatala kenang nya ke Nabi Musa umin yapimpin tau-tau Israil lis kalis negeri Mesir ade ka pina tau Israil dadi budak (Kitab Keluaran Pasal 3-14). Harun dadi Imam Rea Israil ade mula., 'Pina mo dewa-dewa umin kami, mabau dewa-dewa nan pimpin kami. Apaling Nabi Musa ade ka pimpin kami lis kalis negeri Mesir nan, no kami to apa ade dadi lako diri.'
41Teris pang waya nan taunan pina sopo patung anak lembu. Taunan yasamele ke yatunung binatang dadi pameang umin yasemba patung nan. Ke taunan kameri-kamore lako apa ade yapina ling taunan diri. 42Dadi Alatala sangedo diri kalis taunan ke yabeang menan taunan nyemba lako sarea ade ada pang bao awan#7:42 sarea ade ada pang bao awan yanansi mata ano, bulan, bintang ke planet-planet ade yasemba dadi dewa ling bangsa-bangsa ade telas parak ke bangsa Israil. , mara ade ka yatulis pang dalam kitab nabi-nabi, ta ling,
'He tau-tau Israil! Siong tawa Aku nene samele binatang ke nene beang pameang
saleʼ empat pulu tin pang padang gurun.
43Konang nene bawa kema pang semba dewa Molokh#7:43 Molokh yanansi dewa awan ke mata ano ade yasemba ling tau-tau Kanaan ke tau Fenisia. Tau-tau beang anak-anak dadi pameang lako dewa nan.
ke patung bintang dewa nene, yanansi Refan#7:43 Refan yanansi planet Saturnus ade yasemba dadi dewa ling tau Mesir.,
nan patung-patung ade ka nene pina umin nene semba.
Ling luk nan ya Kubolang nene jangka do ko satoe negeri Babel.'
44Karing beling mo Stefanus ampo, "Kema Jangi#7:44 Kema Jangi: Alatala yatulis sapulu parinta pang dua kodeng batu ke yabeang lako Nabi Musa mabau yapati ling tau Israil. Batu-batu nan yasepan 'Jangi'. Sadua batu nan yasio pang dalam sopo kotak ade ada pang dalam kema, nan bua kema nan yasepan 'Kema Jangi'. ada pang balo tolotu pang padang gurun. Kema nan yapina mara ade ka yaparinta ling Alatala lako Nabi Musa mara conto ade kamo yagita ling nya. 45Kema nan yatarima ling balo tolotu kalis bapak-bapak taunan, ke yabawa ko tana ta pang waya Yusak pimpin taunan rampas tana ta kalis bangsa-bangsa ade yasua ling Alatala kalis angkang taunan. Kema nan ada pang tana ta jangka saman Nabi Daud. 46Nabi Daud yaberi ling Alatala ke nya ngeneng mabau yasamanang bala' umin Alatala, yanansi Tuhan ade yasemba ling Nabi Yakub. 47Konang anak Nabi Daud mo yanansi Nabi Sulaiman ade samanang bala' nan umin Alatala. 48Konang Alatala Ade Maha Tingi no si tedu pang dalam bale-bale ade yapina ling manusia, mara ade yasanapat ling sopo nabi,
49'Ta ling Firman Alatala:
Awan yanansi tahta-Ku, ke dunia yanansi pang angal ne-Ku.
Dadi, bale me rua ade sate musamanang tawa Aku?
Katokal me rua ade ya dadi pang Kubarenang?
50Ba siong si Aku ta Diri ke ade ka pina sarea luk nan?'"
51Beling Stefanus lako anggota-anggota dewan nan, "He tau-tau ade tegeng otak, keras ate ke no roa ramenong. Nene mara balo tolo nene, yanansi teris-teris kewa Ruh Alatala. 52Sarea nabi-nabi yasasakit ling balo tolo nene. Mala taunan yasamate nabi-nabi ade lebe dunung sanapat luk kanatang Tau Ade Benar nan. Ke Diri nan ade to ta kamo nene hianat ke samate. 53Kamo nene tarima hukum Taurat ade ka yasanapat ling malaikat-malaikat, konang nongka nene roa turit."
Stefanus yasamate
54Muntu yamenong ling anggota-anggota Dewan Pengadilan Agama nan Stefanus beling nan luk, taunan dadi ngarai benar jangka ngareat isit. 55Konang Stefanus, ade lempo ke Ruh Alatala, ngingo ko bao awan. Teris nya yagita caya kamulia Alatala ke Isa ada manang pang satoe kanan Alatala! 56Teris beling nya, "Gita! Kugita awan kabuka ke Anak Manusia#7:56 Anak Manusia yanansi gelar umin Raja Basalamat Ade Yajangiʼ Ling Alatala, ke gelar ta yakenang ling Isa dadi panyepan diri. Gelar ta mula-mula yakenang pang dalam kitab Daniel 7:13-14 ke yasanapat luk Raja Basalamat ade ya datang mudi. manang pang satoe kanan Alatala."
57Karing kaserak mo taunan rena tutup kuping mabau naʼ menong pangkeling Stefanus, teris taunan sarea karampo nya. 58Taunan yaoras Stefanus ko luar kota ke yapalentong ke batu. Sarea saksi-saksi ade ka tudu Stefanus dalam sidang nan yaolo juba taunan pang ne sopo tau muda ade basingin Saul. 59Muntu taunan yapalentong Stefanus, nya eneng doa lako Alatala, ta ling, "O Isa Junjungan, tarima mo ruhku." 60Rena ngentin, Stefanus kaserak kewa seda ade akas, "O Alatala, naʼ mo gama Sia hukum taunan kalangan rea dosa ta!" Kasuda beling menan, teris mate mo Stefanus.
Pilihan Saat Ini:
Riwayat Rasul-Rasul Isa 7: SMW
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
©️2025 The Seed Company
