Riwayat Rasul-Rasul Isa 4
4
Petrus ke Yahya yasidang pang angkang Dewan Pengadilan Agama Yahudi
1Muntu Petrus ke Yahya bakarante ke tau-tau peno, datang mo imam-imam, kepala pangawal Balaʼ Alatala ke tau-tau Saduki.#4:1 tau-tau Saduki yanansi tau-tau kalis golongan agama Yahudi ade no nyadu luk ada malaikat ke ada katelas kabali kalis kamate 2Taunan ngarai benar apaling rasul-rasul nan ajar tau peno luk Isa, ke sanapat luk katelas Isa kalis kamate yasanyata luk sarea tau mate ya telas kabali. 3Karing taunan yabau sadua rasul nan ke yatahan jangka marang nawar apaling kamo petang. 4Konang tau-tau ade kamo menong pangajar rasul-rasul nan, peno ade nyadu. Dadi tau nyadu sanarang batamba, ke lowe tau salaki ade nyadu dadi malowe kira-kira lima ribu tau.
5Marang nawar, pemimpin-pemimpin Yahudi, tau-tau loka Yahudi ke ahli-ahli Kitab Suci Taurat sangada sidang pang Yerusalem. 6Taunan baremin basaiʼ ke Hanas yanansi Imam Ade Paling Rea, ke Kayafas, Yahya, Iskandar ke sarea rowe beka ade salaki Imam Ade Paling Rea nan. 7Petrus ke Yahya yabawa lako angkang taunan, ke yakatoan, "Me luk ka nene saterang tau repok nan? Kewa kawasa sai ke kewa singin sai nene boat luk nan?"
8Karing Petrus ade lempo ke Ruh Alatala, beling, "Pemimpin-pemimpin ke tau-tau loka Yahudi! 9Kami ano ta sia sidang kalangan rea ka kami boat balong umin tulung tau repok, ke ling sia sate to meluk tau ta yasaterang. 10Sia sarea ke sarea tau Israil mesti to luk tau ta manang pang angkang sia sarea ke parana isi ade sehat, kalangan rea kawasa kalis Isa Al Masih tau Nazaret nan. Sarea sia kamo samate Isa pang kayu palang, konang Alatala kamo satelas Diri kabali. 11Isa ta ade yasepan pang dalam ayat Kitab Suci ta,
'Batu ade yabolang ling tukang-tukang batu yanansi ade ka nene bolang,
ampa-ampa dadi batu ade paling penting.'
12Ola Isa bae si tubauʼ salamat. Apaling pang sasir dunia nonda sanompo tau selin ke Isa ade kamo yautus ling Alatala lako manusia umin salamat kita."
13Muntu yagita luk kabaraning Petrus ke Yahya ke yato ampo luk sadua rasul nan tau biasa ade nongka balajar pang sakolah agama, teris ngangan mo anggota-anggota Dewan Pengadilan Agama Yahudi nan. Ke taunan yapato luk sadua rasul nan tau ade barema-rema ke Isa. 14Anggota Dewan Pengadilan Agama nan no bauʼ beling apa-apa apaling taunan yagita tau repok ade manang basaiʼ ke sadua rasul nan kamo yasaterang. 15Dadi taunan yasuru sadua rasul nan lis kalis dalam ruang pengadilan agama nan, ke anggota-anggota dewan nan sasopo karante. 16Beling taunan, "Apa ade mesti tuboat lako tau dua nan? Sarea tau ade tedu pang Yerusalem kamo yato tanda ajaib ade luar biasa ta ade yaboat ling tau dua nan. Luk ta no mo tubau sangkal. 17Konang mabau luk ta no mo sanarang barungan sasir lako tau peno, dikin mo tuancam mabau tau dua nan man mo bakarante ke sai-sai bae kenang Singin nan."
18Ke yakelek mo sadua rasul nan tama kabali, karing sadua tau nan yapelang mabau naʼ sakali-kali bakarante atawa ngajar kenang singin Isa. 19Konang nyamung mo Petrus ke Yahya, "Sila mo sia sarea pikir apa ade benar pang angkang Alatala, tuturit parinta sia sarea atawa parinta Alatala. 20No si mungkin kami bauʼ barenang bakarante luk apa ade kamo kami gita ke kami menong." 21Teris anggota-anggota Dewan Pengadilan nan sanarang keras yaancam rasul-rasul nan konang ahir Petrus ke Yahya yalepas. Dewan Pengadilan nan no yatumpan cara umin hukum Petrus ke Yahya apaling tau peno samulia singin Alatala kalangan rea tau repok nan yasaterang. 22Tau ade ka yasaterang kewa ajaib nan kamo lebe kalis empat pulu tin umir.
Doa tau-tau nyadu
23Kasuda Petrus ke Yahya yalepas, teris ramalik mo taunan lako dengan-dengan, ke yabada mo apa ka pangkeling imam-imam rea ke tau-tau loka Yahudi nan lako tau dua nan. 24Muntu yamenong ling dengan-dengan luk nan, taunan barema-rema sasopo ate sentek doa lako Alatala, ta seda, "O Alatala kawasa ade ka sanadi awan ke tana, lit ke sarea isi. 25Kewa Ruh Sia, ka Sia bafirman ola hamba Sia Nabi Daud, balo tolo kami, ta seda,
'Tau-tau ade siong tau Yahudi ngamuk ngasa,
ke bangsa-bangsa pina rencana ade nonda tuju.
26Raja-raja dunia sasiap diri ya perang,
ke sarea pemimpin bangsa sasopo ate kewa Alatala ke Raja Basalamat Ade Yajangiʼ Ling Alalata.'
27Sarea denan kamo dadi. Apaling tutu si kamo baremin pang dalam kota ta Raja Herodes ke Pontius Pilatus, ke tau-tau ade siong tau Yahudi barema ke tau-tau Yahudi umin kewa Isa, Hamba Sia ade suci, ade ka Sia sanadi Raja Basalamat. 28Taunan baremin umin yaboat sarea luk ade kamo Sia satentu kalis mula ling kawasa ke karoa Sia. 29To ta, O Alatala, ma mo Sia gita me luk taunan ancam kami, ke beang mo gama lako hamba-hamba Sia ta kawasa mabau kami baraning sanapat Firman Sia. 30Ulir mo gama ima Sia umin saterang tau, ke sangada mo gama tanda-tanda ajaib ke mujizat-mujizat ola kawasa Isa, Hamba Sia ade suci nan."
31Kasuda taunan eneng doa, kangien mo katokal pang taunan baremin. Ke sarea taunan yasalempo ke Ruh Alatala teris taunan mulai mo sanapat Firman Alatala kewa baraning.
Tau-tau nyadu telas sopo ate sopo pikir
32Sarea tau nyadu nan telas sopo ate ke sopo pikir, ke nonda sanompo tau kalis taunan ade beling luk apa ade yakamaeng ling nya yakamaeng ling nya diri, konang sarea apa ade ada yakamaeng si barema-rema. 33Kewa kawasa ade rea, rasul-rasul nan yasarungan luk Isa Junjungan Ade Ilahi kamo yasatelas kabali. Ke taunan yabeang berka ade peno benar ling Alatala. 34Nonda sanompo tau kalis tau-tau nyadu ade marasa kurang, apaling sarea tau ade ada tana atawa bale reda yajual, ke hasil ade ka yajual nan yabawa 35ke yasera lako rasul-rasul. Karing yabagi-bagi lako saruntung tau ade perlu.
36Nan si luk ampo ke Yusuf rowe beka Lewi kalis Pulau Siprus. Nya biasa yakelek Barnabas ling rasul-rasul, ade bategas tau ade saliper ate. 37Yusuf jual rau, ke pipis nan yabawa ke yasera lako rasul-rasul.
Pilihan Saat Ini:
Riwayat Rasul-Rasul Isa 4: SMW
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
©️2025 The Seed Company
