Riwayat Rasul-Rasul Isa 1
1
Ruh Alatala yajangiʼ
1Bapak Teofilus ade kaji hormat. Pang dalam kitab kaji ade mula, kaji tulis tawa sia sarea luk ade ka yaboat ke ade ka yaajar ling Isa kalis samula, 2-3jangka waya Diri kangangkat lako surga. Ke kaji tulis si ampo me kaluk Diri yasasakit jangka mate, ke me kaluk Diri telas kabali kalis kamate. Kasuda Diri telas kabali, peno mo kali Diri sangita diri lako rasul-rasul ade ka yapili ling Diri, mabau taunan to luk Diri tutu-tutu telas kabali. Saleʼ empat pulu ano, Isa galak sangita diri lako taunan ke bakarante meluk Alatala marinta dadi raja. Karing kewa panulung Ruh Alatala, Isa sanapat apa ade mesti yaboat ling rasul-rasul nan.
4Pang sopo waya muntu Diri mangan barema-rema ke taunan, Isa beling, "Naʼ nene bilin kota Yerusalem konang nene tari mo Ruh Alatala ade ka yajangiʼ ling Bapak-Ku, mara ade kamo Kusanapat lako nene. 5Nabi Yahya paning tau ke aiʼ dadi tanda tobat, konang no si le ampo nene yapaning ke Ruh Alatala."#1:5 yapaning ke Ruh Alatala: Kata-kata ta sangitatu cara Alatala beang berka lako tau-tau ade kamo tobat. Diri yabeang Ruh Alatala mabau ada pang dalam taunan. Ruh Alatala tulung taunan ke satego taunan mabau taat lako karoa Alatala.
Isa kangangkat ko surga
6Muntu rasul-rasul nan baremin berema-rema ke Isa, bakatoan mo taunan lako Diri, "Junjungan, pang waya ta ke ya Sia samanang kabali Kerajaan Israil?"#1:6 samanang kabali Kerajaan Israil: 'Dunung tau-tau Yahudi nongka yajaja ling tau Roma. Tana taunan yasepan tana Israil ke taunan ada kerajaan nya diri yanansi Kerajaan Israil. Pang dalam Kitab Suci kamo yajangiʼ luk Raja Basalamat ya salamat tau Yahudi. Ling luk nan tau Yahudi yaarap luk Raja Basalamat nan yasalamat taunan kalis jajahan bangsa Roma. Nan si luk ke tau-tau turit Isa yasampina Isa ade baeng sakala bangsa Roma, teris ya samanang kabali Kerajaan Israil ke marinta dadi raja lako bangsa Yahudi.
7Nyamung Diri lako taunan, "No mo manta nene to waya atawa masa. Bapak-Ku diri ade baeng satentu waya nan me ling kawasa Diri. 8Konang ya nene tarima kawasa muntu Ruh Alatala datang turin pang nene, ke nene ya dadi tau ade basarungan luk Aku pang kota Yerusalem, pang sasir wilaya Yudea ke Samaria, ke jangka poto dunia." 9Beru kasuda Diri beling menan, kangangkat mo Diri kalis angkang mata taunan, ke Diri katutup ling mega jangka no bauʼ yagita ling taunan. 10Muntu taunan monga gita Diri entek lako bao awan, embang-embang manang dua tau kenang kereʼ lamung puti pang endeng taunan, 11ke beling lako taunan, "He tau-tau Galilea, kakuda bua nene manang monga ko bao awan? Isa ta, ade kangangkat lako surga bilin nene, ya datang kabali kenang luk ade sama mara ade beru nene gita Diri lalo lako surga to ta."
Tau-tau nyadu eneng doa
12Karing rasul-rasul nan bilin Olat Zaitun ke ramalik ko kota Yerusalem. Katokal olat nan kira-kira sakilo do kalis Yerusalem.#1:12 kira-kira sakilo do kalis Yerusalem: Naskah asli kenang kata-kata 'ma do palangan Ano Barenang'. Dalam Hukum Yahudi tau-tau yapelang balangan lebe kalis kira-kira 1,2 kilometer pang Ano Barenang. 13Beru kamo dapat kota nan, taunan entek ko ruang bao sopo bale, pang katokal taunan yangentang. Rasul-rasul nan yanansi: Petrus, Yahya, Yakub, Andreas, Filipus, Tomas, Bartolomeus, Matius, Yakub anak Alpius, Simon tau Zelot#1:13 tau Zelot: yanansi tau ade kakadu dadi anggota kelompok ade baeng bela bangsa Israil kalis penjajahan Roma. ke Yudas anak Yakub. 14Sarea taunan teris-teris baremin eneng doa kewa sopo ate barema-rema ke pida-pida tau sawai, Maryam inaʼ Isa, ke sanak-sanak salaki Isa.
Matias yapili dadi gentan Yudas Iskariot
15Pang sopo ano, Petrus manang pang tenga-tenga sanak sawai salaki ade nyadu lako Isa ade muntu baremin, kira-kira malowe saratis dua pulu tau. Beling mo nya, 16"O sanak sawai salaki, mesti yasatunas apa ade ka yatulis pang Kitab Suci luk Yudas, tau ade baeng bawa tau-tau ade bau Isa. Luk nan kamo yasanapat lebe dunung ling Ruh Alatala ola Nabi Daud. 17Yudas nan sala sopo kalis kami ade ka yapili ling Isa dadi rasul, umin enti boat tawa Alatala barema-rema ke kami."
18Kalis pipis hasil kaboat jahat nan Yudas dapat tana.#1:18 Yudas dapat tana: Yudas kamo mate muntu imam-imam rea beli tana ke pipis ade ka yadapat ling Yudas kalis hasil ka yasera Isa lako pemimpin-pemimpin tau Yahudi. Konang Yudas tetap yasepan tau ade kamaeng pipis nan ke ade kamaeng tana nan. Mungkin imam-imam rea yabeli tana nan kenang singin Yudas. Baca Matius 27:7 Nya teri langkap empas tian ke lis isi.#1:18 Nya teri langkap empas tian ke lis isi: Injil Matius 27:5 beling luk Yudas mate gantong diri. Apa ade yasajelas ling Lukas pang ta bada kita luk Yudas teri kalis katokal ade tingi. Mungkin tali ade ka yakenang gantong diri nan putis ke parana kena ke batu-batu pang bawa, atawa mungkin tian kena ke ade tayam muntu teri. 19Luk nan yato ling sarea tau ade tedu pang Yerusalem. Nan bua taunan yasasingin tana nan 'Hakal Dama'#1:19 'Hakal Dama': kalis Basa Aram. Pang masa nan kapeno tau Yahudi kenang basa Aram dadi basa ade yakenang saruntung ano. ade dalam basa taunan bategas 'Tana Geti'.
20Beling Petrus ampo, "Kamo yatulis pang dalam Kitab Zabur#1:20 Kitab Zabur, yanansi sala sopo Kitab Suci ade barisi nyanyi-nyanyi ade ka yatulis ling Nabi Daud ke tau-tau lin. luk Yudas, ta luk:
'Pang tedu nya ya dadi selir#1:20 Pang tedu nya ya dadi selir: Ayat ta yaete kalis Kitab Zabur 69:26 ada dua tegas. Ade mula yanansi pangkeling Daud luk musu-musu. Ade kadua, pangkeling Alatala ola Daud luk apa ade ya dadi lako Yudas mudi yanansi pang tedu Yudas ya dadi selir.,
ke nonda sanompo tau ade ya tedu pang nan.'
Ke ada ka yatulis ampo luk Yudas,
'Beang mo boat nya yaete ling tau lin.'#1:20 Beang mo boat nya yaete ling tau lin: Petrus kenang ayat ta kalis Kitab Zabur 109:8 umin yasajelas luk boat Yudas dadi rasul mesti yagentan ling tau lin.
21-22Ling luk nan, mesti mo ada sopo tau kalis tenga-tenga kita ade tupili. Tau nan ya pili umin dadi tau basarungan barema-rema ke kami luk Isa kamo telas kabali kalis kamate. Tau nan mesti sala sopo kalis tau-tau ade teris-teris barema ke kami saleʼ Isa Junjungan kita Ade Ilahi nan ada barema ke kami, yanansi kalis waya Isa yapaning ling Nabi Yahya jangka waya Isa kangangkat ko surga bilin kita." 23Teris taunan yausul dua tau yanansi Yusuf Barsabas ade yakelek Yustus si ampo, ke Matias. 24-25Karing taunan eneng doa, "O Alatala, Sia to isi ate sarea tau. Ling luk nan Sia sangita mo gama lako kami, sai kalis sadua tau ta ade kamo Sia pili umin dadi rasul tawa gentan Yudas. Apaling Yudas kamo bilin boat ta umin lalo lako katokal ade pantas tawa nya.#1:24-25 katokal ade pantas tawa nya: Maksud Yudas kamo tama neraka umin yahukum pang ana." 26Kasuda nan sadua singin taunan yaundi, ke ade kena undi nan Matias. Dadi nya yaangkat dadi rasul umin basaiʼ ke saolas rasul ade lin.
Pilihan Saat Ini:
Riwayat Rasul-Rasul Isa 1: SMW
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
©️2025 The Seed Company
