Filip munu 2
2
Krist kɛlɛle kiéné valé a kɛlɛle blɛn
(Mt 20:25–28; Rom 15:1–7; Ébr 1:1–4)
1’Kaa lé ka ke Krist gi, é ka tɔrɔ paa? Sɔlɛle ka fuu dɔ ka taa? Ka a é nanale Bale Léli nyaa? Ka a miwe ’namazannu valé nyanaizénzannu nyaa? Dé ka we ’konu yé Krist gi, 2kalé zanté, ’ka anlé ginanale lɛ sɔɔ ’ko zo: ka gibɔrɔle ’é kɛlɛ do; ’ka sɔ ka ke lɛ; ka bli ’é kɛlɛ do. Kalé blibɔmawe ’é kɛlɛ do. 3Té ka we do kpen kɛlɛ zakɛlɛle valé kabozen ze vɔle nya lo, naa, ’kabo kɛlɛ kiéné yé ’ka mi bɛnu ye blɛn é mini kabozen ta. 4Ka faa do do, té ka ka bɔn‐in bɔrɔ kabo saa lé zin yele ma lo; ’ka bɔn‐in bɔrɔ é ziin ka bɔlunu zé yele ma.
5Bli lé é ke Jézu Krist gi, ’é kɛlɛ ka gi ma. 6É ’ka ’yee valé Bale bɔle ékema ye lɛ é blibɔmawe nya lo, dɔlé ’té yee ɛ ke Kazambale dɔbɛ gi a pélisia bléyi va. 7Naa, é ’élé fua si é ta, yé é wɔra mi wuozan dɔbɛ gi yé é kɛlɛ bélé mi zo. 8Yé é ’ébozen kɛlɛ blami nya, yé é ’ébozen kɛlɛ kiéné, yé é kɛlɛ lɛdɔ?-?mazan nya fɔɔ yé é ga, yé é dunuzén?-?mita ga wo yiliblan ta. 9Bɛwemalé Kazambale a nwa é ziin minwiinzan blɛɛn bozen nya, yé tɔ lé é ke é plale tɔ faa nwiin, é a nɔ a lɛ, 10léé, lagi koo, tɛrɛla koo, tɛrɛ wuo koo, munu faa ’wo powuo zun wona Jézu tɔ nya, 11’té nɛnɛ faa a fé léé, Jézu Krist a Mizan nya, Tibale tɔ bɔle we ma.
Krétiɛnnu a bélé kyɛbɔ zo tɛrɛ la
(Mt 5:14–16; 2 Pi 1:5–11)
12An blibɔmamunu, ka an lɛdɔama yifaama fɛan zo é vinin bɛ, sin, é a lé ka nyanama pa ka bɔle ka sile we gi ’wuoplana we ma, kanale valé manyɔɔnle nya. Té ka a kɛlɛ an yuɛ va saawo lo; naa, sin, bléyian va lé maa ’ka ka va lo, kalé a kɛlɛle gi ’é gyɛ ma. 13Naa, Kazambale a nyanama pana ka gi, é bɔn‐in danwe lɛsɔɔle we ma; éé ka gya a lɔrɔ nya yé éé a lɛsɔɔ plɛplɛ no ka lɛ.
14Ka kɛlɛwenu faa gi, ’ka paa gun?-?gyɛle valé zavɔle ma, 15ka kɛlɛle wéiin valé sauun we ma, ’té woo ka yé Kazambale lé nénu lé, gun ’ka wo ma lo, wo nya, bléyi ’ko vamunu naané vɔnle méléna, ’té ka bié tɛrɛ la gunutinu va bélé sonakyɛ zo, ’té ka mibélidére fé munu lɛ. 16A zo lé Krist lé yi la, an gi é dan nana lɛ kalé we ma léé, maa ’ka vlan buru lɛ é pla lo, yé an ’ka nyanama pa lɛ é pla lo. 17Dé wo kalé blipale nɔ Kazambale lɛ bélé saraka zo, dé a ta’yi kɛlɛ an nyɛ nyaoo, ’bɛ an gi nanaan, yé kaa faa gi ’é nana ékeva. 18Ka é ziin, ka gi ’é nana ma, yé kaa gi ’é nana ékeva ma.
Timoté valé Épafrodi lé we
(1 Ts 3:1–11)
19An bli a a lɛ léé, an dan Timoté pa lɛ ka lɛ zia é kele, ’té dé Mizan Jézu a nyi si. Dé an ka tawe ’ma, é dan an fuu dɔ lɛ an ta. 20Naa, mian a bli ke an bli zo, ’té kalé we ke blɛn a bli gi bɛ, dé é ’ka Timoté nya lo, a bɛ ’ka lo. 21Munu faa a ’wobozen lé tɔnɔ naginina, wo ’ka Jézu Krist zé ginina lo. 22Wo Timoté gi dan fɛan zo bɛ, ka a gi dɔɔ. Wenéné gi gyɛle we ma é nyanama pa an va bélé fɛan zo lé mi be éé nyanama paan é ti va, a zo. 23Anlé we é dan kɛlɛ lɛ fɛan zo bɛ, dé an ’bɛ ye faa, an bli a a lɛ léé, maa yee Timoté pa ka lɛ zia, 24yé é dɔ an gi léé, maabozen é dan go lɛ ka va é kele, ’té dé Mizan a nyi si.
25É dɔ an gi léé, é a lé maa an zuané Épafrodi pa ka lɛ zia. É a anlé nyanama pa béé nya, anlé gulidan béé nya; mian ka a pa an lɛ zia, fɛnu lé an mawe ke wo gi, wo nya é lee bɛ, yee lé. 26Ka yelɔrɔ a a gyɛna é baba, yé a bli kyɛ dɔ léé, ka a tawe ’ma léé, gyɛ a a ma. 27É gyɛ kɛlɛ webozen nya, fɔɔ yé é vo sɛ yé é ga; naa, Kazambale nyanai zén a ta. A ta saa‐an é nyanai zén lo; é nyanai zén an ta é ziin, té an bli gi kyɛ é dɔ é ke ta gɔnɔ fié lo we ma. 28Bɛwemalé maa a pa ka lɛ zia an bli faa nya léé, ka gi ’é nana a yele é ziin we ma, é valé maabozen bli gi kyɛ ke sile we gi. 29’Ka a si kalé bɛn nya Mizan gi, gi nanale bozen nya, yé ’ka ’bɛ zo munu lɛdɔma. 30Naa, Krist lé nyanama lé we ma lé é vo sɛ yé é ga. Dé é kɛlɛ léé, ka ana, an mawenu lé kanɔ a kɛla, é bli si élé tɛrɛla lɛ, yé é wo kɛlɛ.
Pilihan Saat Ini:
Filip munu 2: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979