Éfez munu 5
5
’Ka tawo ka va kinile yɛrama
(Rom 13:11–14; 1 Kor 6:9–11; 1 Ts 4:1–8)
1’Ka kɛlɛ Kazambale zuosonazannu nya, sɔlɛnénu wezannu zo. 2’Ka tawo ka ke va sɔlɛle nya, Krist kɛlɛwe ma. Kaa sɔ a lɛ, yé ébozen nɔ Kazambale lɛ kaalé we ma bélé blan valé saraka gin néné zo.
3Pɛnpɛnnégyɛle koo, we tiridɔle gɔnɔ faa koo, blibɔle fɛ ma koo, té wo ’bɛ do kpen tɔ ’ma ka méléna lo. ’Bɛ zo lé é ke é zima Kazambale lé munu zé nya. 4Dére naanénu koo, boawenu koo, mi gisonawenu koo, we ’konu ’ka ka baagiwe nya lo; té wo wo ’ma ka ta lo ma. Naa, ’wo bɔvɔwenu ɛ ’ma ka ta ma. 5Naa, ’ka a dɔɔ é zima ma, dé é a pɛnpɛnnégyɛzan nyaoo, dé é a we tiridɔle kɛlɛzan nyaoo, dé é a bli bɔ gɔɔli mazan nyaoo, ’bɛ gi léé, miyilibɔzan, ’bɛnu va mi do kpen ’ka dan tɔnɔ ble lɛ Krist valé Kazambale lé fuatɛrɛ la lo. 6Té mi do é ka saan dére boanu nya lo ma. We ’konu ɛ dan Kazambale lé bliflile nya tɔnégiplɛplɛzannu ma. 7Té ka nana wo va monomono lo.
8É li, ’té ka a gunutinu va, yé sin ka va a é kinile Mizan gi. ’Ka tawo ka va kinile yɛrama. 9Naa, mi va kinile tɔnɔ lé ke wezin gɔnɔ faa koo, we tegele gɔnɔ faa koo, webozen gɔnɔ faa koo, wo nya. 10We lé é sɔ Mizan lɛ, ’ka yee ɛ nagini; 11yé gunutinu lé nyanamanu lé mi ’ka tɔnɔ yé wo gi lo, té ka wo pa lo, naa, ’ka wo yi ga. 12Naa, we lé wa kɛla kyeen gi, a fele a yaragyɛwe nya; 13naa, we faa lé wa yi ga, san a ta bɔraan, naa, we faa lé é ke é bɔrale é a bélé san zo. 14Bɛwemalé wo léé:
Bii lé i ke yiɛna, ’i vuo,
’I vuo mi galenu va,
Yé Krist é dan i va kini lɛ.
15Bɛwemalé, ’ka yuɛ pa ka giégane va; té ka tawo bélé ’tugyɛmunu zo lo; naa, ’ka tawo bélé wedɔɔmunu zo. 16Bléyi ’ko a bléyi nyané nya, bɛwemalé té ka bléyinu sɛrɛ é pla lo. 17Bɛwemalé, té ka kɛlɛ ’tugyɛzannu nya lo, naa, Mizan lé blibɔmawe a fɛan zo, ’ka a dɔɔ ma. 18Té nwɛ é ka gyɛ lo ma, ’bɛ a we vɔnle nya, naa, Kazambale Léli ’é ka kun ma. 19’Ka we fe ka ke lɛ Lɛrɛvɔsɛbɛ gi lɛrɛnu koo, Bale tɔbɔlɛrɛnu koo, lélilɛrɛnu koo, wo vɔle nya. ’Ka lɛrɛ vɔ yé ’ka Mizan bɔ vɔ ka bli faa nya a tɔ zin fele nya. 20’Ka ka Ti Bale bɔ vɔ yifaama we faa ma, Kaazan Jézu Krist tɔ nya, 21yé ’ka pla ka ke wuo Jézu Krist lee kanale nya ma.
Gɔné valé é na lé we
(WP 2:21–24; Kol 3:18–19; 1 Pi 3:1–7)
22’Kaa gɔné nanu, ’ka pla ka zananu wuo bélé fɛan zo lé ka ke Mizan wuo, a zo. 23Le zana a le nwiinzan nya, bélé fɛan zo lé Krist ke léglizi nwiinzan nya, ’té é ke a kɔlɛ nya yé é a a siéwegizan nya é ziin bɛ, a zo. 24Fɛan zo lé léglizi ke é plale Krist wuo, a zo duo lé é a lé lomu ’é pla ’wo zananu wuo we faa gi.
25’Kaa le zananu, ka nanu ’é sɔ ka lɛ, bélé fɛan zo lé léglizi sɔ Krist lɛ, a zo ma, yé ébozen nɔ alé we gi, 26a kɛlɛle sauun we gi, yé é a gi bɔ ’yi valé é dére nya. 27Léglizi tɔbɔle ’ko, ’té a tiri ’ka lo, ’té a ma ’ka é yurule lo, ’té gun do kpen ’ka a ma lo, ’té é ke sauun valé wéiin, Jézu a a va léé, ’é a ye ébo zé nya, amalé ébo nɔ alé we gi. 28A zo duo lé é a lé gɔnénu nanu ’é sɔ ’wo lɛ bélé wobozen kɔlɛ sɔ wo lɛ fɛan zo, a zo. Mian a na sɔ a lɛ, é sɔ ébozen lɛ é ziin. 29Mi do kpen kɔlɛ za ’ka ébozen gi monomono lo; naa, éé fɛblele no a lɛ, ’té éé a paan é zima, bélé Krist éé léglizi zé kɛla fɛan zo, a zo. 30Kaa a a kɔlɛvafɛnu nya, azama. 31Bɛwemalé é a lé gɔné é si é ti valé é bu va, yé é péli vɔ é na va, yé wo fiénu ’é kinin mi do kpen nya. 32Weyɔɔle ’ko a blɛn. Maa we ’ko fé Krist valé léglizi lé we ma. 33Yé é ziin, ka faa nanu ’é sɔ ka lɛ bélé kabozen zo ma, yé ’kaa lomu, ’ka zananu lɛdɔma ma.
Pilihan Saat Ini:
Éfez munu 5: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979