Éfez munu 3
3
Nyanama lé Pɔl a paan bɛnnu va
(Rom 16:25–26; Kol 1:24–29; 1 Pi 1:10–12)
1Bɛwemalé, maa Pɔl lé an ke Jézu Krist lé bokɔngizan nya ’kaa bɛnnu lé we ma, maa bazoroan. 2Naa, ka ’ka a ’ma lɛ léé, Kazambale élé zin bɛ pa an lee kalé tɔnɔ yele we ma loo? 3Weyɔɔle lé maa alé we gyɛ ka lɛ dére sɛ nya ’ko, Bale bozen ɛ pa an ta amalé maa a dɔɔ. 4Dé ka a tafe?-?na, ka dan a gi dɔɔ lɛ léé, weyɔɔle lé é ke Krist nya, maa a gi ’ma. 5Wo ’ka a nagɔɔn lɛ blami vininnu lɛ bélé fɛan zo lé Kazambale Léli a nagɔɔn lao alé nwunvɔmunu sauunnu valé Balelayemunu lɛ, a zo lo. 6Yee we yɔɔle lé ke ’ko: Wenéné lé we ma bɛn bɛnu a tɔnɔblezannu nya ko Juifinu va, ko valé wo a kɔlɛ do nya, yé blivolɛdére lé Bale a fe Jézu Krist lé we ma, é a ko valé wo dɔlafɛ nya. 7Yé maa kɛlɛ Wenéné ’ko gi nyanamapazan nya, Bale lé zin lé ke blɛ lé Kazambale a kɛlɛ an lɛ, a nya, élé we lɛ sɔɔ plɛplɛ nya, a we ma. 8Maa lé an ke Kazambale lé munu faa va mi kiéné nya, Bale zin ’ko kɛlɛ an lɛ léé, Krist lé fuawenu lé wo ’ka wo gi ’male nyaan lo, maa wolé we fe bɛn bɛnu lɛ, 9yé we lé é ke é yɔɔle yifaama Kazambale lé, é fɛ faa bɔra, a bli gi, Kazambale é dan we ’ko kɛlɛle lɛ sɔɔ lɛ fɛan zo, yé maa wo bɔn‐in kini a nya; 10’bɛ zo lé, sin wemaplɛplɛzannu valé fɛnu faa lé wo ke fɛnu lorunu na, ’té woo wo lɛdɔama, wo dan a gi dɔɔ lɛ léé, Kazambale a we gɔnɔ faa dɔɔzan nya, léglizi lé we ma, 11we lé Kazambale a kɛlɛ é kyɛn, ’té é a lɛ sɔɔ Kozan Jézu Krist nya bɛ, a yɛrama. 12Jézu Krist lé we ma lé Kazambale zi nɔ kaa lɛ léé, kaa bié ’é sɔnɔ bli ta plɛplɛ nya, kaa bli vole a lɛ we ma. 13Yé é ziin, maa lé ka lɛ léé, té ka fuu é si ka ta klenu lé maa ke a blena kalé we ma, a ma lo; wa kalé tɔ nya.
Krist lé sɔlɛle dɔɔle
(Kol 2:1–3; Jud 1:24, 25; Wg 1:6)
14Aléwemalé maa powuo zunwo Ti lé, 15lagi lele valé tɛrɛ la lele faa tɔ éé sié a va, a ’lɛ, ’té maa laan a lee léé, 16’é Léli wɔra kabozen nya bélé nyɔnɔbɔ zo, yé ka dɔ gligli boenwo alé fuasan yɛrama ma; 17Krist ’é nyana ka bli gi ka bli vole a lɛ we ma ma; ka suni ’é wɔra sɔlɛle gi yé ka dɔ a gi gyéiin ma; 18yé Krist lé sɔlɛle ’wuola koo, a sangi koo, a guru koo, a nwale loru koo, yé ka valé Kazambale lé munu faa a dɔɔ yé ka a sɔlɛle boen dɔɔ, 19dɔlé té mi ’ka bɔa a dɔɔle lɛ lo, yé ’ka fan, Kazambale a é fanle fɛan zo, a zo ma.
20Mi lé éé bɔa we faa lé kaa laan, é valé we faa lé kaa gi bɔrɔan a nya, a kɛlɛle lɛ, ’té éé giéan ’bɛ ta é baba, plɛplɛ lé é ke nyanama pana kaa gi, a nya bɛ, 21’wo ’bɛzan tɔ bɔ léglizi valé Jézu Krist lé we ma, mi kulu faa va ma, lɛɛfaama, té a glɛ é dɔ lo. Amɛɛn.
Pilihan Saat Ini:
Éfez munu 3: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979