Kolɔs munu 4
4
1’Kaa mi zannu, we lé é ke tegele valé é drɔle, ’ka yee ɛ kɛlɛ ka wuozannu lɛ; ka a gi dɔɔ léé, ka é ziin, kazan a, é a lagi loru.
2’Ka yara pa bazorole ta, ’ka vo é vuole a gi bɔvɔle nya. 3’Ka bazoro é ziin ko tɔ ma léé, Kazambale ’é zi nɔ ko lɛ, ko alé we fe, yé maa Krist lé weyɔɔle gi fe; we ’ko ma lé maa ke bokɔn gi ’ko. 4’Ka bazoro léé, maa a gi fe kpaklaa, é a lé maa a fe fɛan zo, a zo.
5’Ka we kɛlɛ béeramunu vazia wedɔɔle nya; té ka bléyi do kpen sɛrɛ é pla lo. 6Ka dére ’é kɛlɛ é zin yifaama, wɛ ’é kɛlɛ a ma ma, é a lé ka we zi paan mi do do lɛ fɛan zo, kalé a dɔɔle we ma.
Weale voélazan
7Kaa sɔlɛbwe Tisik, yarapawela nyanamapazan, an va nyanama pa béé Mizan gi, é dan an tawe faa fe lɛ ka lɛ. 8Maa a pa zia ka va anbo yuɛ va kalé ko tawe ’male we gi, é valé ka bli dɔralale we gi. 9Yee koo, yarapawelazan Onézim, kaa sɔlɛbwe lé é ke ka va mi do nya bɛ, ’bɛ koo, maa wo paan ka lɛ zia. We faa lé éé kɛla ’ko, wo dan a fe lɛ ka lɛ.
10Arisaak lé é ke bokɔn gi an va, é we ka va, é valé Banabas buru be Maak nya. Maa alé we fe ka lɛ, dé é go ka va, ’ka a kun é zima. 11Jézu lé wa laama Jutus, é we ka va é ziin. Juifi mi bɛ do kpen ’ka Kazambale lé plale mi nwiin lé nyanama pana an va lo, woo mi yaa ’ko lé, yé wo ɛ kɛlɛ an bli dɔralazannu nya. 12Épafras lé é ke ka va mi do nya bɛ, é we ka va; é a Jézu Krist wuozan nya, yé é ’ka daanma ka ta gulidanle ma bazorole nya lo léé, ’ka dɔ gligli yé gun ’é si ka ma, yé ’ka ’wuo dɔ Kazambale lé blibɔmawe faa wuo. 13Maa a ma we fé léé, ka lé gibɔrɔ a a ma blɛn. Laodisé Krétiɛnnu valé Iérapolis Krétiɛnnu koo é ziin, wolé gibɔrɔ a a ma blɛn. 14Dɔtrɔ gɔné Luk lé é sɔ ka lɛ é baba bɛ, yee valé Démas we ka va.
15Ko we Laodisé bwenu valé Nimfa va, é valé léglizigimunu lé woo zén‐é ékeva alé kɔn gi bɛ, wo va.
16Dé ka sɛbɛ ’ko ta fe ka va faa, ’ka a pa Laodisé munu lɛ zia yé wo é ta fe ’wolé léglizi gi ma. Yé anlé sɛbɛ lé Laodisé munu é dan a pa lɛ ka lɛ zia bɛ, ’ka ’bɛ é ta fe é ziin ma. 17Yé ’ka fé Aasip lɛ léé, ’é yuɛ pa ébo va nyanama lé é a ye Mizan va, alé we ma, a lɛsɔɔle é zima we gi.
18Maa Pɔl, an we ka va anbozen bɛ nya. An yerebalenu sele ’é dɔ ka gi ma. Kazambale lé zin ’é vo ka ta ma.
Pilihan Saat Ini:
Kolɔs munu 4: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979