2 Tɛsalɔnik munu 1
1
Weale lé
1’Kaa Tɛsalɔnik léglizigimunu lé ka ke kaa Ti Bale valé Mizan Jézu Krist gi bɛ, ko we ka va. Maa Pɔl koo, Silvɛn koo, Timoté koo, ko ɛ ke sɛbɛ ’ko gyɛna ka lɛ. 2Kaa Ti Bale valé Mizan Jézu Krist ’wo zin kɛlɛ ka lɛ yé ’wo ka vo drɔɔ ma.
Dé Jézu da, é dan we ble lɛ
(Mt 13:40–43; 25:31–46; 1 Pi 4:12–13)
3Bwenu, kalé blipale gi a gyɛna, yé ka sɔle ka ke lɛ gi a gyɛna, bɛwemalé é a lé ko Kazambale bɔ vɔ kalé we ma bléyi faa ma. ’Bɛ a we tegele nya. 4É ziin, ko kobo ze vɔa ka tɔ gi Kazambale lé léglizigimunu va wean ma, yee lé é ke ’ko: ka yara a é pale we ta yé ka bli a é pale, dɔlé ’té ka a nyané valé kle blena. 5We ’ko a gɔɔn tɔmase nya léé, Kazambale éé mi vaboo é zua, yé é a ye léé, a yara a ka yara léé, ka kɛlɛ Kazambale lé fuatɛrɛ la munu nya, amalé ka ke nyané blena bɛ. 6Kazambale éé we kɛla tegele amalé munu lé woo kle paan ka ta bɛ, é dan kle pa lɛ wo ta. 7Yé ka lé wa kle pana ka ta bɛ, é dan flinle nɔ lɛ kaa lɛ, bléyian va lé Mizan Jézu é dan si lɛ la gi yé é zun, yee valé élé lanje plɛplɛnu nya, ’bɛ bléyi va. 8É dan da lɛ kyɛnɛnɛ méléna, munu lé wo ’ka Kazambale dɔɔa lo, é valé munu lé wo ’ka Kaazan Jézu lé Wenéné lɛdɔama lo, we lɛdɔle wo gi we ma. 9Kazambale é dan wo si lɛ Mizan valé élé plɛplɛ lé fuasan ma baa, yé é dan we lɛdɔ lɛ wo gi wo sɛrɛle tata nya. 10We ’ko é dan kɛlɛ lɛ yian nya lé é dan élé fua tagɔɔn lɛ élé munu gi, yé munu é dan Jézu ze vɔ lɛ ’bɛ yi nya, munu faa lé wo bli vo a lɛ, wolé we ma. Naa, wenayedére lé ko a fe ka lɛ, ka bli vo ’bɛ lɛ.
11Bɛwemalé ko bazoroan yifaama ka tɔ ma léé, ka‐an Bale ka laa, kolé Bale ’é ka ye munu lé wo laa yara lé, wo nya; yé a bɔn‐in danmawe zimanu faa koo, nyanamanu lé woo sié kalé blipale va koo, ’é wo kɛlɛle lɛ sɔɔ ka lɛ élé plɛplɛ nya. 12A zo lé Kaazan Jézu tɔ é dan kɛlɛ lɛ blɛn kalé we ma, yé ka tɔ é dan kɛlɛ lɛ blɛn alé we ma, kaalé Bale valé Mizan Jézu Krist lé zin yɛrama.
Pilihan Saat Ini:
2 Tɛsalɔnik munu 1: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979